Mea e mafai ona e faia

Iloilo: Po o atagia mai i lau amio ni māfuaaga e ono lē maufaatuatuaina ai oe e ou mātua?

O se faaaʻoaʻoga, na tusi le aposetolo o Paulo: “Matou te mananaʻo ina ia faia mea uma ma le faamaoni.” (Eperu 13:18) Ia fesili ifo, ‘⁠O fai ma aʻu masani le tautala saʻo i oʻu mātua i mea ou te alu i ai ma aʻu mea e fai?’

Filifili se igoa o loo taʻua i lalo ina ia faitau ai i se tala moni.

 Lori  Beverly

 Lori

Sa ou imeli i se tama na ou fia alu i ai ae e leʻi iloa e oʻu mātua. Ae ina ua la iloa na la fai mai e tuu. Na ou fai atu iā i laʻua e lē toe faia, ae na fai lava. Na atoa le tausaga o fai laʻu amio lea. Ou te imeli lava i le tama, ae a maua aʻu e oʻu mātua, ona ou faatoese foʻi lea ma fai atu e lē toe faia, ae e uma ane lava e toe fai foʻi. Na oo ina lē toe maufaatuatuaina aʻu e oʻu mātua i so o se mea.”

O le ā sou manatu, aiseā na lē toe maufaatuatuaina ai Lori e ona mātua?

Pe ana faapea o oe o mātua o Lori, o le ā se mea e te faia, ma aiseā?

O le ā le gaoioiga atamai sa tatau ona faia e Lori i le taimi muamua na talanoa atu ai ona mātua e uiga i le faafitauli?

 Beverly

E leʻi talitonuina aʻu e oʻu mātua i mea tau tama, ae o lea ua ou malamalama nei i le māfuaaga. E toʻalua ni tama sa ou faatafai i ai, ae e lua tausaga e matutua ai iā te aʻu. E umi foʻi le taimi ou te talanoa ai iā i laʻua i le telefoni, ma pe a fai ni faatasitasiga, e na o i laʻua e tele ina ou talanoa i ai. E tasi le masina na aveese ai e oʻu mātua laʻu telefoni, ma e leʻi toe faatagaina aʻu e alu i faatasitasiga e ō i ai na tama.”

Pe ana faapea o oe o mātua o Beverly, o le ā se mea e te faia, ma aiseā?

Pe e te manatu ua faasāsā naʻuā mātua o Beverly? Pe afai o le tulaga lenā, aiseā?

O le ā se gaoioiga na ono mafai ona faia e Beverly ina ia toe maufaatuatuaina ai o ia e ona mātua?

Toe Maufaatuatuaina Oe

Mea e mafai ona e faia

A o faagasolo le olaga talavou e pei le avea ma tagata matua e maufaatuatuaina o le savali lea i ni fasitepu

Muamua, ia iloilo po o lē fea vala ua lē toe maufaatuatuaina ai oe.

  • Foʻi i le fale i le taimi faatulagaina

  • Tausisi i aʻu upu

  • Tausi taimi

  • Faaaogā lelei aʻu tupe maua

  • Fai ia māeʻa lelei feʻau

  • E lē tau fafaguina i le taeao

  • Tapena loʻu potu

  • Tautala saʻo

  • E lē tele se taimi e faaalu i le telefoni po o le komepiuta

  • Taʻutino mea sesē ma faatoese atu

  • Isi mea

Lua, ia fai sau filifiliga. Ia faataatia sou sini ina ia faamaonia atu ai e mafai ona maufaatuatuaina oe i vala na taʻua i luga. Ia mulimuli i le apoapoaʻiga mai i le Tusi Paia: “Tuu ese le tagata tuai e tusa ai ma a outou amioga sa faia muamua.” (Efeso 4:22) E iai le taimi o le a iloa ai e tagata e aofia ai ma ou mātua, lou agaʻigaʻi i luma.—1 Timoteo 4:15.

Tolu, talanoa i ou mātua e faatatau i lau filifiliga. Nai lo o le tomumu i lo la lē maufaatuatuaina o oe, ae ia fesili atu ma le faaaloalo po o le ā e ao ona e faia ina ia la maufaatuatuaina ai oe.

Faaeteetega: Aua e te faatalitalia o le a vave ona tuu mai e ou mātua le saʻolotoga. E mautinoa e la te fia vāai muamua pe e te tausisi i au upu. Ia faaaogā lenā avanoa e faamaonia atu ai e mafai ona maufaatuatuaina oe. E iai le taimi o le a tuu mai ai e ou mātua le tele o le saʻolotoga ma maufaatuatuaina oe. O le tulaga lenā na oo iā Beverly lea na taʻua muamua. Ua ia faapea mai, “E sili atu ona faigofie le lē toe maufaatuatuaina o oe nai lo o le taumafai e toe maufaatuatuaina oe. Ua toe maufaatuatuaina aʻu i le taimi nei, ma ou te lagona ai le fiafia.”

Manatu autū: O le tele e maufaatuatuaina ai oe, o le tele foʻi lenā o le faatuatuaina o oe e ou mātua.