Skip to content

Skip to secondary menu

Molimau a Ieova

Faa-Samoa

E Faapefea Ona Ou Iloa le Tapuaʻiga Moni?

E Faapefea Ona Ou Iloa le Tapuaʻiga Moni?

Tali a le Tusi Paia

Ina ia faataʻitaʻi le eseesega o i latou e iai i le tapuaʻiga moni ma i latou e i tapuaʻiga sesē, ua faapea mai le Tusi Paia: “Tou te iloa i latou i o latou fua. Pe e mafai ea e tagata ona tau mai fua o le vine mai laau tuitui, po o fua o le mati mai laau talatala?” (Mataio 7:16) E pei lava ona mafai ona e iloa le eseesega o le laau o le vine mai i se laau tuitui i ona fua, e mafai foʻi ona e iloa le eseesega o le tapuaʻiga moni mai i tapuaʻiga sesē i fua e latou te fuaina mai, po o vala nei o loo mulimuli mai.

  1. E aʻoaʻo e le tapuaʻiga moni le upu moni e faavae mai i le Tusi Paia ae e lē o manatu o tagata. (Ioane 4:24; 17:17) E aofia ai aʻoaʻoga moni e faatatau i le ola ma le faamoemoe o le ola e faavavau i se lalolagi parataiso. (Salamo 37:29; Isaia 35:5, 6; Esekielu 18:4) E faaalialia foʻi e le tapuaʻiga moni aʻoaʻoga sesē a lotu.—Mataio 15:9; 23:27, 28.

  2. E fesoasoani le tapuaʻiga moni i tagata ina ia iloa le Atua, e aofia ai le aʻoaʻoina o i latou e faatatau i lona suafa, o Ieova. (Salamo 83:18; Isaia 42:8; Ioane 17:3, 6) Ae e lē o aʻoaʻoina ai e faigatā ona malamalama i le Atua pe e lē manatu mamafa mai o ia; nai lo o lea, o loo aʻoaʻoina i le tapuaʻiga moni e finagalo o ia ina ia iai sa tatou faiā ma ia.—Iakopo 4:8.

  3. E faatāua e le tapuaʻiga moni Iesu Keriso o lē e ala mai ai le faaolataga mai i le Atua. (Galuega 4:10, 12) E usiusitaʻi ona tagata tapuaʻi i poloaʻiga a Iesu ma taumafai malosi ina ia mulimulituʻi i lana faaaʻoaʻoga.—Ioane 13:15; 15:14.

  4. E taulaʻi atu le tapuaʻiga moni i le Malo o le Atua e na o le pau lea o le faamoemoe mo tagata. E talaʻi atu ma le maelega e ona tagata tapuaʻi i isi lenā Malo.—Mataio 10:7; 24:14.

  5. E faalaeiauina e le tapuaʻiga moni tagata ina ia alolofa i isi e aunoa ma le faatalitalia e toe maua mai ai ni mea. (Ioane 13:35) E aʻoaʻoina ai ina ia faatāua ituaiga uma o tagata, ma ia talia tagata mai i ituaiga, aganuu, gagana, ma talaaga uma. (Galuega 10:34, 35) Talu ai e fealofani ona tagata tapuaʻi, e latou te lē auai la i taua.—Mika 4:3; 1 Ioane 3:11, 12.

  6. O le tapuaʻiga moni e lē totogia ni a latou faifeʻau, ma e lē ave foʻi i ai ni taʻu faaaloalo faalelotu.—Mataio 23:8-12; 1 Peteru 5:2, 3.

  7. E matuā leai se vaega a le tapuaʻiga moni i faiga faapolotiki. (Ioane 17:16; 18:36) Peitaʻi e faaaloalo ma usiusitaʻi ona tagata tapuaʻi i faigāmalo a atunuu o loo latou nonofo ai, lea e ōgatusa ma le poloaʻiga a le Tusi Paia: “Ia totogi atu mea a Kaisara iā Kaisara [faaāta mai ai pulega a malo], a o mea a le Atua ia avatu i le Atua.”—Mareko 12:17; Roma 13:1, 2.

  8. O le tapuaʻiga moni e aafia ai le auala e tatou te ola ai, ae e lē na o se mea e tau ina fai. E tausisia e ona tagata tapuaʻi tapulaa tauamio maualuluga a le Tusi Paia i so o se vala lava o le olaga. (Efeso 5:3-5; 1 Ioane 3:18) Nai lo o le faanoanoa, ae e latou te maua le fiafia i le tapuaʻi atu i “le Atua fiafia.”—1 Timoteo 1:11.

  9. E toʻaitiiti i latou e iai i le tapuaʻiga moni. (Mataio 7:13, 14) E masani ona vaai maulalo i ona tagata tapuaʻi, ulagia, ma sauāina i latou ona o le faia o le finagalo o le Atua.—Mataio 5:10-12.

Ou te lagona o le tapuaʻiga moni e lē ‘⁠o le tapuaʻiga lea mo aʻu’

E iai le itu e lē lelei ai le filifili o se tapuaʻiga e fua i o tatou faalogona. Na valoia i le Tusi Paia le taimi e ‘⁠aoaoina ai e tagata ia aʻoaʻo faalelotu ina ia faalogo o latou taliga i mea e logolelei iā i latou lava.’ (2 Timoteo 4:3) I se faaeseesega, ua faalaeiauina i tatou e le Tusi Paia ina ia mulimuli i ‘⁠le tapuaʻiga e mamā ma lē taʻuleagaina i le silafaga a le Atua lo tatou Tamā,’ e tusa pe e lē fiafia i ai le toʻatele.—Iakopo 1:27; Ioane 15:18, 19.