Tali a le Tusi Paia

 Ua faamamaluina i tatou e le Atua e ala i le aumaia o le filifiliga saʻoloto, po o le tomai e faia ai a tatou lava filifiliga, nai lo o lona tuupōina o mea e tatou te faia. Mātau le manatu o le Tusi Paia.

•   Na foafoaina e le Atua tagata i lona faatusa. (Kenese 1:26) O lona uiga, e mafai ona tatou faaatagia atu uiga o Lē na foafoaina i tatou e pei o le alofa ma le faamasinotonu. I le pei fo’i o ia, e iai lo tatou saʻolotoga e filifili ai. E ese la i tatou mai i manu, e gaoioi e tusa ma o latou faalogona faalenatura.

•   E lē gata i lea, e faalagolago lo tatou lumanaʻi i filifiliga e tatou te faia. Ua faalaeiauina i tatou e le Tusi Paia ina ʻia filifili i le ola . . . e ala i le faalogo i le siʻufofoga o le Atua,’ po o le filifili e usiusitaʻi iā te ia. (Teuteronome 30:19, 20) E lē moni lenā faalaeiauga pe ana leai sa tatou filifiliga saʻoloto. E lē faamalosia i tatou e le Atua e usiusitaʻi iā te ia, ae ua ia augani mai ma le alofa: “E lelei pe a e faalogo mai i aʻu poloaʻiga! Ona pei ai lea o se vaitafe lou filemu.”—Isaia 48:18.

•   O lo tatou taulau manuia po o le lē taulau, e lē o se mea e tuupōina. E tatau ona tatou galulue mamafa pe a tatou mananaʻo e taulau manuia. Ua faapea mai le Tusi Paia: “O mea uma ua e iloa e faia e ou lima, inā faia ia ma lou malosi atoa.” (Failauga 9:10) Ua faapea mai foʻi le Faataoto 21:5: “O fuafuaga a le tagata toʻaga e manuia ai lava o ia.”

 O le saʻolotoga e filifili ai o se meaalofa tautele mai i le Atua, auā e uunaʻia ai i tatou e alolofa atu iā te ia ma o tatou “lotoatoa,” ona e tatou te mananaʻo e faia faapea.—Mataio 22:37.

Pe e lē o pulea e le Atua mea uma?

 O loo taʻua i le Tusi Paia o le Atua o Lē e ona le malosi uma lava, ma e leai se mea e gata mai ai lona mana. (Iopu 37:23; Isaia 40:26) Peitaʻi, e na te lē faaaogāina lona mana e pulea ai mea uma. Mo se faataʻitaʻiga, o loo taʻua i le Tusi Paia na ʻpulea e le Atua o ia lava’ i ana feutagaʻiga ma Papelonia anamua, o se fili o ona tagata. (Isaia 42:14) I se tulaga talitutusa, o loo onosaʻi mai foʻi o ia i aso nei iā i latou o loo faaaogā sesē a latou filifiliga saʻoloto e faileagaina ai isi. Ae e lē faaauau ai pea ona onosaʻi le Atua.—Salamo 37:10, 11.