Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

Pe e Tatau Ona Ou Lē Toe Aʻoga?

Pe e Tatau Ona Ou Lē Toe Aʻoga?

O mea nei e ao ona e mafaufau i ai

O le ā le tulafono i lou atunuu i le vasega faatulagaina e gata ai aʻoaʻoga? Po ua e oo i lenā vasega faatulagaina? Pe a e lē amanaʻia le fautuaga a le Tusi Paia ia ‘gauaʻi i faipule silisili,’ ma lē toe aʻoga a o leʻi oo i lenā vasega, ua e musu la.—Roma 13:1.

Po ua ausia ou sini faaleaʻoaʻoga? O ā sini e te manaʻo ia ausia i au aʻoaʻoga? Pe afai e te lē o mautinoa, e ao ona e iloa po o ā ou sini. Auā a leai, ua pei oe o se tagata o loo malaga i se nofoaafi ae e lē iloa po o fea e fia alu i ai. O lea, ia talanoa ma iloilo faatasi ma ou mātua le vaega o loo i le ulutala “ O Oʻu Sini Faaleaʻoaʻoga.” Pe afai e te lē toe aʻoga ae e te leʻi ausia sini faaleaʻoaʻoga ua tou filifili i ai ma ou mātua, ua e musu la.

O le musu e toe alu i le aʻoga ua pei lenā o le oso ese mai i se nofoaafi a o leʻi oo i le nofoaga e te alu i ai

Aiseā ua e manatu ai e te lē toe aʻoga? O nisi o māfuaaga atonu ina ia e fesoasoani i le tausiga o lou aiga i le itu tau tupe, pe ina ia e auai i ni galuega tauofo. Ae o māfuaaga manatu faapito, atonu ina ia lē toe suʻeina ni suʻega pe fai ni meaaʻoga. O le luʻi, o le iloa lea o le māfuaaga autū ua e lē toe fia aʻoga ai, pe faamata o se māfuaaga tāua pe e manatu faapito. Pe afai e pau le māfuaaga e te lē toe aʻoga ai ina ia sola mai i faafitauli, o le a tele atu la isi faafitauli o le a e fesagaʻia.

O le lē toe aʻoga e faatusaina i le oso ese mai i se nofoaafi a o leʻi oo i le nofoaga e te alu i ai. Atonu e lē lelei le nofoaafi ma e lē faaleuō le pasese, ae afai e te oso ese mai ai, o le a e lē taunuu la i le nofoaga e tatau ona e alu i ai, ma atonu o le a e iʻu ai i ni manuʻaga tugā. I se tulaga talitutusa, pe afai e te musu e toe alu i le aʻoga, o le a faigatā la ona maua sau galuega. Ae afai foʻi e maua, atonu o se galuega e laʻitiiti le totogi nai lo o se galuega e te ono mauaina pe ana faamāeʻa lelei au aʻoga.

Nai lo o le musu la, ia onosaʻi e fesagaʻi ma luʻi i le aʻoga. O le faia faapea, o le a e atiaʻe ai le tumau ma sauniunia lelei ai oe e fesagaʻia foʻi luʻi faapena pe a e faigaluega.

 O Oʻu Sini Faaleaʻoaʻoga

O le aogā autū lava o le tulaga tauaʻoaʻoga, e sauniunia ai oe ina ia saʻili se galuega e fesoasoani e tausia ai oe lava, ma lou aiga atonu o le a mulimuli ane fai. (2 Tesalonia 3:10, 12) Po ua e filifilia po o le ā le ituaiga galuega e te manaʻo i ai, ma pe faapefea i lou taimi i le aʻoga ona fesoasoani e sauniunia ai oe mo lenā galuega? Ina ia e iloa po o fesoasoani lau aʻoga e taʻitaʻia oe i le ala saʻo, ia tali fesili o loo mulimuli mai:

  • O ā mea ou te lelei ai? (O se faataʻitaʻiga, pe e lelei le auala e te feutagaʻi ai ma tagata? Pe e te fiafia e galue i ou lava lima pe toe faaleleia mea? Pe e te lelei i le iloiloina ma le foʻia o faafitauli?)

  • O ā galuega o le a aogā ai mea ia ou te lelei ai?

  • O ā avanoa faigaluega o loo maua i le vaipanoa o loo oʻu nofo ai?

  • O ā mataupu o loo oʻu aveina i le taimi nei e sauniunia ai aʻu mo na galuega?

  • O ā mataupu tau aʻoaʻoga o loo oʻu mauaina i le taimi nei o le a fesoasoani e ausia ai oʻu sini?

Ia manatua, o lou sini ia faauu ma se tomai e mafai ona e faaaogāina. O lea, aua neʻi avea oe ma sē e aʻoga ai pea lava mo se taimi umi, ina ia ʻalofia ai le faatinoina o ou tiute tauave o se tagata matua.