•  Faiaʻoga sauā, faaituʻau pe tautalatasi

•  Fesoasoani Aogā

•  Auala e talanoa ai i lou faiaʻoga

•  Tala a isi talavou

 Faiaʻoga sauā, faaituʻau pe tautalatasi

 E toetoe lava o tamaiti aʻoga uma e feagai ma se faiaʻoga e sauā, faaituʻau ma e tautalatasi.

•   Ua taʻua e Luis o se talavou e 21 tausaga: “Na iai loʻu faiaʻoga e masani ona tautala i upu masoā ma soona fai tamaiti o laʻu vasega. O le taimi lenā ua toeitiiti litaea mai i le galuega, ma atonu na ia manatu e lē taitai tulia o ia ona o na gaoioiga.”

•   E manatua pea e Melanie o se talavou e 25 tausaga, le auala na faileagaina ai o ia e lona faiaʻoga. Na ia taʻua: “O le māfuaaga autū na lē fiafia ai loʻu faiaʻoga iā te aʻu ona e ese laʻu tapuaʻiga. Na ia fai mai e tatau ona amata atu i le taimi lenei ona ou faamasani i le faileagaina o aʻu e tagata.”

 Pe afai e sauā pe tautalatasi lou faiaʻoga, e iai mea e mafai ona e faia ina ia e maua ai pea le fiafia i le aʻoga. O nisi nei o fautuaga.

 Fesoasoani Aogā

•   Ia Fetuutuunaʻi. E eseese mea e faatalitalia e faiaʻoga mai i a latou tamaiti aʻoga. Ia taumafai e iloa ma faia le mea sili e tusa ai ma mea o loo faatalitalia mai e lou faiaʻoga mai iā te oe.

   Mataupu silisili o le Tusi Paia: “O le tagata atamai e faalogo ma ave i fale isi faatonuga.”—Faataoto 1:5.

   “Na ou iloa e tatau ona ou fetuutuunaʻi e fua i le mea e manaʻo i ai loʻu faiaʻoga. O lea na ou taumafai malosi ai e fai faalelei aʻu mea aʻoga, ma na lelei ai le auala na talanoa mai ai loʻu faiaʻoga.”—Christopher.

•   Ia Faaaloalo. Ia talanoa i lou faiaʻoga i se auala faaaloalo. Aua le tali atu i se auala lē lelei e tusa lava pe e te manatu o oe e saʻo. Ia manatua e eseese lua tulaga ma tausaga.

   Mataupu silisili o le Tusi Paia: “Ia lē aunoa ona outou tautatala atu i upu e logolelei, ia faamāi i le masima, ina ia outou iloa le auala e tali atu ai i tagata taʻitoʻatasi.”—Kolose 4:6.

   “E lē o taimi uma e faaaloalo ai tamaiti aʻoga i faiaʻoga. Pe a e taumafai pea e faaalia le faaaloalo i lou faiaʻoga, o le a lelei foʻi le auala e latou te feutagaʻi ai ma oe.”—Ciara.

•   Ia Taumafai e Malamalama. E lē lelei atoatoa faiaʻoga ma e iai foʻi o latou popolega e pei o isi. E lē tatau la ona tatou vave faia se faaiʻuga e faapea, ʻE lē lelei loʻu faiaʻoga’ pe ʻE lē fiafia loʻu faiaʻoga iā te aʻu.’

   Mataupu silisili o le Tusi Paia: “E sesē i tatou uma i le tele o taimi.”—Iakopo 3:2.

   “E lē faigofie le galuega a faiaʻoga. Ou te lē iloa pe e mafai ona ou faia lenā galuega o le faamaopoopo ma le aʻoaʻoina o tamaiti. Ou te taumafai la e faamāmā la latou avega e ala i le faaalia o le amio lelei i le vasega.”—Alexis.

•   Talanoa i ou mātua. E naunau ou mātua ia lelei lau aʻoga. E mafai ona fesoasoani a la fautuaga iā te oe e feagai ai ma se faiaʻoga sauā pe tautalatasi.

