Skip to content

Skip to secondary menu

Molimau a Ieova

Faa-Samoa

O le ā le Papatisoga?

O le ā le Papatisoga?

Tali a le Tusi Paia

O le papatisoga, e faasino atu i le faatofu atoa o le tino i le vai ma toe ea aʻe mai i le vai. * Ua manino mai ai le māfuaaga na papatisoina ai Iesu i se vai telē. (Mataio 3:​13, 16 ) I se tulaga talitutusa, na talosaga atu se tamāloa Aitiope e papatisoina o ia ina ua tau atu i “le vai.”​—Galuega 8:​36-​40.

Le uiga o le papatisoga

Ua faatusaina i le Tusi Paia le papatisoga i le tanuina o se tasi ua maliu. (Roma 6:4; Kolose 2:​12) O le papatisoga i le vai e faailogaina ai le lafoaʻia e se tasi o lona olaga sa iai muamua, ae amata se olaga fou o se Kerisiano ua tuuina atu i le Atua. O le papatisoga ma laasaga e oo atu i ai, o le faatulagaga lea a le Atua mo se tasi ina ia maua ai se lotofuatiaifo mamā, e faavae i lona faatuatua i le taulaga a Iesu Keriso. (1 Peteru 3:​21) O le māfuaaga lea na aʻoaʻo atu ai Iesu, e tatau ona papatiso ona soo.​—Mataio 28:19, 20.

Pe e aveesea e le papatisoga i le vai agasala?

E leai. Ua aʻoaʻoina i le Tusi Paia e na o le toto maligi o Iesu e mafai ona faamamāina ai i tatou mai i le agasala. (Roma 5:​8, 9; 1 Ioane 1:7) Peitaʻi, ina ia maua aogā mai i le taulaga a Iesu, e tatau i se tasi ona faaalia le faatuatua iā Iesu, suia le auala e ola ai ina ia ōgatusa ma aʻoaʻoga a Iesu, ma papatisoina o ia.​—Galuega 2:​38; 3:​19.

O le ā le uiga o le papatisoina o pepe?

E lē o taʻua i le Tusi Paia le aʻoaʻoga o le papatisoina o pepe. E faia e nisi o lotu se sauniga lea e papatisoina ai se pepe (e ala i le faatulutulu po o le liligi o le vai i lona ulu) ma faaigoa o ia.

Pe o aʻoaʻoina i le Tusi Paia le papatisoina o pepe?

E leai. O le papatisoga o Kerisiano, e mo na o i latou ua mafai ona malamalama ma talitonu i “le tala lelei o le malo o le Atua.” (Galuega 8:​12) E fesootaʻi atu lenā i le faalogo i le Afioga a le Atua, taliaina ma salamō; o ni gaoioiga e lē mafai ona faia e se pepe.​—Galuega 2:​22, 38, 41.

Ua faailoa mai foʻi i le Tusi Paia e silasila le Atua i fanau a Kerisiano e paia pe mamā, ona o le faamaoni o o latou mātua. (1 Korinito 7:​14) Pe ana faapea e aʻoaʻoina i le Tusi Paia le papatisoina o pepe, semanū la e lē manaʻomia ona faamaoni pea mātua. *

Faamatalaga sesē e uiga i le papatisoga o Kerisiano

Faamatalaga sesē: O le faatulutulu po o le liligiina o le vai i luga o le ulu o se tasi, o se gaoioiga talafeagai lea e suia ai le faatofu atoa o le tino i le vai.

Mea moni: Sa aofia i papatisoga uma o loo taʻua i le Tusi Paia, le faatofu atoa o le tino i le vai. O se faataʻitaʻiga, ina ua papatisoina e le soo o Filipi le tamāloa Aitiope, na ‘⁠la ō ifo uma i le vai’ mo le papatisoga. Mulimuli ane, ona ‘⁠la ō aʻe lea mai i le vai.’​—Galuega 8:​36-​39. *

Faamatalaga sesē: Ua faaalia i le Tusi Paia pe a papatisoina sui uma o se aiga, na aofia ai foʻi ma pepe. O se faataʻitaʻiga, o loo faamatalaina se pule o le falepuipui i Filipi e faapea: ‘⁠Na papatisoina o ia ma lona aiga atoa.’​—Galuega 16:31-​34.

Mea moni: O le tala e faatatau i le avea o le pule o le falepuipui ma Kerisiano, ua faaalia ai o ē na papatiso sa malamalama i “le afioga a Ieova” ma na latou “matuā olioli.” (Galuega 16:32, 34) O na faamatalaga moni ua faamaonia ai o pepe uma lava na iai i le aiga o le pule o le falepuipui, e leʻi papatisoina, talu ai e latou te leʻi malamalama i le afioga a Ieova.

Faamatalaga sesē: Na aʻoaʻo atu Iesu e faatatau i le papatisoina o pepe, e ala i le fetalai e fai le Malo mo tamaiti.​—Mataio 19:13-​15; Mareko 10:13-​16.

Mea moni: Ina ua taʻua e Iesu na upu, e leʻi faasino atu i le papatisoga. Nai lo o lea, sa ia faailoa mai o i latou e agavaa mo le Malo o le Atua e tatau ona pei o tamaiti, e agamalu ma aʻoaʻogofie.​—Mataio 18:4; Luka 18:16, 17.

^ pala. 3 O le upu Eleni ua faaliliuina “papatisoga” e sau mai i le upu o lona uiga o le “lolō i lalo.” Tagaʻi i le Theological Dictionary of the New Testament, Tusi I, itulau e 529.

^ pala. 12 Ua faamatalaina i le The International Standard Bible Encyclopedia, “e lē o taʻua i le N[ew] T[estament] le papatisoina o pepe.” Ua faamatalaina ai foʻi o le papatisoina o pepe na māfua mai “i se manatu ma se masalosaloga sesē e faatatau i le tāua o le papatisoga,” e faapea o le papatisoga e aveesea ai agasala.​—Tusi 1, itulau e 416-​417.

^ pala. 15 I lalo o le ulutala “Baptism (in the Bible),” ua faapea mai le New Catholic Encyclopedia: “Ua manino mai o le auala sa faia ai papatisoga i le Lotu anamua sa faatofu atoa le tino i le vai.”—Tusi 2, itulau e 59.

Faitau Atili

O Ā AʻOAʻOGA MONI A LE TUSI PAIA

Le Papatisoga ma la Oulua Faiā ma le Atua

O ā laasaga e manaʻomia ina ia agavaa ai i le papatisoga faa-­Kerisiano? Iloilo po o le ā e faaāta mai e le papatisoga faa-­Kerisiano ma le auala e faia ai.