Skip to content

Skip to secondary menu

Molimau a Ieova

Faa-Samoa

O le ā le Uiga o le Toe Fanau Mai?

O le ā le Uiga o le Toe Fanau Mai?

Tali a le Tusi Paia

O le faaupuga “toe fanau mai” e faasino atu i se amataga fou i le faiā a le Atua ma le tagata ua toe fanau mai. (Ioane 3:3, 7) E vaetamaina e le Atua i latou ua toe fanau mai e avea ma ana fanau. (Roma 8:15, 16; Kalatia 4:5; 1 Ioane 3:1) E tai pei lava o i latou e vaetamaina faaletulafono, e faapena foʻi ē ua toe fanau mai, e suia o latou tulaga ma avea ai o se vaega o le aiga o le Atua.2 Korinito 6:18.

Aiseā e toe fanau mai ai se tasi?

Na fetalai Iesu: “Afai e lē toe fanau mai se tasi, e lē mafai ona ia iloa le malo o le Atua.” (Ioane 3:3) O lea, o le toe fanau mai o se tasi e sauniunia ai o ia e pule faatasi ma Keriso i le Malo o le Atua. O lea Malo e pule mai i le lagi, o le māfuaaga lea ua faamatalaina ai i le Tusi Paia le “fanaufouina” e peiseaʻī ua tuuina mai se tofi o loo ‘taofia i le lagi.’ (1 Peteru 1:3, 4) E talitonu maumauaʻi i latou ua toe fanau mai, o le a latou “pule faatasi o ni tupu” ma Keriso.2 Timoteo 2:12; 2 Korinito 1:21, 22.

E faapefea ona toe fanau mai se tasi?

Ina ua faamatalaina e Iesu lenā mataupu, na ia taʻua ai o i latou e toe fanau mai, e ‘toe fanau i le vai ma le agaga.’ (Ioane 3:5) E faasino atu lenā faaupuga i le papatisoga i le vai, mulimuli ane ona papatisoina lea i le agaga paia.Galuega 1:5; 2:1-4.

O Iesu le tagata na muamua toe fanau mai. Na papatisoina o ia i le vaitafe o Ioritana lea na mulimuli ane faauuina (pe papatisoina) ai o ia e le Atua i le agaga paia. O lea, na toe fanau mai Iesu o se atalii faaleagaga o le Atua ma le faamoemoe e toetū aʻe i le lagi. (Mareko 1:9-11) Na faataunuu e le Atua lenā faamoemoe e ala i le toe faatūina aʻe o Iesu o se foafoaga agaga.Galuega 13:33.

O isi e toe fanau mai, e papatisoina foʻi i le vai a o leʻi mauaina le agaga paia. * (Galuega 2:38, 41) Ona latou mautinoa ai lea i lo latou faamoemoe o le ola i le lagi, lea o le a faataunuuina e le Atua i le toetū.1 Korinito 15:42-49.

Faamatalaga sesē e uiga i le toe fanau mai

Faamatalaga sesē: E tatau ona toe fanau mai se tasi ina ia maua le faaolataga, pe ina ia avea ai o se Kerisiano.

Mea moni: O le taulaga a Keriso, ua saunia ai le faaolataga e lē gata mo i latou e toe fanau mai o ni ē e pule faatasi ma Keriso i le lagi, ae mo i latou foʻi o le a avea ma tagatānuu o le Malo o le Atua i le lalolagi. (1 Ioane 2:1, 2; Faaaliga 5:9, 10) E maua e lenā vaega lona lua o Kerisiano le avanoa e ola ai e faavavau i le Parataiso i le lalolagi.Salamo 37:29; Mataio 6:9, 10; Faaaliga 21:1-5.

Faamatalaga sesē: E mafai e se tasi ona filifili pe toe fanau mai.

Mea moni: E mafai e so o se tasi ona iai se faiā ma le Atua ma maua le faaolataga. (1 Timoteo 2:3, 4; Iakopo 4:8) Peitaʻi, e filifilia e le Atua i latou e toe fanau mai pe faauuina i le agaga paia. E tusa ai ma le faamatalaga a le Tusi Paia, o le toe fanau mai “e lē faalagolago i le tagata e manaʻo, po o lē e tamoʻe, ae e faalagolago i le Atua.” (Roma 9:16) O le faaupuga “toe fanau mai” e mafai foʻi ona faaliliuina fanau mai i lugā, e faamaonia ai o le filifilia o i latou e toe fanau mai, e mai i lugā pe mai i le Atua.Ioane 3:3.

^ pala. 9 Ae e ese mai ai Konelio ma i latou na faatasi ma ia.Galuega 10:44-48.

Faitau Atili

O Ā AʻOAʻOGA MONI A LE TUSI PAIA

Le Papatisoga ma la Oulua Faiā ma le Atua

O ā laasaga e manaʻomia ina ia agavaa ai i le papatisoga faa-­Kerisiano? Iloilo po o le ā e faaāta mai e le papatisoga faa-­Kerisiano ma le auala e faia ai.

O Ā AʻOAʻOGA MONI A LE TUSI PAIA

O le Togiola o le Meaalofa Sili Lea a le Atua

O le ā le togiola? E faapefea ona e maua mai ai aogā?

O Ā AʻOAʻOGA MONI A LE TUSI PAIA

O le ā le Malo o le Atua?

E iloa e le toʻatele le Tatalo a le Alii. O le ā le uiga o le faaupuga: “Ia oo mai lou malo”?