Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

O le ā le Manatu o le Tusi Paia i le Tauatane?

O le ā le Manatu o le Tusi Paia i le Tauatane?

Tali a le Tusi Paia

Na foafoaina e le Atua le tagata ma le fuafuaga e faatoʻā mafai lava ona feusuaʻi pe a faaipoipo se tane ma se avā. (Kenese 1:27, 28; Levitiko 18:22; Faataoto 5:18, 19) Ua taʻusalaina i le Tusi Paia feusuaʻiga e faia e ni tagata e leʻi faaipoipo, e tusa pe i le va o le itupā e tasi, po o le va foʻi o se tama ma se teine e leʻi faaipoipo. (1 Korinito 6:18) E aofia ai le faia o feusuaʻiga, loteina o totogasā o se isi tagata, ma le faia o feusuaʻiga e faaaogā ai le fofoga ma le maliuga.

E ui e taʻusalaina i le Tusi Paia amioga tauatane, ae e lē faatagaina foʻi e le Tusi Paia lo tatou ʻinoʻino i tagata tauatane. Nai lo lea, ua faatonuina Kerisiano uma ina “ia āva i ituaiga uma o tagata.”1 Peteru 2:17, Good News Translation.

Pe e mafai ona fanau mai se tasi e tauatane?

E lē o taʻua patino mai i le Tusi Paia se māfuaaga faalenatura o le iai o tuʻinanauga faatauatane, ae o loo taʻua ai ua tatou fananau uma mai ma se faanaunauga lē lelei ina ia solia poloaʻiga a le Atua. (Roma 7:21-25) Nai lo le uaʻi atu i le pogai o le iai o faanaunauga tauatane, o loo faasā mai i le Tusi Paia amioga tauatane.

Le auala e faafiafia ai le Atua e ui i le iai o ni faanaunauga faatauatane.

Ua faapea mai le Tusi Paia: “Aua neʻi pulea oe e lou tino. Ia fasiotia ituaiga faanaunauga uma i le faia o feusuaʻiga e lē talafeagai.” (Kolose 3:5, Contemporary English Version) Ina ia fasiotia faanaunauga sesē ia e taʻitaʻia atu ai i gaoioiga sesē, e manaʻomia ona pulea ou manatunatuga. Pe afai e faatumu pea lou mafaufau i mea aogā, o le a aveesea ai faanaunauga sesē. (Filipi 4:8; Iakopo 1:14, 15) Atonu e lē faigofie i le taimi muamua, ae mulimuli ane o le a oo ina faigofie. Ua folafola mai e le Atua o le a fesoasoani mai ina ia “faafouina le malosi e pulea ai o outou mafaufau.”Efeso 4:22-24.

O le tulaga faigatā lava lenā e tasi, o loo feagai ma le faitau miliona o ē e iai faanaunauga e tosina atu i le isi itupā, ma o loo mananaʻo e ola e ōgatusa ma tapulaa a le Tusi Paia. O se faaaʻoaʻoga, e iai ē nofofua e faigatā ona maua se paaga faaipoipo, po o ē ua faaipoipo ae ua maʻi lona toʻalua ma ua lē mafai ona faia ni feusuaʻiga. Peitaʻi, ua filifili e pulea o latou faanaunauga fia feusuaʻi, e tusa po o ā faaosoosoga e latou te fesagaʻia. O loo mafai ona ola fiafia i latou nei, ma e mafai foʻi e i latou e iai faanaunauga e tosina i le itupā e tasi ona maua le fiafia, pe afai e mananaʻo moni e faafiafia le finagalo o le Atua.Teuteronome 30:19.