Skip to content

UA FESILI MAI TALAVOU

Aiseā e Sesē Soo ai Aʻu Tala e Fai?

Aiseā e Sesē Soo ai Aʻu Tala e Fai?

“O isi taimi e mafai ona ou pulea loʻu laulaufaiva, ae o isi taimi ou te soona tautala e aunoa ma le mafaufau!”​—James.

“Pe a ou popole, ou te tautala e aunoa ma le mafaufau i ai, ae pe a ou toʻa, e sili atu tala e fai nai lo o tala e tatau ona fai. E uma ane, ua sesē aʻu tala e fai.”​—Marie.

Ua faapea mai le Tusi Paia: “O le laulaufaiva o le afi lea” ma “o le afi itiiti e mafai ona mū ai le togāvao telē!” (Iakopo 3:5, 6) Pe e masani ona e aafia i faafitauli ona o au tala e fai? Afai o lea, e mafai ona fesoasoani le mataupu lenei iā te oe.

 Aiseā e sesē ai aʻu tala e fai?

Tulaga lē lelei atoatoa. O loo faapea mai le Tusi Paia: “Auā e sesē i tatou uma i mea e tele. Afai e lē sesē se tasi i lana tautala, o le tagata lea ua lelei atoatoa.” (Iakopo 3:2) O vaivaiga faaletagata e māfua ai ona sesē a tatou gaoioiga e fai, ma e tatou te faia ai foʻi tala sesē pe a tatou tautatala.

“Talu ai e lē lelei atoatoa loʻu mafaufau ma loʻu laulaufaiva, e sesē la pe a ou faapea atu e lelei atoatoa le auala ou te puleaina ai loʻu laulaufaiva.”​—Anna.

Tautala soo. Ua faapea mai le Tusi Paia: “O le tele o upu e lē asa ai ma se mea sesē.” (Faataoto 10:19) O tagata e tautatala soo ma lē faalogologo lelei, e masani ona aafia isi ona o le sesē o a latou tala e fai.

“O tagata e sili ona popoto i totonu o se potu, e masani a e lē o i latou e tautatala. O Iesu o le tagata e pito sili ona poto na ola i le lalolagi, peitaʻi e iai taimi na lē tautala ai.”​—Julia.

Tala uigalua. Ua faapea mai le Tusi Paia: “O le tagata e tautala lē mafaufau, ua pei o le tutuʻi o le pelu.” (Faataoto 12:18) O se faaaʻoaʻoga o le leai o se mafaufau pe a tautala o le faia o tala faatigā ina ia taʻufaatauvaa ai isi. O tagata e faia tala uigalua atonu e faapea mai, “O laʻu tala ula a.” Ae o le faamasiasiina o isi e lē o se mea mālie. Ua taʻua i le Tusi Paia ia tuu ese “upu masoā, atoa foʻi ma mea leaga uma.”​—Efeso 4:31.

“Ou te fia mālie, ma ou te fiafia e fai tala e toē ai isi, o uiga na e iʻu atu ai i le faia o tala uigalua, lea e uma ane ua vevesi ai.”​—Oksana.

O le taimi lava e te fai ai se tala, e lē mafai ona e toe faafoʻia, e tai pei lava o se toothpaste e lē mafai ona e toe faafoʻi i totonu

 Puleaina o le laulaufaiva

O le puleaina o lou laulaufaiva e lē faigofie, ae e mafai ona fesoasoani mataupu silisili o le Tusi Paia. O se faaaʻoaʻoga, seʻi mātau manatu o loo mulimuli mai.

“Ia outou fai ifo i o outou loto . . ma ia fifilemu.”​—Salamo 4:4.

O nisi taimi o le tali atu, o le tali sili lenā. Na faapea mai se teine talavou e igoa iā Laura: “O oʻu faalogona i le taimi ou te ita ai, atonu e lē o oʻu faalogona na i le taimi mulimuli ane. Pe a ou toʻa, ou te lagona le fiafia ona ou te leʻi faia tala na ou manaʻo e fai atu.” O le faatalitali mo ni sina sekone e taofia ai oe mai i le fai atu o ni tala sesē.

“Pe e lē tofotofo ea e le taliga upu e pei ona tofo e le gutu o meaʻai?”​—Iopu 12:11.

E te ʻalofia lou salamō mulimuli ane pe a e mafaufau muamua i tala o le a e faia, e ala i le iloiloina o fesili nei:

  • Pe e moni? Pe e agalelei? Pe e manaʻomia?​—Roma 14:19.

  • O ā ni oʻu faalogona pe fai mai e se isi le tala lea iā te aʻu?​Mataio 7:12.

  • Po o le a ou faaalia ai le faaaloalo i faalogona o le isi tagata?​—Roma 12:10.

  • Po o saʻo le taimi o loo oʻu faia ai le tala?​—Failauga 3:7.

“Ia faia ma le lotomaulalo, i le manatu ua sili isi iā te outou.”​—Filipi 2:3.

O le a fesoasoani lenā fautuaga e te mafaufau ai i mea lelei e faatatau i isi, o le a fesoasoani iā te oe e pulea ai lou laulaufaiva ma mafaufau muamua ae leʻi tautala. E tusa pe e te faapea ua leai se aogā ona ua uma ona e fai atu se tala faatigā, ae o le lotomaulalo e fesoasoani iā te oe e faatoese ai ma ia vave ona fai. (Mataio 5:23, 24) Ia maumauaʻi e pulea lou laulaufaiva.