O le ā le Faaolataga?
Tali a le Tusi Paia
I nisi taimi e faaaogā ai e tusitala o le Tusi Paia ia upu o le “laveaʻiina” ma le “faaolataga” e faailoa mai ai le manatu, o se tagata ua faasaoina mai i se tulaga e lamatia pe faaumatia ai. (Esoto 14:13, 14; Galuega 27:20) Peitaʻi, e masani ona faaaogā na upu e faasino atu i le laveaʻiina mai i le agasala. (Mataio 1:21) Talu ai o le oti e māfua mai i le agasala, o tagata la e laveaʻiina mai i le agasala e latou te maua le faamoemoe o le ola e faavavau.—Ioane 3:16, 17. a
E faapefea ona maua le faaolataga?
Ina ia maua le faaolataga e tatau ona e faatuatua iā Iesu, ma faaalia lenā faatuatua e ala i le usitaʻia o ana poloaʻiga.—Galuega 4:10, 12; Roma 10:9, 10; Eperu 5:9.
Ua faaalia i le Tusi Paia e tatau ona e faia galuega po o gaoioiga o le usiusitaʻi, ina ia faamaonia ai o loo ola lou faatuatua. (Iakopo 2:24, 26) Ae e lē uiga ai e faapea e mafai ona e faatauina le faaolataga. O le faaolataga o le “meaalofa a le Atua” e faavae i lona “agalelei faifua” po o le “alofa tunoa.”—Efeso 2:8, 9; Tusi Paia Samoa-Lomiga 1969.
Pe e mafai ona mou atu lou faaolataga?
Ioe. E pei lava o se tagata e faasaoina mai i le malemo ae toe paʻū pe toe oso foʻi i totonu o le vai, e faapena foʻi ona mou atu le faaolataga o se tagata na laveaʻiina mai i le agasala ae lē tumau pea ona faaalia le faatuatua. O le māfuaaga lea ua augani mai ai le Tusi Paia i Kerisiano ua maua le faaolataga, “ina ia finafinau mo le faatuatua.” (Iuta 3) O loo aumaia ai foʻi se lapataʻiga mo i latou ua maua le faaolataga: “Ia faaauau ona outou galulue mo lo outou faaolataga, i le mataʻu ma le gatete.”—Filipi 2:12.
O ai le faaola—o le Atua po o Iesu?
O loo faailoa mai i le Tusi Paia o le Atua o le puna autū o le faaolataga, ma e masani ona taʻua o ia o le “Faaola.” (1 Samuelu 10:19; Isaia 43:11; Tito 2:10; Iuta 25) E lē gata i lea, na faaaogā e le Atua tagata eseese e laveaʻiina le nuu anamua o Isaraelu, ma o loo taʻua i latou i le Tusi Paia o “faaola.” (Neemia 9:27; Faamasino 3:9, 15; 2 Tupu 13:5) I se tulaga talitutusa, talu ai ua saunia e le Atua le laveaʻiina mai i le agasala e ala i le taulaga togiola a Iesu Keriso, o loo faasino atu la le Tusi Paia iā Iesu o le “Faaola.”—Galuega 5:31; Tito 1:4. b
Po o le a faasaoina tagata uma?
E leai, e iai nisi e lē faasaoina. (2 Tesalonia 1:9) Ina ua fesiligia Iesu “Pe e toʻaitiiti ni tagata e faaolaina?” na ia tali atu: “Ia outou faamalolosi ma finafinau e ulu atu i le faitotoʻa vaitiiti, auā ou te fai atu iā te outou, e toʻatele e saʻili ina ia ulu atu i ai ae e lē mafai.”—Luka 13:23, 24.
Faamatalaga sesē e uiga i se faaolataga mo le lalolagi aoao
Faamatalaga sesē: O loo aʻoaʻoina i le 1 Korinito 15:22 le faaolataga mo le lalolagi aoao, e ala i le faapea mai “[e] toe faaolaina uma lava e ala i le Keriso.”
