Ua faatonuina i tatou i le Tusi Paia ina ia aua neʻi aveina i totonu o o tatou tino le toto. O lea, e lē tatau ona tatou taliaina le toto atoa po o ona vaega autū i so o se auala, e tusa po o se meaʻai po o se tuigātoto foʻi. Mātau mau o loo mulimuli mai:

• Kenese 9:4. Ina ua mavae le Lolo, na faataga e le Atua Noa ma lona aiga e faaopoopo i a latou meaʻai masani aano o manu, ae na faatonuina i latou e aua le ʻaina le toto. Na fetalai le Atua iā Noa: “A o le aano o le manu ma lona toto; o lona ola lea, aua tou te aai ai.” E faatatau atu lenei faatonuga i tagata uma e amata mai i lenā taimi, talu ai o i tatou uma e tupuga mai iā Noa.

• Levitiko 17:14 “Aua tou te aai i le toto o ituaiga uma o meaola, auā o le ola o so o se ituaiga o meaola, o lona toto lea. E fasiotia so o se tasi e ʻai ai.” I le silafaga a le Atua o le toto o le ola, ma o ia e ana. E ui lava na patino lenei tulafono i le nuu o Isaraelu, ae ua faaalia ai le matuā tāua i le silafaga a le Atua o le tulafono e faatatau i le ʻaina o le toto.

• Galuega 15:20 ‘⁠Ia taumamao mai i le toto.’ Na tuuina mai e le Atua i Kerisiano le faatonuga lava lea e tasi sa ia avatu iā Noa. Ua faaalia mai i le talafaasolopito, na teena e uluaʻi Kerisiano le ʻaina o le toto pe faaaogā mo togafitiga faafomaʻi.

Aiseā ua faatonuina ai i tatou e le Atua e taumamao mai i le toto?

Ua iai faamaoniga faafomaʻi e iloa ai aafiaga lē lelei o tuigātoto i lo tatou soifua mālōlōina. Ae e sili atu ona tāua, ua faatonu i tatou e le Atua e taumamao mai i le toto, talu ai e faaāta mai e le toto se mea e paia iā te ia.—Levitiko 17:11; Kolose 1:20.