Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

UA FESILI MAI TALAVOU

Po ua Talafeagai Ona Ou Faia se Tuugātala?

Po ua Talafeagai Ona Ou Faia se Tuugātala?

 O le ā le uiga o le faia o se tuugātala?

  • E masani ona lua eva ma se tasi o le isi itupā. Po o oulua feoaʻi ma tuutala?

  • E iai se isi o le isi itupā e te fia uō i ai ma e faapena foʻi o ia iā te oe. E masani ona lua text ma talanoa i le telefoni i aso taʻitasi. Po o oulua feoaʻi ma tuutala?

  • O le tele o taimi e tou te faatasitasi ai ma au uō, e masani ona lua faifaimea ma le tagata lava lea e tasi o le isi itupā. Po o oulua feoaʻi ma tuutala?

Atonu e leʻi faigatā ona e taliina le fesili muamua. Ae atonu na e faatalatū e tali le fesili lona lua ma le tolu. O le ā tonu lava le uiga o le faia o se tuugātala?

O le mea moni, o le faia o se tuugātala e uiga atu i so o se faatasiga faasamasamanoa lea e taulaʻi atu ai ou faalogona alofa i se tasi o le isi itupā, ma e faapena foʻi ona faalogona iā te oe.

O lea, o le tali mo fesili uma e tolu o le, ioe. E tusa pe e te lua talanoa i le telefoni, komepiuta, faafesagaʻi, luma o isi pe faalilolilo, ae afai e iai ni faalogona fetosinaaʻi o le tasi i le isi ma masani ona lua fesootaʻi, o lenā la ua lua feoaʻi pe tuutala.

 O le ā le fuafuaga o le faia o se tuugātala?

E tatau ona iai se fuafuaga mamalu o se tuugātala. E fesoasoani ai i se alii ma se tamaʻitaʻi e filifili pe e mananaʻo e faaipoipo.

O le mea moni, atonu e iai nisi o au uō e manatu māmā i tuugātala. Atonu e latou te fiafia i le tau lava ina faifaimea ma se tasi o le isi itupā, e aunoa ma le faanaunau e faaipoipo. O isi e ono manatu i le iai o se uō, ua na o se mea e mimita ai pe a vāai mai isi tagata.

Peitaʻi, e masani lava o faigāuō faapena e lē tumau. Taʻua e le tamaʻitaʻi o Heather: “O le toʻatele o talavou e faia ni tuugātala, e masani ā ona toe faauma pe a mavae le tasi po o le lua o vaiaso. E manatu i faigāuō e mo na o sina taimi, ma e mafai ona faapea atu e lē o saunia ai i latou ina ia faaipoipo ae na o le teteʻa.”

E manino mai, pe a lua feoaʻi ma se tasi, o lenā la ua aafia faalogona o lenā tagata iā te oe. O lea, ia faamautinoa e saʻo le faanaunauga e te fia uō ai i se tasi.—Luka 6:31.

Afai e te lua uō ma se tasi ae e te lē o faanaunau e faaipoipo i ai, ua pei la oe o se tamaitiiti e taaloalo i se meataalo fou ona toe tiaʻi lea

Mafaufau: Pe e te manaʻo e taaloalo se tasi i ou faalogona, e pei o loo taalo i se meataalo, e na o sina taimi e fiafia i ai ona toe tiaʻi lea? O lea, ia aua e te faia faapea i le isi tagata! Ua taʻua i le Tusi Paia o le alofa “e lē amio valea.”—1 Korinito 13:4, 5.

Ua faapea mai le talavou o Chelsea: “O nisi taimi ou te mafaufau o le faia o se uō ua na o se mea e fiafia ai, ae i le isi itu, e lē manaia foʻi pe afai e uma ane e te alofa i le isi, ae e lē o alofa mai.”

Fesoasoani: Ina ia nofosauni e faia se tuugātala pe faaipoipo, faitau le 2 Peteru 1:5-7 ma filifili se uiga e manaʻomia ona e galue ai. Pe a uma le masina, ia vaai po o ā mea ua e aʻoaʻoina mai i lenā uiga ma pe ua iai se faaleleiga.

 Po ua lava loʻu matua, e faia ai se tuugātala?

  •  O le ā sou manatu, o le ā le matua o se talavou e talafeagai ai ona ia faia se tuugātala?

  •  Ia fai atu le fesili lava lenā i ou mātua.

