Alu i mataupu o loo iai

Auala e Fesagaʻia ai le Lotovaivai Ona o se Faamaʻi e Aafia ai le Lalolagi

Auala e Fesagaʻia ai le Lotovaivai Ona o se Faamaʻi e Aafia ai le Lalolagi

Po o e lagonaina le popole ma le lotovaivai, ona o le faamaʻi o le Koviti-19? Pe afai o lea, e lē na o oe o loo aafia i na faalogona. E mo le tele o masina, ua faia e tagata i le lalolagi fetuunaʻiga i le auala e ola ai, a o feagai ai ma le faamaʻi. Ua faapea mai Dr. Hans Kluge o le Faatonu o le Faalapotopotoga o le Soifua Mālōlōina i le Lalolagi i Europa, E toʻatele tagata “ua latou faia le tele o faataulaga e taofia ai le pipisi o le Koviti-19. I na tulaga, e faigofie lava ma o se mea masani i tagata le lē ano ma lagonaina le leai o se faamoemoe lea e māfua ai ona lotovaivai.”

Pe afai o loo e lagonaina le lotovaivai ona o le Koviti-19, ia lototele. O loo fesoasoani le Tusi Paia i le toʻatele e fesagaʻia na faalogona i lenei taimi e sili ona faigatā, ma e mafai foʻi ona fesoasoani iā te oe.

 O ā mea e aofia ai i faalogona lotovaivai ona o se faamaʻi e aafia ai le lalolagi?

O faalogona lotovaivai ona o se faamaʻi e aafia ai le lalolagi, e lē o se maʻi ae o se faaupuga e faamatala ai le auala masani e tali atu ai tagata i faalogona lē mautonu ma suiga faaumiumi i o latou olaga, ona o faamaʻi. E ui e eseese aafiaga o faalogona lotovaivai i tagata ona o se faamaʻi e aafia ai le lalolagi, ae o nisi nei o faailoga masani:

  • Leai se uunaʻiga e fai ai se mea

  • Suiga i lau taumafa ma le moe

  • Itaitagofie

  • Popole i mea masani sa faigofie ona fai

  • Faigatā ona uaʻi lelei

  • Faalogona o le leai o se faamoemoe

 Aiseā e mataʻutia ai le lotovaivai ona o se faamaʻi e aafia ai le lalolagi?

O faalogona lotovaivai ona o se faamaʻi e aafia ai le lalolagi, e iai ona aafiaga mataʻutia iā i tatou faapea foʻi isi. Pe a tatou lē faaeteete, o le a faasolosolo ona mou atu lo tatou faanaunauga e usitaʻia taʻiala mo le faaitiitia o le pepesi o le KOVITI. O le a oo ina tatou manatu māmā ai i le mataʻutia o le vairusi, e ui o loo pepesi ma feoti ai tagata. O le luʻi o le iai i faasāsāaga, e tatou te ono mananaʻo ai i se saʻolotoga lea e ono lamatia ai i tatou faapea isi.

I lenei taimi faigatā, e toʻatele ua iloa le moni o upu a le Tusi Paia: “Po ua e lotovaivai ea i le aso o le puapuaga? O le a itiiti lou malosi.” (Faataoto 24:10) O loo aumaia i le Tusi Paia mataupu silisili e fesoasoani iā i tatou e fesagaʻia ai nei tulaga faigatā e pei o lenei faamaʻi ua aafia ai le lalolagi.

 O ā mataupu silisili o le Tusi Paia e fesoasoani e taulima ai faalogona lotovaivai ona o se faamaʻi e aafia ai le lalolagi?

  • Ia tausisi le mamao faatulagaina mai i isi, ae ia tatala pea laina o fesootaʻiga ma i latou

    Le manatu o le Tusi Paia: “O le uō moni . . . o ia o se uso ua fanau mo taimi o puapuaga.”—Faataoto 17:17.

    Aiseā e tāua ai: O uō moni e faalaeiauina ai i tatou. (1 Tesalonia 5:11) I le isi itu, o le faaesea mo se taimi umi e aafia ai lo tatou soifua mālōlōina.—Faataoto 18:1.

    Ia faataʻitaʻi: Ia fesootaʻi pea ma uō e ala i le talanoa i le telefoni e faaaogā ai le video call, pe imeli ma lafo atu ni feʻau tusitusia. Ia fesootaʻi i au uō pe afai ua lē lelei lou aso pe fai ma vili i ai po o ā mai i latou. Ia faasoa atu auala o loo fesoasoani iā te oe e onosaʻia ai mea o loo tutupu a o pepesi le faamaʻi. Ia saʻili auala e faia ai se gaoioiga agalelei i sau uō, ina ia maua ai ni faalogona lelei i lenā aso.

  • Ia fai le mea sili e mafai e tusa ma lou tulaga

    Le manatu o le Tusi Paia: “Ia outou faaaogā tatau le taimi.”—Efeso 5:16.

    Aiseā e tāua ai: O le faaaogā tatau o lou taimi, o le a fesoasoani iā te oe e iai se vaaiga saʻo ma ʻalofia ai le soona popole.—Luka 12:25.

