Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

O le ā le Uiga o le 666?

O le ā le Uiga o le 666?

Tali a le Tusi Paia

E tusa ma le faamatalaga a le tusi mulimuli o le Tusi Paia, o le 666 o le numera po o le igoa o le manufeʻai e fitu ulu ma seu e sefulu e alu aʻe mai i le sami. (Faaaliga 13:1, 17, 18) O lenei manufeʻai, o le faailoga lea o faigāmalo faapolotiki a le lalolagi, ia o loo pulea “ituaiga, ma tagata, ma gagana, ma atunuu uma.” (Faaaliga 13:7) Ua faaalia e le numera 666 le matuā lē taulau o faigāmalo faapolotiki i le silafaga a le Atua. I le ā le itu?

E lē na o se igoa. E iai uiga o igoa e aumaia e le Atua. O se faaaʻoaʻoga, na avatu e le Atua iā Aperamo, o lona uiga “Tamā o le Olioli,” le igoa o Aperaamo, o lona uiga “Tamā o le Toʻatele,” ina ua ia folafola atu iā Aperaamo e na te faia o ia e avea ma “tamā o nuu e tele.” (Kenese 17:5, faaopoopoga i lalo) I se tulaga talitutusa, na faaigoa e le Atua le manufeʻai i le 666, o se faailoga e faamatala ai uiga o le manufeʻai.

Ua faaalia e le numera ono le lē lelei atoatoa. I le Tusi Paia, e masani ona faaaogā fuainumera e fai ma faailoga. Ua faaata mai e le numera fitu se mea atoa, po o le lelei atoatoa. O le numera ono, e tasi e itiiti ai i le numera fitu, o lona uiga o se mea lē atoa pe lē lelei atoatoa i le silafaga a le Atua, ma e mafai ona fesootaʻi atu i fili o le Atua.1 Nofoaiga a Tupu 20:6; Tanielu 3:1.

Faatolu ina ia faamamafa. O nisi taimi e faamamafa e le Tusi Paia se mea e ala i le taʻua faatolu. (Faaaliga 4:8; 8:13) O lea la, o le fuainumera 666 e matuā faamamafa mai ai, e silasila le Atua i faigāmalo faapolotiki a tagata ua matuā lē taulau. E lē mafai ona latou aumaia le filemu ma le saogalemu tumau. Ua na o le Malo o le Atua e mafai ona faia faapea.

Le faailoga o le manufeʻai

Ua taʻua i le Tusi Paia ua iai i tagata “le faailoga o le manufeʻai,” auā ua latou mulimuli ma “vivii” atu i ai, ma iʻu lava ina tapuaʻi atu i ai. (Faaaliga 13:3, 4; 16:2) Ua latou faia faapea e ala i le faamamaluina ma viiviia o latou atunuu, o a latou faailoga tauave, po o vaegaʻau. Ua faamatalaina i le The Encyclopedia of Religion: “Ua taatele le lotonuu i le tele o tapuaʻiga i le lalolagi.” *

E faapefea ona tuu le faailoga o le manufeʻai i le lima taumatau po o le muāulu o se tasi? (Faaaliga 13:16) E tusa ai ma le poloaʻiga a le Atua i le nuu o Isaraelu, na fetalai o ia: “Ia e fusi i ia mea i lou lima e fai ma faailoga, ia fai foʻi ma fusi i lou muāulu.” (Teuteronome 11:18) E leʻi uiga atu i le faailogaina moni e Isaraelu o o latou lima ma muāulu, ae e uiga atu i le taʻitaʻia o a latou gaoioiga ma manatu e le afioga a le Atua. I se tulaga talitutusa, nai lo le tāina o le faailoga o le 666 e pei o se peʻa, o lenei faailoga o le manufeʻai, e faaāta mai ai i se uiga faafaatusa ē ua lotomalilie e pulea o latou olaga e faigāmalo faapolotiki. O i latou e iai le faailoga o le manufeʻai, e tetee i le Atua.Faaaliga 14:9, 10; 19:19-21.

^ pala. 8 Tagaʻi foʻi i tusi Nationalism in a Global Era, itulau 134, ma le Nationalism and the Mind: Essays on Modern Culture, itulau 94.