E mafai ona faapea atu o le a matuā ese lau tali mai i le tali a ou mātua. Pe atonu foʻi e tutusa a outou tali. Atonu o oe o se tasi mai i le toʻatele o talavou, ua filifili ma le poto e lē faia se tuugātala seʻia oo ina matutua ma ua malamalama lelei iā i latou lava.

O le mea lenā na filifili le tamaʻitaʻi o Danielle e 17 tausaga e fai. Fai mai o ia: “Pe a toe tepa i tua i le lua tausaga, e matuā ese lava uiga na ou manaʻo e iai i se tasi e avea ma aʻu tane, mai i uiga ua ou manaʻo ai i le taimi lenei. E oo mai lava i le taimi lenei ou te lē o mautinoa pe mafai ona ou filifilia se tasi e fetaui ona ma uō. E faatoʻā ou mafaufau lava e fai saʻu uō, pe afai ou te manatu ua faaleleia oʻu uiga a o faagasolo tausaga.”

E iai se isi māfuaaga e atamai ai le lē vavevave. O loo faaaogā i le Tusi Paia le faaupuga ‘le malaulau o le talavou,’ e faamatala ai le vaitaimi o le olaga e matuā malolosi ai faalogona tau feusuaʻiga. (1 Korinito 7:36) O le faifaimea pea ma vavalalata ma se tasi o le isi itupā a o iai i le malaulau o le talavou, e atili ai ona malolosi faalogona tau feusuaʻiga ma iʻu ai i le faia o amioga sesē.

Atonu e lē tāua na manatu i au uō, ma atonu o le toʻatele o latou e naunau e faia feusuaʻiga. Peitaʻi, e mafai ma e tatau ona e ʻalofia na ituaiga o mafaufauga. (Roma 12:2) Ua apoapoaʻi mai le Tusi Paia ina ia “sosola ese i le faitaaga,” po o feusuaʻiga lē mamā uma. (1 Korinito 6:18) O le faatalitali seʻia teʻa le malaulau o le talavou, e mafai ai ona ‘puipuia oe mai i mala.’—Failauga 11:10.

 Aiseā e ao ai ona faatali, ae aua le vavevave?

O le tauanau e faia se uō ae e leʻi sauni, e tai pei o le faamalosia e suʻe se suʻega i se mataupu e leʻi leva ona e aʻoaʻoina. O le mea moni, e lē fetaui lenā tulaga! E manaʻomia ona e faaalu le taimi e saʻiliʻili atili ai i le mataupu, ina ia e masani lelei i ituaiga faigatā o le a e fesagaʻia pe a suʻe le suʻega.

E faapena foʻi le faia o se tuugātala.

E lē tatau ona manatu māmā i ai. O lea, a o leʻi faia sau uō, e manaʻomia ona e faaalu se taimi e saʻiliʻili muamua ai i le auala e atiaʻe ai faauōga.

Mulimuli ane e feiloaʻi i se tasi e talafeagai ma oe, a o lenā ua e malamalama i le auala e atiaʻe ai se faauōga tumau. Ia manatua, o se faaipoipoga taulau manuia e faia aʻe i ni uō lelei se toʻalua ua tuufaatasia.

O le faatali teisi, e lē faapea ai ua leai sou saʻolotoga. Ae o le mea moni, e te maua ai le tele o le saʻolotoga e ‘olioli ai i lou talavou.’ (Failauga 11:9) E te maua ai foʻi le taimi e sauniuni ai oe lava ia, e ala i le faaleleia o ou uiga, aemaise lou itu faaleagaga.—Auega 3:27.

I le taimi e tasi, e mafai ona e olioli i le faifaimea faatasi ma isi o le isi itupā. O le ā le auala sili e faia ai faapea? Ia faifaimea faatasi a o iai ma isi tagata matutua maufaatuatuaina. Ua taʻua e le tamaʻitaʻi o Tammy: “E sili atu ona manaia pe a faifaimea ma le toʻatele o uō.” O le manatu foʻi lenā o Monika: “O se mea lelei le faatasitasi ma se vaega toʻatele, auā e te faamasani ai i tagata e eseese o latou uiga.”

I se faaeseesega, pe a vave ona fai sau uō, o le a e iʻu atu i le tele o mea e tigā ai. O lea, aua le vavevave. Faaaogā le taimi lenei o lou olaga e aʻoaʻo ai le auala e atiaʻe ma faatumauina ai faauōga. Mulimuli ane pe afai e te filifilia sau uō, ae ua e malamalama lelei i le ituaiga tagata e iai oe, faapea uiga e te manaʻo e iai i se tasi e avea ma au paaga i le olaga atoa.