Skip to content

Skip to secondary menu

Molimau a Ieova

Faa-Samoa

O le ā le Manatu o le Tusi Paia i Ata Matagā Tau Feusuaʻiga? Pe e leaga le Cybersex?

O le ā le Manatu o le Tusi Paia i Ata Matagā Tau Feusuaʻiga? Pe e leaga le Cybersex?

Tali a le Tusi Paia

E lē o taʻua patino i le Tusi Paia ata matagā tau feusuaʻiga, le faia o feusuaʻiga e ala i upu ma ata matagā i le Initaneti (cybersex), po o isi gaoioiga faapena. Peitaʻi, ua taʻua manino i le Tusi Paia le finagalo o le Atua e faatatau i amioga e uunaʻia ai le faia o feusuaʻiga i fafo o le liʻo o le faaipoipoga, ma le iai o se vaaiga sesē i feusuaʻiga. Ia iloilo mau nei o le Tusi Paia:

  • “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga.” (Kolose 3:5) O le matamata i ata matagā tau feusuaʻiga, e atili faagaee ai tuʻinanauga sesē, nai lo o le fasiotia ai. E lē mamā ai se tasi i le silafaga a le Atua.

  • “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mataio 5:28) O ata tau feusuaʻiga lē mamā, e faapogaia atili ai mafaufauga sesē, ia e taʻitaʻia atu ai i le faia o gaoioiga sesē.

  • “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou.” (Efeso 5:3) E lē tatau ona fai ma a tatou mea fiafia le talanoa i feusuaʻiga lē mamā, e oo lava i le matamata po o le faitau i ai.

  • “Ua faaalia galuega a le tino, o le faitaaga, o le amio lē mamā, . . . ma mea faapena. Ou te muaʻi lapataʻia outou e tusa ai ma nei mea, e pei ona ou muaʻi lapataʻia outou. O ē o loo faia mea faapena, e lē fai le malo o le Atua mo o latou tofi.” (Kalatia 5:19-21) E silasila le Atua iā i latou o ē matamata i ata matagā tau feusuaʻiga ma faia feusuaʻiga i luga o le initaneti, po o le telefoni (sexting), e lē mamā a latou amioga. Pe afai o la tatou masani le faia o na mea, e tatou te lē maua ai le finagalo malie o le Atua.