Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

Pe e Feteenaʻi le Tusi Paia?

Pe e Feteenaʻi le Tusi Paia?

Tali a le Tusi Paia

E leai, e autasi le Tusi Paia atoa. Atonu e foliga mai e feteenaʻi nisi vaega o le Tusi Paia, peitaʻi e mafai ona maua le malamalamaaga saʻo e ala i le faatatauina o se taʻiala se tasi pe sili atu foʻi o loo mulimuli mai:

  1. Iloilo le siʻomaga o le mau. O so o se tusitala lava e foliga mai o loo feteenaʻi o ia lava pe afai o ana upu e lē o maua i le siʻomaga o le mau po o se fuaiupu.

  2. Ia iloilo le manatu o le tusitala. Atonu e mafai ona faamatalaina ma le saʻo e molimau na vāaitino i se mea na tupu, ae na te leʻi faaaogāina upu lava ia po o le faaaogāina o faamatalaga tutusa.

  3. Ia iloilo faamatalaga moni o talafaasolopito ma aganuu.

  4. Ia faia se faaeseesega o upu faafaatusa ma upu moni.

  5. Ia iloa o le gaoioiga o loo faasino atu i se tagata e tusa pe na te leʻi faatinoina moni. *

  6. Ia faaaogā se faaliliuga saʻo o le Tusi Paia.

  7. ʻAlofia le taumafai e faafetaui manatu o le Tusi Paia i manatu sesē po o talitonuga a taʻitaʻilotu.

O faaaʻoaʻoga o loo mulimuli mai o le a faaaogā ai nei taʻiala e faamatala ai se manatu e foliga mai e feteenaʻi le Tusi Paia.

Taʻiala 1: Siʻomaga o le mau

Afai na mālōlō le Atua i le aso lona fitu, e faapefea ona faaauau pea ona galue? O le siʻomaga o le tusi o Kenese i le tala o le foafoaga, ua faaalia ai o le fetalaiga a le Atua, “ona amata ai lea ona mālōlō o ia i le aso lona fitu mai i ana galuega uma na ia faia,” o loo patino ona faasino atu i ana galuega faaletino o le foafoaga o le lalolagi. (Kenese 2:2-4) E leʻi feteenaʻi Iesu i lenei manatu, ae ina ua ia fetalai “o loo galue loʻu Tamā e oo mai i le aso nei,” sa ia fetalai i isi galuega a le Atua. (Ioane 5:17) O galuega a le Atua e aofia ai le faagaeeina o le tusiaina o le Tusi Paia ma lana taʻitaʻiga ma le tausiga o le tagata.Salamo 20:6; 105:5; 2 Peteru 1:21.

Taʻiala 2 ma le 3: Vaaiga ma talafaasolopito

O fea na faamālōlō ai e Iesu le tamāloa tauaso? Ua faapea mai le tusi a Luka na faamālōlō e Iesu le tamāloa tauaso a o “latalata o ia i Ieriko,” ae o loo taʻua i le tala lava lea e tasi i le tusi a Mataio ia tamāloloa tauaso e toʻalua e faapea, na tupu lenei mea “a o tuua e i latou Ieriko.” (Luka 18:35-43; Mataio 20:29-34.) Na tusia nei tala e lua mai i ni vaaiga eseese se lua, ae o nei tala taʻitasi ua maua ai faamatalaga e fesootaʻi lelei le tasi i le isi. E tusa ai ma le aofaʻiga o tagata, o le tusi a Mataio o loo saʻo lelei e toʻalua, a o Luka o loo uaʻi atu i le tamāloa lea na fetalai tuusaʻo i ai Iesu. Ae o le nofoaga, na maua e tagata suʻesuʻe i toegāmea i le eleele, o Ieriko i vaitaimi o Iesu, e lua aai, o le aai tuai o Iutaia sa tū i le pe a ma le tasi ma le ʻafa kilomita (1 maila) mai i le aai fou o Roma. Atonu sa iai Iesu i le va o na aai e lua ina ua ia faia lenei vavega.

Taʻiala 4: Uiga faafaatusa ma Uiga moni

Po o le a faaumatia le lalolagi? Ua faapea mai le Failauga 1:4, “o le lalolagi e tumau lea e faavavau” lea e foliga mai e feteenaʻi ma nisi faaupuga o loo i le faaliliuga o le Tusi Paia 1884 e faapea “o mea na fai aʻi ina ua mu; o le lalolagi.” (2 Peteru 3:10, Beck) Ae i le Tusi Paia, o le upu “lalolagi” o loo faasino moni i lo tatou paneta, ma i sona uiga faafaatusa, o loo faasino atu i tagata o loo soifua ai. (Kenese 1:1; 11:1) O le faaumatiaga o le “lalolagi” o loo faamatalaina e le 2 Peteru 3:10 e faasino atu e lē o le susunuina o lo tatou paneta, ae o le “faaumatiaga o tagata faalēmataʻu.”2 Peteru 3:7.