Mea moni: O loo faamatalaina i le siʻomaga o lenei mau le toetū. (1 Korinito 15:12, 13, 20, 21, 35) O lea, o le faaupuga “[e] toe faaolaina uma lava e ala i le Keriso,” o lona uiga o i latou uma e toetutū mai o le a mauaina lea faamanuiaga e ala iā Iesu Keriso.—Ioane 11:25.
Faamatalaga sesē: O loo aʻoaʻoina i le Tito 2:11 le faaolataga mo le lalolagi aoao, e ala i le faapea mai “ua aumaia [e le Atua] le faaolataga i tagata uma lava.”—International Standard Version.
Mea moni: O le upu Eleni ua faaliliuina “uma” i lea fuaiupu, e mafai foʻi ona uiga atu “so o se ituaiga.” c O lea, o le malamalamaga saʻo o le Tito 2:11, ua aumaia e le Atua le faaolataga i ituaiga uma o tagata e aofia ai tagata “mai i atunuu uma, ma ituaiga, ma nuu, ma gagana.”—Faaaliga 7:9, 10.
Faamatalaga sesē: O loo aʻoaʻoina i le 2 Peteru 3:9 le faaolataga mo le lalolagi aoao, e ala i le faapea mai “e lē finagalo o ia e faaumatia se tasi.”
Mea moni: E finagalo le Atua e faasaoina tagata, ae e na te lē faamalosia i latou e talia lana sauniuniga mo le faaolataga. O le a aofia i lana “aso faamasino” le “faaumatiaga o tagata faalēmataʻu.”—2 Peteru 3:7.
a O loo faasino atu le Tusi Paia i se tagata ʻua faaolaina,’ e ui lava e faatoʻā saʻoloto moni mai i le agasala ma le oti i le lumanaʻi.—Efeso 2:5; Roma 13:11.
b O le igoa Iesu e sau mai i le igoa Eperu Yehoh·shuʹaʽ, o lona uiga “O Ieova o le Faaolataga.”
c Tagaʻi i le Vine’s Complete Expository Dictionary of Old and New Testament Words. O loo iai i le Mataio 5:11 le upu Eleni lava lea e tasi, lea o loo faamauina ai upu a Iesu e faapea o le a faia e tagata “so o se ituaiga” o faamatalaga leaga e faatatau i ona soo.—International Standard Version.
E te Ono Fiafia Foʻi
TALIINA O FESILI FAALE-TUSI PAIA
E Faapefea i le Taulaga a Iesu Ona Avea o se “Togiola mo Tagata e Toʻatele”?
E faapefea i le togiola ona faasaʻolotoina ai mai i le agasala?
TALIINA O FESILI FAALE-TUSI PAIA
Po o Aʻoaʻo e le Tusi Paia le Manatu, ‘A Faasaoina Loa, Ona Faasaoina ai Lava Leaʻ?
Na taʻua e Iesu se talafaatusa e tali ai le fesili.
TALIINA O FESILI FAALE-TUSI PAIA
Pe e Lava le Tau Ina Talitonu iā Iesu e Faaolaina Ai?
O loo faamatala i le Tusi Paia nisi e talitonu iā Iesu ae e lē faasaoina. E faapefea ona tupu lenā mea?
A'OA'OGA FAALE-TUSI PAIA
Aiseā na Maliu ai Iesu?
O loo faamamafa mai i le Tusi Paia le tāua tele o le maliu o Iesu. Pe na iai se fuafuaga o lona maliu?
UIGA O MAU
Le Uiga o le Roma 10:13—“Valaau i le suafa o le Alii”
E faasafua atu e le Atua i tagata uma le avanoa e faasaoina ai ma maua le ola e faavavau, e tusa lava pe eseese atunuu, lanu po o lona tulaga.
AʻOAʻOGA A LE TUSI PAIA
Faataʻitaʻi Ona Suʻesuʻe le Tusi Paia
Ia faataʻitaʻi le suʻesuʻeina o le Tusi Paia e aunoa ma se totogi faatasi ma se faiaʻoga.