Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

O le ā le Manatu o le Tusi Paia i le ʻAva Malosi? Po o se Agasala le Inu i le ʻAva Malosi?

O le ā le Manatu o le Tusi Paia i le ʻAva Malosi? Po o se Agasala le Inu i le ʻAva Malosi?

Tali a le Tusi Paia

E lē o se agasala pe a fuafua lelei le inuina o le ʻava malosi. Ua faamatalaina e le Tusi Paia le uaina o se meaalofa mai i le Atua e mafai ona tatou olioli ai. (Salamo 104:14, 15; Failauga 3:13; 9:7) Ua faaalia mai foʻi e le Tusi Paia le aogā o le uaina mo le togafitia o maʻi.1 Timoteo 5:23.

Na taumafa foʻi e Iesu le uaina a o iai i le lalolagi. (Mataio 26:29; Luka 7:34) I se tasi o vavega lauiloa a Iesu, na ia faaliliuina ai le vai e avea ma uaina, o se meaalofa agalelei lea i se aiga o se faaipoipoga.Ioane 2:1-10.

Lamatiaga o le inutele

Ua taʻua i le Tusi Paia vala e aogā ai le uaina peitaʻi, ua taʻusalaina le inu tele ma le onā. Pe a filifili se Kerisiano e inu le ʻava malosi e tatau ona fuafua lelei. (1 Timoteo 3:8; Tito 2:2, 3) Ua taʻua i le Tusi Paia ni māfuaaga e tatau ai ona ʻalofia le inu tele.

  • E faaleagaina ai le tomai e mafaufau ai ma faia faaiʻuga lelei. (Faataoto 23:29-35) E lē mafai e se tagata onā ona faataunuu le faatonuga a le Tusi Paia e faapea e “tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.”Roma 12:1

  • O le inu tele e aveesea ai uiga pulea lelei ma “aveesea ai uunaʻiga lelei”e faia le mea saʻo.Hosea 4:11; Efeso 5:18.

  • E mafai ona oo atu ai i le faamativaina ma faafitauli tugā tau le soifua mālōlōina.Faataoto 23:21, 31, 32.

  • E lē fiafia le finagalo o Ieova i le inu tele ma le onā.Faataoto 23:20; Kalatia 5:19-21.

O le ā le tele o le inu tele?

O se tasi e inu tele i le ʻava malosi, ua ia tuuina o ia ma isi i se tulaga lamatia. E tusa ai ma le faamatalaga a le Tusi Paia, e iloa se tasi ua onā e lē ona o le lē iloa o se mea, ae o amioga e pei o le lē malamalama, tautevateva, mea e leʻi masani ona faia pe a lē onā, faamisa, po o le lē manino foʻi o le tautala. (Iopu 12:25; Salamo 107:27; Faataoto 23:29, 30, 33) E oo foʻi iā i latou o ē e ʻalofia le onā e mafai ona “faamamafaina o outou loto i . . . le inu tele” ma tofo ai i āuga matuiā o le inu tele.Luka 21:34, 35.

Matuā ʻalofia atoatoa

Ua faaalia mai i le Tusi Paia taimi e tatau ai i se Kerisiano ona matuā ʻalofia atoatoa le ʻava malosi:

  • Pe a tausuai ai isi.Roma 14:21.

  • Pe a solia ai le tulafono a le atunuu.Roma 13:1

  • Pe afai e lē mafai e se tasi ona pulea lana inu. O i latou ua faapologaina e le ʻava malosi ma le faaaogā sesē o le ʻava malosi, e tatau ona uia se laasaga tāua.Mataio 5:29, 30.

Faitau Atili

Ia Faafiafia le Atua i o Tatou Olaga

E mafai ona e ola i se auala e faafiafiaina ai Ieova. O le mea moni, e mafai ona avea oe ma ana uō.