Ioe. A o iai Iesu i le lalolagi, na ia faataunuuina le tele o valoaga e faatatau i le “Mesia le Taʻitaʻi,” o lē o le a fai ma “Faaola o le lalolagi.” (Tanielu 9:25; 1 Ioane 4:14) Ina ua mavae foʻi lona maliu, na faaauau pea ona ia faataunuuina valoaga e faatatau i le Mesia.​—Salamo 110:1; Galuega 2:34-36.

•  O le ā le uiga o le “Mesia”?

•  Pe e mafai ona faataunuuina e ni tagata se toʻatele valoaga e faatatau i le Mesia?

•  Po o le a aliaʻe mai le Mesia i le lumanaʻi?

•  E fia valoaga o loo i le Tusi Paia e faatatau i le Mesia?

•  Nisi o valoaga e faatatau i le Mesia na faataunuuina e Iesu

 O le upu Eperu Ma·shiʹach (Mesia) ma le upu Eleni Khri·stos (Keriso) e uiga atu i “Lē ua Faauuina.” O lona uiga, e faasino atu “Iesu Keriso” iā “Iesu o Lē ua Faauuina” po o “Iesu le Mesia.”

 I taimi o le Tusi Paia, e masani ona faauuina se tasi e ala i le liligiina o le suāuu i lona ulu, pe a filifilia mo se tulaga pule. (Levitiko 8:12; 1 Samuelu 16:13) Na filifilia e le Atua Iesu e avea ma Mesia, o se tulaga pule maualuga. (Galuega 2:36) Peitaʻi, e leʻi faauuina Iesu e ala i le liligiina ai o se suāuu, ae na faauuina e le Atua e ala i le agaga paia.​—Mataio 3:16.

 E leai. E pei lava ona faamaonia e se tulagālima se tagata se toʻatasi, e na o le toʻatasi foʻi le Mesia po o le Keriso e mafai ona faataunuuina valoaga a le Tusi Paia. Peitaʻi, ua lapataʻi mai le Tusi Paia e faatatau i ‘⁠Keriso pepelo ma perofeta pepelo, latou te faia faailoga tetele ma mea ofoofogia ina ia faasesē ai, e oo lava i ē ua filifilia pe afai e mafai.’​—Mataio 24:24.

 E leai. Na valoia mai i le Tusi Paia o le a tupuga mai le Mesia iā Tavita, le tupu o Isaraelu. (Salamo 89:3, 4) Peitaʻi, ua lē o toe iai faamaumauga o gafa o Iutaia lea e aofia ai ma Tavita. Atonu na faatamaʻia ina ua faatoʻilaloina e Roma Ierusalema i le 70 T.A. a Talu mai lenā taimi, na lē mafai ona faamaonia e se tasi pe e tupuga mai o ia i le aiga tautupu o Tavita. E ui na iai pea na faamaumauga i taimi o Iesu, ae e leai ma se tasi o ona fili na mafai ona faamaonia e leʻi tupuga mai o ia i le gafa o Tavita.​—Mataio 22:41-46.

 E lē mafai ona tatou faitauina se numera patino o valoaga e faatatau i le Mesia. Mo se faataʻitaʻiga, e eseese auala e faitau ai e tagata le aofaʻiga o valoaga e oo lava i valoaga faatatau atu i le Mesia. O loo taʻua i le Isaia 53:2-7 le tele o vala faavaloaga e iloa ai le Mesia. E ono manatu nisi i lenei mau o se valoaga se tasi, ae e manatu foʻi nisi o ni valoaga eseese.