Taʻiala 5: Viiviia i se galuega na te leʻi faia

I Kapanaumi, o ai na sau ma le talosaga a le taʻitaʻiʻau iā Iesu? Ua faapea mai le Mataio 8:5, 6 na sau le taʻitaʻiʻau iā Iesu, ae ua faapea mai le Luka 7:3 sa auina mai e le taʻitaʻiʻau ana tamāloloa Iutaia e talosaga mo ia. E mafai ona malamalama i lenei manatu e foliga mai o loo feteenaʻi ai le Tusi Paia, na muamua ona faia e le taʻitaʻiʻau lana talosaga, ona ia auina atu lea o ana tamāloloa e fai ma ona sui.

Taʻiala 6: Faaliliuga saʻo

Pe e tatou te agasala uma? Ua aʻoaʻo e le Tusi Paia ua tatou agasala uma lava ona o le uluaʻi tagata, o Atamu. (Roma 5:12) O nisi faaliliuga e pei o le faaliliuga faa-Peretania o le King James Version e foliga mai e feteenaʻi e ala i le faapea mai o le tagata lelei “e le agasala.” (1 Ioane 3:6, The Bible in Basic English; King James Version) I le uluaʻi gagana, o le veape Eleni mo le “agasala” i le 1 Ioane 3:6 o loo i le taimi nei, e faailoa mai ai o lea gagana e masani ona faailoa mai se gaoioiga faifai pea. E iai le eseesega o le agasala tuufaasolo, lea e lē mafai ona ʻalofia, ma le faaauau ona lē usiusitaʻi ma le loto iai i Tulafono a le Atua. O lea, ua matuā faamanino mai e nisi faaliliuga ia nei feteenaʻiga e ala i le faaaogā o fuaiupu saʻo e pei o le “e lē faaauau ona agasala.”—New World Translation; Phillips

Taʻiala 7: Le Tusi Paia ae lē o aʻoaʻoga a lotu

Pe e Tutusa Iesu ma le Atua pe e maulalo nai lo le Atua? Na fetalai Iesu: “E tasi i maʻua ma le Tamā,” lea e foliga mai e feteenaʻi ma lana fetalaiga e faapea e “sili le Tamā iā te aʻu.” (Ioane 10:30; 14:28) Ina ia manino ma malamalama i na fuaiupu, e tatau ona tatou iloilo le mea moni o fai mai ai le Tusi Paia faatatau iā Ieova ma Iesu, nai lo le taumafai e faaōgatusa fuaiupu ma le aʻoaʻoga a le Tolutasi, lea e lē o faavae mai i le Tusi Paia. Ua faaalia mai e le Tusi Paia, o Ieova e lē gata o le Tamā o Iesu, ae o ia foʻi o le Atua o Iesu, o Lē o loo ia tapuaʻi i ai. (Mataio 4:10; Mareko 15:34; Ioane 17:3; 20:17; 2 Korinito 1:3) E lē tutusa Iesu ma le Atua.

O le uiga o le fetalaiga a Iesu “e tasi i maʻua ma le Tamā,” ua faaalia ai o loo ia faasino atu i le tasi o a la fuafuaga ma lona Tamā, o Ieova le Atua. Na fetalai Iesu: “O aʻu foʻi e autasi ma le Tamā.” (Ioane 10:38) Na faasafua atu e Iesu lenei autasi i fuafuaga i ona soo, auā na ia tatalo e faatatau iā i latou: “Ua ou tuuina atu foʻi iā i latou le mamalu na e tuuina mai iā te aʻu, ina ia tasi i latou e pei ona tasi i taʻua.”—Ioane 17:22, 23.

^ pala. 8 O se faaaʻoaʻoga, i le mataupu e uiga i le Taj Mahal ua faapea mai le Encyclopædia Britannica: “Na fausia e le emeperoa o Mughal po o Shah Jahān.” Ua faaopoopo mai le mataupu, ae na te leʻi faatinoina le fausiaina ae e “silia ma le 20,000 tagata faigaluega na faafaigaluega ai” i le fausiaina.

Faitau Atili

O ā Mea e Manaʻomia Ona E Faia Ina ia Malamalama ai i le Tusi Paia?

E tusa po o lē a lava lou talaaga, e mafai ona e malamalama i le feʻau a le Atua o loo i le Tusi Paia.