Skip to content

Skip to secondary menu

Molimau a Ieova

Faa-Samoa

O le ā le Manatu o le Tusi Paia i le Tāina o Peʻa i le Tino?

O le ā le Manatu o le Tusi Paia i le Tāina o Peʻa i le Tino?

Tali a le Tusi Paia

E faatasi ona taʻua i le Tusi Paia le tāina o peʻa i le Levitiko 19:28 lea o loo faapea mai: ‘⁠Aua tou te tā se peʻa i o outou tino.’ Na tuuina atu e le Atua lenei faatonuga i le nuu o Isaraelu, lea na faaesea ai i latou mai i nuu tuaoi o ē na tāina i o latou tino igoa po o faailoga o o latou atua. (Teuteronome 14:2) E ui lava e lē o ola Kerisiano i le Tulafono na tuuina atu i le nuu o Isaraelu, ae e tāua ona iloilo totoʻa le mataupu silisili o loo faavae ai lenei tulafono.

Pe e tatau i se Kerisiano ona tā sana peʻa?

E mafai ona fesoasoani iā te oe mau o le Tusi Paia o loo mulimuli mai, e te fefulifulisaʻi ai i lea mataupu:

  • “Ia teuteu [fafine] iā i latou . . . ia onomea.” (1 Timoteo 2:9) E faatatau atu lenā mataupu silisili i fafine ma tamāloloa. E tatau ona tatou manatu mamafa i faalogona o isi, ma lē soona faauaʻi mai isi iā i tatou.

  • E mananaʻo isi e tā a latou peʻa ina ia mātauina ai i latou, ae e faia e isi e faailoa atu ai e pule lava i latou i o latou tino. Peitaʻi ua faalaeiauina e le Tusi Paia Kerisiano: “Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.” (Roma 12:1) Ia faaaogā le “mafaufau lelei” e iloilo ai pe aiseā e te manaʻo ai e tā sau peʻa. Afai o le māfuaaga ona e te fia faataʻitaʻi i se āʻega pe faailoa atu ai o loo e iai i se vaega patino o tagata, ia manatua e ono toe suia lou mafaufau i se taimi mulimuli ane, ae e lē mafai ona toe aveesea le peʻa na tāina. O le iloiloina o māfuaaga e te manaʻo ai e tā sau peʻa, e mafai ona fesoasoani iā te oe e fai ai se filifiliga atamai.—Faataoto 4:7.

  • “O i latou e faataalise ona faia mea e iʻu ai i le mativa.” (Faataoto 21:5) O le filifiliga ina ia tā se peʻa e masani lava ona vave ona fai, peitaʻi e iai sona aafiaga tumau i faiā faaletagata ma galuega. E tele foʻi tupe e alu i le tāina o se peʻa ma e tigā pe a aveese. Ua faaalia i suʻesuʻega, faapea pisinisi ua taulau i le aveesea o peʻa mai i le tino, o le toʻatele o i latou na tā a latou peʻa e toe salamō mulimuli ane.