   Mataupu silisili o le Tusi Paia: “E faalēaogāina fuafuaga pe a leai ni talanoaga.”—Faataoto 15:22.

   “E tele atu le tomai o mātua e foʻia ai faafitauli nai lo o le fanau. Pe a e faalogo i a latou fautuaga e te taulau manuia ai.”—Olivia.

 Auala e talanoa ai i lou faiaʻoga

 I nisi taimi, atonu e manaʻomia ona e talanoa atu i lou faiaʻoga e faatatau i se mea e te lē o fiafia ai iā te ia. Ia manatua e te lē o alu atu e finau ma le faiaʻoga. Nai lo o lea, o loo e alu atu lua te talanoa, ma atonu e uma ane ua maua ai ni iʻuga lelei.

 Mataupu silisili o le Tusi Paia: “Tausisi i mea e faatupu ai le filemu.”—Roma 14:19.

 “Pe afai e na o oe lava e faaalia i ai uiga lē lelei o le faiaʻoga, ia fesili i ai pe e iai se mea e lē o fiafia ai iā te oe. Atonu o le a e iloa ai se mea e manaʻomia ona e faaleleia.”—Juliana.

 “Atonu o se mea lelei le faamatala atu o ou faalogona i le faiaʻoga i se auala toʻafilemu, a o leʻi amata po o le uma o le vasega, ma pe a na o oulua. O le faia faapea, e ono faaaloalogia ai oe e le faiaʻoga.”—Benjamin.

 SE MEA MONI NA TUPU

 “Na faasolo ina leaga oʻu togi i le aʻoga, ae ou te leʻi maua se fesoasoani mai i loʻu faiaʻoga. Na uma ai ma loʻu toe fia alu i le aʻoga.

 “Na ou fesili i se isi faiaʻoga mo se fautuaga, ma na ia faapea mai: ʻE lē masani lelei lou faiaʻoga ia te oe, ma e te lē iloa lelei foʻi o ia. E manaʻomia ona e faailoa atu i ai e te manaʻomia le fesoasoani, ona atonu o le mea foʻi lenā o loo tupu i isi tamaiti o le vasega, e fefefe e fesili i le faiaʻoga mo se fesoasoani.’

 “Na ou musu e fesili i loʻu faiaʻoga, ae na ou toe mafaufau, e saʻo lelei le fautuaga a le isi faiaʻoga. Ina ia toe lelei oʻu togi i le aʻoga na manaʻomia ona ou tausolomua e faia se gaoioiga.

 I le aso na sosoo ai, na ou talanoa ai i loʻu faiaʻoga ma faailoa i ai ma le faaaloalo loʻu talisapaia o lana vasega, ma ou te manaʻo ina ia tele mea ou te aʻoaʻoina. Ae o loo faigatā ona ou faia faapea ma ou te manaʻomia ai lana fesoasoani. Na ia aumaia ai loa fautuaga, ma faailoa mai e mafai ona ia fesoasoani iā te aʻu i taimi e tuua ai le aʻoga, pe faaaogā foʻi le imeli.

 “Na matuā faateʻia ai lava aʻu! O lenā talanoaga na faaleleia ai laʻu faiā ma loʻu faiaʻoga ma ou maua ai le fiafia i le aʻoga.”—Maria.

 Fesoasoani: Pe afai e lē lelei le lua faiā ma se faiaʻoga, ia vaai i ai o se toleniga pe a avea oe ma tagata matua. Ua faapea mai Katie e 22 tausaga: “E tusa lava pe uma lau aʻoga, e te feagai pea ma tagata o loo i le tulaga pule ae e lē faaalia le agalelei i taimi uma. Pe afai la e te iloa le auala e fesagaʻia ai se luʻi mai i se faiaʻoga, o le a faigofie foʻi ona e fesagaʻia tagata faapenā i le lumanaʻi.”