Alu i mataupu o loo iai

Alu i le lisi o mataupu

Le Auala e Feagai ai ma se Maʻi Faafuaseʻi

Le Auala e Feagai ai ma se Maʻi Faafuaseʻi

 Po ua faafuaseʻi ona faalētonu lou soifua mālōlōina? Atonu la ua e iloa le faigatā o lenā tulaga ma aafiaga i le mafaufau, faalogona ma le tulaga tau tupe. O le ā e fesoasoani iā te oe? E faapefea ona e fesoasoani i se tauaiga po o se uō o loo feagai ma se maʻi? E ui e lē o se tusi faafomaʻi le Tusi Paia, ae o loo iai fautuaga aogā e fesoasoani e feagai ai ma lenei tulaga faigatā.

Fautuaga e fesoasoani iā te oe e feagai ai ma se maʻi

  •   Ia saʻili togafitiga faafomaʻi

     Le manatu o le Tusi Paia: “E lē manaʻomia e tagata malolosi se fomaʻi, ae na o ē mamaʻi.”—Mataio 9:12.

     Faatatauga: Ia saʻili le fesoasoani a fomaʻi pe a talafeagai.

     Faataʻitaʻi: Ia saʻili ni togafitiga sili ona lelei e mafai ona e maua. E iai taimi e atamai ai le saʻili o fautuaga mai i isi fomaʻi. (Faataoto 14:15) Ia faamatala lelei i le fomaʻi āuga o lou maʻi ma ia e malamalama lelei i fautuaga a le fomaʻi. (Faataoto 15:22) Ia fai ni au saʻiliʻiliga e faatatau i lou maʻi, e aofia ai togafitiga e mafai ona maua. Pe a e malamalama i mea e te faatalitalia ona o lou maʻi, o le a sauniunia ai oe e feagai ma tulaga tau faalogona ma faia filifiliga lelei.

  •   Ia faatumauina ni masaniga lelei

     Le manatu o le Tusi Paia: “E aogā le faamalositino.”—1 Timoteo 4:8, Contemporary English Version.

     Faatatauga: E te maua aogā i le faatumauina o ni masaniga lelei, e pei o le toʻaga e faamalositino.

     Faataʻitaʻiga: Ia tausisi i se faasologa o le faamalositino, ia taumafa paleni ma ia lava le moe. E ui o loo e faamasani i lenei tulaga fou, ae ua ioe tagata tomai o le faaalu o le taimi ma le malosi e tausisi ai i masaniga lelei, e maua ai aogā. Ae po o ā lava mea e te filifili e fai ia faamautinoa e lē faateteleina ai lou maʻi pe aafia ai au togafitiga.

  •   Ia saʻili le fesoasoani a isi

     Le manatu o le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

     Faatatauga: E mafai ona fesoasoani au uō iā te oe i taimi faigatā.

     Faataʻitaʻi: Ia talanoa atu i sau uō maufaatuatuaina, o sē e mafai ona e saʻoloto e faailoa i ai ou faalogona. O le a fesoasoani iā te oe e faaitiitia lou popole, ma e maua ai le fiafia. E masani lava e mananaʻo aiga ma uō e fesoasoani mai, ae e latou te lē iloa le mea e fai. O lea, ia faamatala manino i ai mea e mafai ona latou faia e fesoasoani ai iā te oe. Aua le faatalitalia ni mea se tele, ae ia lotofaafetai mo le fesoasoani ua latou saunia. I le taimi e tasi atonu e manaʻomia ona e faia ni tapulaa, e pei o le faaitiitia o le umi ma le tele o asiasiga a isi, ina ia ʻalofia ai lou soona popole e ui i o latou uunaʻiga lelei.

  •   Ia faatumauina se vaaiga saʻo

     Le manatu o le Tusi Paia: “O le loto e fiafia e aogā auā e mālōlō ai, a o le loto e momomo e mamago ai ivi.”—Faataoto 17:22.

     Faatatauga: O le iai o se vaaiga saʻo e fesoasoani iā te oe e maua le toʻafilemu ina ia feagai ai ma lou maʻi.

     Faataʻitaʻi: A o e faamasani i lou tulaga fou, ia uaʻi atu i mea e mafai ona e faia ae lē o mea e lē mafai ona e faia. Ia ʻalofia le faatusatusa o oe i isi po o le tulaga o lou soifua mālōlōina sa iai muamua. (Kalatia 6:4) Ia faatutū ni sini e mafai ona e ausia, lea e fesoasoani ia iai pea se vaaiga saʻo. (Faataoto 24:10) Pe a talafeagai, ia faia mea mo isi. O le fiafia e maua mai i le fesoasoani atu i isi, o le a fesoasoani e faaitiitia ai mafaufauga lē saʻo.—Galuega 20:35.

Po o le a fesoasoani le Atua iā te oe e feagai ma lou maʻi?

 Ua faailoa mai e le Tusi Paia e mafai ona fesoasoani Ieova a le Atua i se tasi o loo feagai ma se maʻi. E ui e tatou te lē faatalitalia o le a faamālōlōina faavavega i tatou, ae e mafai ona maua e i latou e tapuaʻi i le Atua lana fesoasoani i auala nei:

 Filemu. E mafai ona foaʻi mai e Ieova “le filemu mai i le Atua, e silisili i mea uma lava e manatu i ai.” (Filipi 4:6, 7) O lenei filemu e mafai ona fesoasoani i se tagata e ʻalofia ai le lofitūina i le popole. E foaʻi mai e Ieova le filemu i ē e tatalo iā te ia ma faailoa atu o latou popolega.—1 Peteru 5:7.

 Atamai. E mafai ona foaʻi mai e Ieova le atamai e faia ai filifiliga lelei. (Iakopo 1:5) E maua e se tasi lenā atamai pe a ia aʻoaʻo ma faatatau mataupu silisili o loo i le Tusi Paia.

 Se faamoemoe matagofie mo le lumanaʻi. Ua folafola mai e Ieova se lumanaʻi, o le a “lē fai mai foʻi se tasi ua nofo ai: ‘Ou te maʻi.’” (Isaia 33:24) O lenei faamoemoe ua fesoasoani i le toʻatele e faatumauina se vaaiga saʻo, e ui o loo feagai ma maʻi tugā i le taimi nei.—Ieremia 29:11, 12.

a I le Tusi Paia, o Ieova o le suafa lea o le Atua.—Salamo 83:18.