Skip to content

UA FESILI MAI TALAVOU

E Faapefea Ona Ou Talanoa i Oʻu Mātua e Faatatau i a Laʻua Tulafono?

E Faapefea Ona Ou Talanoa i Oʻu Mātua e Faatatau i a Laʻua Tulafono?

“Na matuā fetaui lelei tulafono a oʻu mātua a o 15 oʻu tausaga, ae o lea ua 19, ua tatau la ona tele se saʻolotoga ou te maua.”​—Sylvia.

Pe e tutusa ou faalogona ma Sylvia? Afai o lea, o le a fesoasoani lenei mataupu e tou te talanoa ai ma ou mātua i lenei tulaga.

 Mea e tatau ona e iloa

Ae e te leʻi talanoa i ou mātua e faatatau i a laʻua tulafono, ia iloilo manatu o loo mulimuli mai:

  • O se olaga e aunoa ma ni tulafono e aafia ai i le tele o faafitauli. Seʻi mafaufau i se auala pisi. O le ā e tupu pe a leai ni faailoilo, leai ni molī, ma leai se saosaoa faatulagaina? O tulafono i le fale e pei o tulafono o le auala, e fesoasoani e maua ai se olaga sologa lelei.

  • O tulafono e iloa ai e alolofa ou mātua iā te oe. Pe ana faapea e la te lē faia ni tulafono, o lona uiga e lē popole iā te oe. O ā ituaiga o mātua e iai i laʻua?

E TE SILAFIA? E iai foʻi tulafono mo mātua. A e lē talitonu faitau le Kenese 2:24; Teuteronome 6:6, 7; Efeso 6:4; ma le 1 Timoteo 5:8.

O lea, ae ā pe afai o lenā lava e te manatu e lē fetaui tulafono a ou mātua?

 Mea e mafai ona e faia

Ia mafaufau muamua ae tou te leʻi talanoa. Pe e iloa oe o sē e usitaʻi i tulafono a ou mātua? Afai e leai, e lē o le taimi lelei la lea e te talanoa atu ai. Nai lo o lea, ia taumafai muamua e usitaʻi i tulafono a ou mātua ina ia la maufaatuatuaina ai oe.

Afai e iloa oe o se tagata e usitaʻi i tulafono a ou mātua, ia sauniuni tala e te manaʻo e fai atu iā i laʻua. O le faatulaga muamua lelei o ou manatu, o le a fesoasoani iā te oe e iloilo ai pe e talafeagai lau talosaga. Ona fesili lea i ou mātua e faatulaga se taimi ma se nofoaga e mafai ona tou talanoa faalelei ai. Pe a talanoa ma mātua, ia manatua mea nei:

Ia faaaloalo. O loo faapea mai le Tusi Paia: “O le tali filemu e liliueseina ai le ita.” (Faataoto 15:1) O lea ia manatua: A e finau ma ou mātua pe tuuaʻia i laʻua ona o le lē tonu o a laʻua tulafono, o le a lē sologa lelei la le talanoaga.

“O le tele ou te faaaloalogia ai oʻu mātua, e la te faaaloalogia foʻi aʻu. E faigofie iā matou ona ioe i se manatu pe a faaaloalo le tasi i le isi.”​—Bianca, 19.

Ia faalogo. O loo faapea mai le Tusi Paia, “ia faalogologo lelei tagata uma, ae aua le vave ona tautala.” (Iakopo 1:19.) Ia manatua, o lea e tou te talanoa ma ou mātua, ae e te lē o lauga atu i ai.

“A o tatou tuputupu aʻe, e tatou te ono manatu e sili atu lo tatou iloa nai lo o tatou mātua, ae matuā lē moni lava lenā manatu. E tatau ona tatou taliaina a latou aʻoaʻiga ma fautuaga.”​—Devan, 20.

Ia malamalama i faalogona o mātua. Ia taumafai e malamalama i le auala e vaai ai ou mātua i le mataupu. Ia mulimuli i le fautuaga lenei a le Tusi Paia, “ia vaavaai ma le naunau e lē gata i au lava mea” po o mea e naunau i ai ou mātua.​—Filipi 2:4.

O lē fea o auala nei e maua ai iʻuga lelei?

“Na masani ona ou vaai i oʻu mātua o ni tagata e faatuʻiese nai lo o nisi e fesoasoani iā te aʻu. Ae ua ou iloa nei, na la taumafai e avea i laʻua ma mātua lelei, e pei lava na ou taumafai e avea aʻu ma se tagata matua e maufaatuatuaina. O mea uma na la faia na faavae i le alofa.”​—Iosua, 21.

Fesoasoani e foʻia le faafitauli. O se faaaʻoaʻoga, ua fai nei e ou mātua le tulafono: e la te lē mananaʻo e te alu i le taavale i se faatasitasiga e pe ā ma le itula le mamao. Ia taumafai e iloa le māfuaaga e la te popole ai, po o lou aveina o le taavale po o le faatasitasiga?

  • Afai o lou aveina o le taavale, po o le a suia o la manatu pe a e fai i sau uō e maufaatuatuaina i le aveina o le taavale e te lua ō?

  • Afai o le faatasitasiga, pe e fesoasoani iā i laʻua pe a taʻu i ai tagata o le a iai ma ē e vaaia?

Ia manatua, ia faaaloalo lau talanoa ma ia faalogologo ma le onosaʻi a o talanoa mai ou mātua. Ia faaalia atu e te “āva i lou tamā ma lou tinā” e lē gata i au upu ae faapea i au gaoioiga. (Efeso 6:2, 3) Po o le a suia o la manatu? Atonu. Atonu e leai. Po o le ā lava le la tali mai, e manaʻomia ona e faia mea nei . . .

Ia faaaloalo i le faaiʻuga a ou mātua. E matuā tāua lenei laasaga ae masani lava ona lē amanaʻiaina. Pe a lē faia le mea e te manaʻo i ai ae e finau ma ou mātua, o le a atili ona faigatā ai mo oe i le isi taimi e tou te talanoa ai. I le isi itu, pe a e lotomalie e talia a laʻua fautuaga, e mautinoa o le a telē le avanoa e tuu atu ai e ou mātua le saʻolotoga iā te oe.