Alu i mataupu o loo iai

PE NA TEʻI LAVA UA IAI?

Le Sogisogi a le Maile

Le Sogisogi a le Maile

Ua faapea mai tagata suʻesuʻe e mafai e le sogisogi o le maile ona iloa ai le matua o le isi maile, iloa po o se maile poʻa po o se maile fafine ma iloa faalogona o isi maile. E mafai foʻi ona toleni maile ia sosogi pomu ma fualaau faasāina. E tele ina faaaogā e tagata o latou mata e iloa ai lo latou siʻomaga, ae e faaaogā e maile o latou isu. E latou te “iloa” mea i la latou sogisogi.

Ia Mātau: E matuā sili atu ona lelei le sogisogi o le maile nai i lo o i tatou. E tusa ai ma faamatalaga a le U.S. National Institute of Standards and Technology, e mafai e le maile ona sosogi ni vaega e matuā ninii lava o ni mea.

O le ā le māfuaaga e lelei tele ai le sogisogi a le maile?

  • O le isu o le maile e susū, o le māfuaaga lea e faigofie ai i le maile ona sosogi ni vaega ninii o se manogi.

  • E lua ala ʻea i le isu o le maile, o le isi e mānava ai ae o le isi e sogisogi ai. Pe a sosogi le maile, e alu le ʻea i le vaega i totonu o le isu lea e mafai ai e le maile ona sosogi le manogi o se mea.

  • O le vaega o le isu e mafai ai e le maile ona sosogi mea, e pe ā ma le 130 sikuea senitimita pe e sili atu foʻi lona telē, ae o le tagata e pe ā ma le 5 sikuea senitimita.

  • E pe ā ma le 50 taimi e tele atu ai sela e mafai ona sosogiina mea i le isu o le maile, nai lo o le isu o le tagata.

O nei mea uma ua mafai ai e le maile ona iloa vaega eseese o se manogi e faigatā ona iloa. O se faataʻitaʻiga, ua faamatalaina e nisi tagata atamamai e tatou te sosogiina le manogi o se supo, ae e mafai e le maile ona sosogi mea taʻitasi o loo i le supo.

Ua faapea mai tagata suʻesuʻe i le Pine Street Foundation o se faalapotopotoga e suʻesuʻeina kanesa, e galulue faatasi le mafaufau ma le isu o le maile, e pei “o se masini e sili ona taugatā i le paneta e mafai ona ia sosogiina so o se manogi.” Ua faia e saienitisi ni “isu” masini (electronic noses) e mafai ai ona iloa pomu, oloa e ave faananā ma faamaʻi e aofia ai le kanesa.

O le ā sou manatu? Pe na teʻi lava ua i ai le isu o le maile? Pe na foafoaina?