Alu i mataupu o loo iai

UA FESILI MAI TALAVOU

Po o le Tagata Tonu Lea e Fetaui mo Aʻu?

Po o le Tagata Tonu Lea e Fetaui mo Aʻu?

Po ua e mauaina se tagata lelei e te fia faaipoipo i ai? Pe afai o lea, e faapefea ona e iloa e fetaui lelei lenā tagata mo oe?

E tāua ona e vaavaai lelei i uiga moni o lau uō. E lē faapea a aulelei se teine ona faamoemoeina lea o ia. E lē faapea foʻi a taʻutaʻua se tama ona lelei lea o lana amio. E te manaʻo i se tagata e te maufaatuatuaina, o se tasi e fetaui ma ou uiga ma ou sini.​—Kenese 2:18; Mataio 19:​4-6.

Ia Vaai i Uiga Moni o Lau Uō

Ia vaavaai totoʻa i lau uō, ae ia faaeteete. Aiseā? E ono iʻu i lou iloaina na o uiga lelei o lau uō, ae lē iloa atu ai isi mea e faatatau iā te ia. Ia faaalu se taimi e iloa lelei ai lenā tagata. Ia taumafai e te malamalama lelei i le ituaiga tagata e iai lau uō.

O le toʻatele o tagata e uō e gata la latou vaai i uiga e faaalia mai i fafo. E vave ona latou uaʻi atu i mea e latou te tutusa ai. E latou te manatu e faapea: “E tutusa pese e ma te fiafia i ai.” “E tutusa mea e ma te fiafia e fai.” “O mea uma lava e ma te malilie faatasi i ai!” Peitaʻi, e lē tatau ona gata lau vaai i uiga e faaalia mai i fafo. E tatau ona e iloa “le tagata lilo i totonu.” (1 Peteru 3:4; Efeso 3:16) Nai lo o le taulaʻi atu i le tele o mea e te lua malilie faatasi i ai, e sili atu pe a e mātau po o le ā e tupu pe a eseese o oulua manatu i se mataupu.

O se faataʻitaʻiga, mātau tulaga nei:

  • O le ā le auala o le a ia gaoioi ai pe a tupu se feeseeseaʻiga? Po o le a ia finau ina ia faia mea i lana auala, atonu e na te faaalia le “lotoa” pe fai ni “upuleaga”? (Kalatia 5:​19, 20; Kolose 3:8) Pe e fetuutuunaʻi o ia e lolo atu i manatu o isi ina ia tausia ai le filemu pe a lē solia ai taʻiala a le Tusi Paia?​—Iakopo 3:17.

  • Pe e poto e faasufi tagata ina ia fai le mea o loo ia manaʻo i ai, manaʻo e te alofa pe faauō atu tau lava o ia, pe fuā foʻi? Pe e manaʻo lava e na te iloaina au mea uma e fai? Ua faapea mai Nicole: “Ou te faalogo i nisi faigāuō e tauaʻimisa ona ua ita le isi i le lē vili atu o le isi e taʻu atu le mea o loo iai i lea taimi ma lea taimi. O le faailoga lenā e iloa ai o loo iai se faafitauli.”​—1 Korinito 13:4.

  • O le ā le manatu o isi e faatatau i lenā tagata? E ono mafai ona e talanoa i se isi ua leva ona iloaina lenā tagata, e pei o ē taʻumatuaina i le faapotopotoga. O le a e iloa ai po o ia o se tagata e “taʻuleleia.”​—Galuega 16:​1, 2.