Alu i mataupu o loo iai

PE NA TE‘I LAVA UA IAI?

Le Ofoofogia o le Pa‘u o Sea Cucumbers

Le Ofoofogia o le Pa‘u o Sea Cucumbers

O sea cucumbers (o le ta‘uga atoa lea o meaola o le sami e pei o gau, loli, fugafuga, sea ma isi) o meaola e nonofo i le ta‘ele o le sami ma ‘amu o le aau. E patupatu, talatala ma e iai sea cucumbers e maama‘ai o latou pa‘u. E mafai e sea cucumbers ona faavavai o latou tino, pe faamalō fo‘i i ni minute po o ni sekone. O le iai i sea cucumbers o se tino faapea, ua mafai ai ona faaofi i totonu o ni tama‘i pū ma faamalō ai ina ia lē mafai ai e o latou fili ona toso mai i fafo. O le māfuaaga e mafai ai e sea cucumbers ona faia faapea ona o latou pa‘u.

Ia Mātau: E mafai e sea cucumbers ona faamalō tia‘a, faamalō feoloolo pe faavavai fo‘i o latou pa‘u. Ina ia sui le malō po o le vaivai o latou pa‘u, e faapipii faatasi e sea cucumbers laina (fibers) o loo faia a‘e ai lona pa‘u ina ia faamalō ai, ae e na te faamatalatala na laina pe a faavaivai. E faaaogā e sea cucumbers polotini eseese e faamalō pe faavavai ai lona pa‘u.

O polotini ia e faamalō ai le pa‘u o sea cucumbers e latou te faia ni mea e pei o ni auala laupapa ninii po o ni filifili i le va o laina lea e faia a‘e ai le pa‘u o sea cucumbers, ma o le māfuaaga lenā e malō tia‘a ai lona pa‘u. O polotini ia e faavavai ai le pa‘u o sea cucumbers e latou te tatalaina filifili ia na faamalō ai laina o le pa‘u. O le pa‘u o le sea cucumbers e mafai ona matuā vavai e tai pei o le a liusuavai.

Ua faia e saienitisi mea e faata‘ita‘i ai le auala e faamalō pe faavavai ai e sea cucumbers lona pa‘u. O se tasi o latou sini, o le fausia lea o uaea (electrodes) e faaaogā mo taotoga o le fai‘ai. O na uaea e mafai ona matuā faamalō ina ia faaofi i le vaega tonu o le fai‘ai lea e siaki, ma e mafai fo‘i ona faavavai. Pe afai e mafai ona maua ni uaea e mafai ona faamalō pe faavaivai e pei o le pa‘u o le sea cucumbers, e telē la le avanoa e manuia ai le taotoga.

O le ā sou manatu? Pe na teʻi lava ua iai le pa‘u o sea cucumbers? Pe na foafoaina?