    Ia faataʻitaʻi: Nai lo le uaʻi atu i mea ua lē mafai ona e toe faia, ae fai mea e mafai ona e faia i lenei taimi. O se faataʻitaʻiga, pe e iai ni mea ua mafai nei ona e faia ona ua maua le taimi e fai ai, po o ni mea foʻi e te fiafia e fai ua mafai ona e faataunuuina? Pe e mafai ona faaalu se taimi tele ma lou aiga?

  • Ia pipii i lau faasologa

    Le manatu o le Tusi Paia: “Ia faia mea uma i se tulaga . . . maopoopo.”—1 Korinito 14:40.

    Aiseā e tāua ai: O le toʻatele e lagona le toʻafilemu ma fiafia pe a iai se faasologa masani.

    Ia faataʻitaʻi: Ia fai sau faasologa e tusa ma lou tulaga ua iai. Ia faatulaga le taimi mo meaaʻoga, galuega totogi, feʻau i le fale faapea taimi e uaʻi ai i lou itu faaleagaga. Ia faaaofia ai foʻi isi gaoioiga aogā e pei o le faaalu o le taimi ma lou aiga, se taimi e ō ese ai ma le fale ma ia faamalositino. Ia fai ma toe iloilo lau faasologa ma fetuunaʻi pe a manaʻomia.

  • Ia faamasani i suiga o le tau

    Le manatu o le Tusi Paia: “O lē ua iai le utaga mamao e na te iloa atu le mala ma lafi ai.”—Faataoto 22:3.

    Aiseā e tāua ai: O suiga o le tau i le mea o loo e nofo ai, e ono faaitiitia ai lou mauaina o se ʻea fou faapea le susulu o le lā, lea e aogā i le tino ma le mafaufau.

    Ia faataʻitaʻi: Pe afai ua lata mai le tau malūlū, ia fai ni fetuunaʻiga i lou potu mālōlō po o le potu o loo fai ai au galuega, ina ia maua le tele o le malamalama mai le lā. Ia fai ni mea e mafai ona fai i fafo, e tusa lava pe tau malūlū. Afai e mafai, ia fai ofu māfanafana ina ia umi ai se taimi e faaalu i fafo.

    Pe a oo i le tau māfanafana, o le a toʻatele tagata e tafafao i fafo, o lea ia faaeteete. Ia fuafua po o fea nofoaga e te agaʻi i ai ma filifili taimi e lē tumutumu ai tagata.

  • Ia usitaʻia pea taʻiala mo le puipuiga o le KOVITI

    Le manatu o le Tusi Paia: “O le tagata valea e matuā ita ma soona mautinoa.”—Faataoto 14:16.

    Aiseā e tāua ai: O le KOVITI-19 o se faamaʻi oti ma e mafai ona tatou aafia ai pe a tatou faatamala.

    Ia faataʻitaʻi: Ia fai ma siaki taʻiala maufaatuatuaina i lou vaipanoa, ma vaai po o faaauau pea ona e mulimuli i ai. Ia faamautinoa e te lē o afāina i au gaoioiga faapea lou aiga ma isi.

  • Ia faamalosia la oulua faiā ma le Atua

    Le manatu o le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

    Aiseā e tāua ai: E mafai ona fesoasoani le Atua e te fesagaʻia so o se luʻi.—Isaia 41:13.

    Ia faataʻitaʻi: Ia faitau se vaega o le Afioga a le Atua i aso uma. O lenei faasologa mo le faitauga Tusi Paia e fesoasoani iā te oe e faia faapea.

Aiseā e lē faafesootaʻi ai Molimau a Ieova ina ia iloa le auala e te maua ai aogā mai i faatulagaga ua latou faia, e faaauau ai pea a latou sauniga i lenei taimi o le KOVITI-19? O se faataʻitaʻiga, ua faaaogā e Molimau a Ieova i le lalolagi polokalame i le Initaneti e fai ai a latou sauniga, faamanatuga o le maliu o Iesu ma tauaofiaga faaletausaga.

 O mau o le Tusi Paia e fesoasoani e fesagaʻia ai faalogona lotovaivai ona o se faamaʻi e aafia ai le lalolagi

Isaia 30:15: “O le a malolosi outou pe a outou nonofo fifilemu pea ma le faatuatua.”

Uiga: O le maufaatuatuaina o fautuaga mai le Atua, e fesoasoani e tatou te toʻafilemu ai i nei taimi faigatā.

Faataoto 15:15: “O aso uma o lē ua mafatia e leaga; a o lē ua lelei lona loto, e fai e lē aunoa lana faigaʻai.”

Uiga: O le uaʻi atu i mea lelei, e tatou te maua ai le fiafia e ui lava i le faigatā o le tulaga o mea.

Faataoto 14:15: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.”

Uiga: Ia utagia lapataʻiga faasoifua mālōlōina. Aua neʻi e vave manatu e lē manaʻomia na faasāsāaga.

Isaia 33:24: “E lē fai mai foʻi se tasi ua nofo ai: ʻOu te maʻi.’”

Uiga: Ua folafola mai e le Atua o le a ia faamutaina maʻi eseese uma.