Alu i mataupu o loo iai

Po o le a i ai i le Lalolagi se Faamasinogatonu?

Po o le a i ai i le Lalolagi se Faamasinogatonu?

E foliga mai ua matuā taatele le leai o se faamasinotonu i le lalolagi. Seʻi o tatou iloiloina ni faataʻitaʻiga se lua o tagata na faafalepuipuiina, e aunoa ma ni solitulafono.

  • Iā Ianuari 2018, na faatonuina ai e se faamasino i le Iunaite Setete le faasaʻolotoina o se tamāloa na faafalepuipui mo le 38 tausaga. O faamaoniga mai i DNA na iloa ai, e na te leʻi faia se solitulafono.

  • Iā Setema i le 1994, na faafalepuipui ai ni tama talavou se toʻatolu i se atunuu i Aferika, ona e latou te leʻi auai i vaegaau ona o latou lotofuatiaifo. Na atoa iā Setema 2020 le 26 tausaga talu ona faafalepuipui i latou, e aunoa ma ni moliaga aloaʻia e faatatau i se solitulafono na latou faia, po o le faia o se faamasinoga.

Pe afai na e aafia i faiga lē tonu, atonu la e pei ou faalogona o Iopu i taimi o le Tusi Paia, na faapea mai o ia: “Ua ou alaga atu pea mo se fesoasoani, ae e leai se faamasinogatonu.” (Iopu 19:7) Peitaʻi, e ui e foliga mai ua matuā taatele le leai o se faamasinotonu i le lalolagi, ae ua folafola mai e le Tusi Paia le taimi o le a iai moni lava le faamasino tonu. E lē gata i lea, e mafai ona fesoasoani le atamai mai i le Tusi Paia e tatou te fesagaʻia ai faiga lē tonu i aso nei.

Aiseā e tutupu ai faiga lē tonu?

O faiga lē tonu, e māfua mai iā i latou e teena le taʻitaʻiga a le Atua. O loo taʻua i le Tusi Paia, e mai le Atua le faamasinoga tonu. (Isaia 51:4) I le Tusi Paia, e fesootaʻi lelei upu o loo faaliliuina mai ai le “faamasinogatonu” ma le “amiotonu.” (Salamo 33:5) O gaoioiga amiotonu po o gaoioiga e saʻo ma talafeagai ma tapulaa a le Atua, e faatupu ai le faamasinogatonu. Ae o le lē faamasinotonu, e māfua mai i le agasala i le solia o tapulaa amiotonu a le Atua. Seʻi o tatou iloiloina faaaʻoaʻoga o loo mulimuli mai:

  • Manatu faapito. E fesootaʻi lelei faanaunauga manatu faapito ma le agasala. (Iakopo 1:14, 15) E faileagaina e le toʻatele isi tagata i faiga lē tonu, ina ia fai ai mea e latou te mananaʻo ai. Ae e finagalo le Atua ia tatou saʻili muamua le lelei o isi.—1 Korinito 10:24.

  • Lē malamalama. O isi e latou te faileagaina isi e aunoa ma lo latou iloaina, ma o le agasala lava lenā i le silafaga a le Atua. (Roma 10:3) O le lē malamalama na iʻu ai ina faia se faamasinoga na sili ona lē tonu, o le fasiotia o Iesu Keriso.—Galuega 3:15, 17.

  • Lē taulau o faalapotopotoga a tagata. O faiga faapolotiki, faiga faapisinisi ma faiga faalotu a lenei lalolagi, o i latou na e tatau ona faaauilumaina le feutagaʻi ma isi i se auala tonu ma faamasinotonu. Ae o le mea moni, o i latou le pogai autū o mea sesē, faiga faapiʻopiʻo, faailogatagata, manaʻo tele, matuā lē tutusa o le vaevaeina o le tamaoaiga ma le leai o se fetālaʻi o le tofā, o nei mea uma e māfua ai faiga lē tonu. O nisi o tagata o loo faaauilumaina nisi o nei faalapotopotoga, e latou te mananaʻo e fai le mea lelei. Ae o le mea moni, o taumafaiga uma a tagata e lē amanaʻia taʻiala a le Atua e matuā le taulau lava.—Failauga 8:9; Ieremia 10:23.

Pe e manatu mamafa le Atua i faiga lē tonu o loo tutupu i le lalolagi?

