Tali a le Tusi Paia

 O le a suia e le Malo o le Atua faigāmalo uma ma pulea le lalolagi atoa. (Tanielu 2:44; Faaaliga 16:14) Mātau mea o le a faia e le Malo o le Atua pe a oo mai lenā taimi:

•   O le a tafiesea tagata amioleaga, lea e faapogaia mafatiaga i tagata uma ona o lo latou manatu faapito. “A o ē e amioleaga, e faaumatia i latou mai i le lalolagi.”—Faataoto 2:22.

•   O le a faaiʻuina taua. O le a “faaiʻuina [e le Atua] taua i tuluʻiga o le lalolagi.”—Salamo 46:9.

•   O le a tatou ola i se lalolagi e malupuipuia ma faatamaoaigaina. “E taʻitoʻatasi i latou ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:4.

•   O le a ia toe faafoʻisia le lalolagi e avea ma parataiso. “O le a fiafia foʻi le fanua laugatasi o le toafa ma e fua mai e pei o le lili.”—Isaia 35:1.

•   O le a tatou maua le fiafia ma le faamalieina i galuega o le a tatou faia. “O le a matuā fiafia uma oʻu tagata ua filifilia i galuega a o latou lima. O le a lē galulue fua i latou.”—Isaia 65:21-23.

•   O le a lē toe iai ni maʻi. “E lē fai mai foʻi se tasi ua nofo ai: ʻOu te maʻi.’”—Isaia 33:24.

•   O le a lē toe aafia i le soifua matua. “Ia faafouina lona tino e sili nai lo o le talavou; ia toe foʻi o ia i aso o le malaulau o lona talavou.”—Iopu 33:25.

•   O le a toe faatutūina mai ē ua maliliu. “E faalogo ai i latou uma o loo i tuugamau i [le leo o Iesu] ma latou ō mai ai.”—Ioane 5:28, 29.