Alu i mataupu o loo iai

Pe e Iai se Atua?

Pe e Iai se Atua?

Tali a le Tusi Paia

Ioe, ua saunia e le Tusi Paia faamaoniga manino e iai le Atua. O loo faalaeiauina ai i tatou e atiaʻe le faatuatua i le Atua e lē i talitonuga faalotu, ae e ala i le faaaogā o o tatou “mafaufau lelei.” (Roma 12:1) Ia mātau nisi o manatu nei e faavae mai i le Tusi Paia:

  • O le iai o se vateatea e maopoopo lelei ma e mafai ona ola ai mea, e faailoa mai ai e iai Lē na foafoaina mea. Ua faapea mai le Tusi Paia: “O le mea moni, e tofu lava le fale ma le tagata na ia faia, a o lē na faia mea uma o le Atua lea.” (Eperu 3:4) E ui i le faigofie o lena manatu, ae o le toʻatele o tagata atamamai ua iloa le moni o lena manatu. *

  • E iai i tagata uma le faanaunauga e fia malamalama i le uiga ma le fuafuaga o le olaga. O lena faanaunauga e iai pea pe a uma ona faamalie o tatou manaʻoga faaletino. O loo taʻua i le Tusi Paia lena faanaunauga o o tatou manaʻoga faaleagaga, lea e aofia ai le naunau e fia iloa le Atua ma tapuaʻi iā te ia. (Mataio 5:3; Faaaliga 4:​11) O lena manaʻoga faaleagaga e lē gata ua aumaia ai faamaoniga e iai le Atua, ae ua faailoa mai ai foʻi e alofa Lē na foafoaina mea iā i tatou, ma e finagalo ia faamalie lena manaʻoga.​—Mataio 4:4.

  • Na faataunuuina moni lava valoaga o loo i le Tusi Paia e pei ona valoia. O le saʻo aʻiaʻi ma le auʻiliʻili o le auala na faamatala ai nei valoaga, e iloa ai o na valoaga e mai i lē e sili atu lona mana nai lo o tagata.​—2 Peteru 1:​21.

  • Na sili atu le atamamai o tusitala o le Tusi Paia i mataupu faasaienisi nai lo o ē na latou ola faatasi. Mo se faataʻitaʻiga, na talitonu le toʻatele o loo tiʻetiʻe le lalolagi i luga o se manu e pei o le elefane, puaa ʻaivao po o se povi. I se faaeseesega, ua faapea mai le Tusi Paia “ua tautau le lalolagi ae e leai se mea o tautau ai.” (Iopu 26:7) I se tulaga talitutusa, o loo faamatalaina ma le saʻo aʻiaʻi i le Tusi Paia foliga o le lalolagi e “faataaliʻoliʻo.” (Isaia 40:22) E manatu tagata o le māfuaaga ua iai le atamai i le Tusi Paia, ona na maua e tusitala o le Tusi Paia faamatalaga mai i le Atua.

  • Ua taliina e le Tusi Paia le tele o fesili faigatā. O ituaiga fesili ia e talitonu ai tagata e leai se Atua pe a lē maua se tali. O le lē mauaina o se tali i na fesili e manatu ai tagata e leai se Atua. Mo se faataʻitaʻiga: Pe afai e alofa le Atua ma o Lē e ou le malosi uma lava, aiseā la ua tele ai mafatiaga ma mea leaga i le lalolagi? Aiseā ua avea ai lotu ma taaʻina o mea leaga nai lo o mea lelei?​—Tito 1:​16.

^ pala. 2 Mo se faataʻitaʻiga, na taʻua e Allan Sandage o se tagata suʻesuʻe i le vateatea e faapea: “E faigatā ona ou talitonu o le tulaga maopoopo o loo iai, na pogai mai i ni tulaga fenumiaʻi. E tatau lava ona iai se pogai o ia mea o loo faamaopoopoina. Iā te aʻu lava ia, e faigatā ona iloa le Atua. Peitaʻi, o ia lenā na faapogaia vavega lea ua ala ai ona iai mea.”