Ioe, e ʻinoʻino le Atua i faiga lē tonu ma uiga ma gaoioiga e māfua ai faiga lē tonu. (Faataoto 6:16-18) Na ia faagaeeina le perofeta o Isaia e tusi: “O aʻu o Ieova * ou te fiafia i le faamasinotonu, ae ou te ʻinoʻino i le gaoi ma le amiolētonu.”—Isaia 61:8.

O le tulafono na tuuina atu e le Atua iā Isaraelu anamua, e faaalia ai e finagalo le Atua ia faia e tagata le faamasinoga tonu. Na ia faatonuina faamasino ina ia teena faiga faaalatua, ma isi gaoioiga e taofia ai le faia o le faamasinoga tonu. (Teuteronome 16:18-20) Na taʻusalaina e le Atua tagata Isaraelu lē usiusitaʻi, i lo latou faia o mea piʻopiʻo ina ia latou maua ai mea mai i tagata matitiva ma faatauvaa. Na matuā teena e le Atua i latou, ona e leʻi taulau i le tausia o ana tapulaa.—Isaia 10:1-3.

Po o le a faamutaina e le Atua faiga lē tonu?

Ioe. O le a aveesea e le Atua le agasala le pogai autū o faiga lē tonu, e ala iā Iesu Keriso, ma o le a toe faafoʻisia le tulaga lelei atoatoa o tagata. (Ioane 1:29; Roma 6:23) Ua ia saunia foʻi le Malo, lea o le a aumaia se lalolagi fou amiotonu ma faia le faamasinogatonu mo tagata uma. (Isaia 32:1; 2 Peteru 3:13) Ina ia aʻoaʻoina atili e faatatau i le Malo i le lagi, ia maimoa i le vitiō O le ā le Malo o le Atua?

E faapeʻī le olaga o le a iai i le lalolagi fou amiotonu?

Pe a faia le faamasinoga tonu i le lalolagi, o le a filemu ma saogalemu tagata uma. (Isaia 32:16-18) O le a maua e tagata uma le faamasinogatonu auā e tutusa le tāua o tagata uma i le Atua. O le a lē toe iai e faavavau se faanoanoa, tagiauē, tigā, ma e lē toe manatua foʻi mea tigā e māfua ona o faiga lē tonu. (Isaia 65:17; Faaaliga 21:3, 4) Mo nisi faamatalaga, tagaʻi i le mataupu “O le ā o le a faataunuuina e le Malo o le Atua?

Pe e te talitonu moni lava i le folafolaga a le Atua e faatatau i se lalolagi e lē toe iai ni faiga lē tonu?

Ioe. O loo tusia i le Tusi Paia valoaga maufaatuatuaina, ma ua faamaonia foʻi i mea na tutupu i le tala faasolopito ma le faasaienisi le saʻo aʻiaʻi o le Tusi Paia, ma e lē feteenaʻi foʻi ona vaega. Ua faaalia ai, e mafai ona e maufaatuatuaina folafolaga o loo i le Tusi Paia. O loo iai i mataupu o loo taʻua i lalo faamatalaga auʻiliʻili:

O le ā le auala e tatou te faafetaiaʻia ai faiga lē tonu i le taimi lenei?

Na faia e tagata o le Atua mea uma na latou mafaia ina ia teena ai faiga lē tonu. O se faataʻitaʻiga, na semanū e oo i le aposetolo o Paulo ni faiga lē tonu na ono iʻu ai i le oti. Peitaʻi, e leʻi nofonofo Paulo ma talia na faiga lē tonu. Ae na ia faaaogāina tulafono a le malo o Roma e puipuia ai o ia, ma na ia tagi atu iā Kaisara.—Galuega 25:8-12.

Po o ā lava taumafaiga a tagata e faasaʻo faiga lē tonu uma i lenei lalolagi, e lē mafai ona taulau. (Failauga 1:15) Peitaʻi, e toʻatele ua latou iloa o le atiaʻeina o le faatuatua e faatatau i le folafolaga a le Atua i se lalolagi fou amiotonu, ua fesoasoani iā i latou e maua ai le filemu o le mafaufau ma le loto, e ui i faiga lē tonu o loo latou fesagaʻia.

^ pala. 9 O Ieova o le suafa o le Atua.—Salamo 83:18.