Alu i mataupu o loo iai

Pe na Faaaogāina e le Atua le Evolusione e Foafoaina ai Meafaiola Eseese?

Pe na Faaaogāina e le Atua le Evolusione e Foafoaina ai Meafaiola Eseese?

Tali a le Tusi Paia

E leai. O loo taʻua manino i le Tusi Paia na foafoaina e le Atua tagata ma “ituaiga” eseese o manu ma laau. * (Kenese 1:12, 21, 25, 27; Faaaliga 4:11) O loo faamatala ai foʻi na tupuga mai tagata uma i o tatou uluaʻi mātua o Atamu ma Eva. (Kenese 3:20; 4:1) E lē lagolagoina e le Tusi Paia le aʻoaʻoga, na faaaogā e le Atua le evolusione e foafoa ai ituaiga o meafaiola eseese lea e taʻua i nisi taimi o le theistic evolution. O le mea moni e lē feteenaʻi le Tusi Paia ma su’esu’ega a saienitisi e mafai ona tutupu suiga i ituaiga o meafaiola taʻitasi.

 Pe na faaaogā e le Atua le evolusione?

O tagata e talitonu na faaaogā e le Atua le evolusione e foafoa ai le ola, e eseese o latou manatu e faatatau i lenā aʻoaʻoga. O nisi tagata e talitonu na faaaogā e le Atua mea faalenatura e foafoaina ai isi mea.

O le aʻoaʻoga na faaaogā e le Atua le evolusione e foafoa ai mea, e aofia ai manatu nei:

  • Na tupuga mai meafaiola uma i se tupuaga e tasi i le faitau miliona o tausaga ua mavae.

  • E mafai ona suia atoatoa se ituaiga o meafaiola ma avea ma se isi ituaiga o meafaiola, o lenā aʻoaʻoga e taʻua o le macroevolution.

  • O le Atua na māfua ai ona iai nei suiga uma.

 Pe e ōgatusa le aʻoaʻoga o le evolusione ma le Tusi Paia?

Ua faapea mai i latou e talitonu na faaaogā e le Atua le evolusione e foafoa ai mea, e lē saʻo aʻiaʻi le manatu o le Tusi Paia i le Kenese e faatatau i le foafoaga. Peitaʻi, na taʻua e Iesu e moni le tala o loo i le Kenese. (Kenese 1:26, 27; 2:18-24; Mataio 19:4-6) O loo taʻua i le Tusi Paia a o leʻi afio mai Iesu i le lalolagi, na iai o ia i le lagi faatasi ma le Atua ma na ia fesoasoani i le Atua i le foafoaina o “mea uma.” (Ioane 1:3) O lea la, o le aʻoaʻoga na faaaogā e le Atua le evolusione e foafoa ai ituaiga o meafaiola eseese uma, e lē ōgatusa ma aʻoaʻoga a le Tusi Paia.

 Aiseā e mafai ai e laau ma manu ona sui ina ia mafai ona ola i se siʻomaga fou?

E lē o faamatalaina i le Tusi Paia le tele o suiga eseese e mafai ona tupu i se ituaiga o meafaiola. E ioe le Tusi Paia i le mea moni e mafai e ituaiga eseese o manu ma laau na foafoaina e le Atua, ona sui a o fanafanau ma faamasani i se siʻomaga fou. E ui e vaai nisi i na suiga o se faamaoniga o le aʻoaʻoga faaevolusione, ae o na suiga e lē o maua ai se isi ituaiga o meafaiola fou.

^ pala. 1 E faaaogā e le Tusi Paia le upu “ituaiga” lea e lautele ma manino lona uiga nai lo le auala o loo faaaogā ai e saienitisi. E masani ona fai mai saienitisi na teʻi lava ua iai se ituaiga fou o se meaola, ae o le mea moni e tutupu suiga i ituaiga o meafaiola taʻitasi e pei ona faamatalaina i le Kenese.