“E ono tausaga o le ma tama teine ina ua ma talanoa i ai mo le taimi muamua e faatatau i le ʻava malosi, ma na matuā faateʻia i maʻua i le tele o mea ua ia iloa e faatatau i le ʻava malosi.”​—Alexander.

•  Mea e tatau ona iloa

•  Auala e fai ai

•  Manatu o le Tusi Paia e faatatau i le ʻAva Malosi

 Mea e tatau ona iloa

 E tāua le talanoa i le fanau e faatatau i le ʻava malosi. Aua le faatali seʻi matua lou alo ona faatoʻā talanoa lea i ai i lenā mataupu. Ua faapea mai Khamit o se tamā mai i Rusia: “Maʻimau pe ana vave ona ma talanoa i le ma tama e faatatau i le faaaogāina o le ʻava malosi. Na ou iloa le tāua o le faia faapea ina ua tupu se faafitauli, ma na ou iloa ane na amata ona fai ma masani a loʻu atalii le inu i le ʻava malosi, i le 13 o ona tausaga.”

 Aiseā e tāua ai?

•   E mafai ona aafia le vaaiga a le fanau i le ʻava malosi, mai i ē latou te aʻoʻoga faatasi, faasalalauga, ma le televise.

•   E tusa ai ma faamaumauga a se tasi o faalapotopotoga o le soifua mālōlōina i le Iunaite Setete, o le 11 pasene o i latou e taumafaina le ʻava malosi i le Iunaite Setete, o tamaiti e leʻi atoa tausaga faatulagaina.

 O le māfuaaga lenā ua fautuaina ai e ofisa o soifua mālōlōina mātua, ina ia aʻoaʻo a latou fanau a o lāiti, e faatatau i lamatiaga o le ʻava malosi. E faapefea?

 Auala e fai ai

 Ia nofosauni e tali fesili a le fanau. O le natura o le fanau o le fia malamalama, ma a o faasolo ina matutua, o le tele foʻi lenā o mea e latou te fia iloa. O lea, e tatau ona e iloa lelei le auala e tali atu ai. O se faataʻitaʻiga:

•   Pe a fia iloa e lou alo po o le ā le tofo o le ʻava malosi, e mafai ona e fai i ai o le uaina e fai sina oona, ae e sili atu ona oona le pia.

•   Pe a fia tofo lou alo i le ʻava malosi, ia fai i ai e malosi tele mo tamaiti. Ia faailoa i ai aafiaga o le ʻava malosi. E lagona ai le niniva, lē saʻo ai gaoioiga e fai, pe fai ai foʻi ni faamatalaga e toe salamō mulimuli ane ai.​—Faataoto 23:29-​35.

 Ia e malamalama lelei i le mataupu. Ua faapea mai le Tusi Paia: “O lē e iai le utaga mamao e gaoioi ma le poto.” (Faataoto 13:16) E tatau ona e iloa lelei aafiaga o le ʻava malosi, tulafono e faatatau i le faaaogāina o le ʻava malosi, ma tausaga faatulagaina i lou atunuu. O le a e nofosauni ai e fesoasoani i lau fanau.

 Ia tausolomua e talanoa e faatatau i le mataupu. Ua faapea mai se tamā mai i Peretania e igoa iā Mark: “O le toʻatele o talavou e lē malamalama atoatoa i lenei mataupu. Na ou fesili i loʻu atalii e valu tausaga po o le ā sona manatu e faatatau i le inuina o le ʻava malosi. Na ou talanoa faasamasamanoa i ai, ma na saʻoloto ai e faailoa mai ona manatu.”

 O le tele e te talanoa ai i lau fanau e faatatau i le ʻava malosi, o le a latou iloa ai le tāua o lenā mataupu. Pe a talanoa i le fanau i mataupu tāua o le olaga e pei o le saogalemu i luga o le auala ma feusuaʻiga, ia faaaofia ai ma le ʻava malosi, e fua i lo latou matutua.

 Ia faataatia se faaaʻoaʻoga lelei. E pei tamaiti o ni meapuʻeata, e latou te puʻeina uma mea e vāai i ai. Ua faaalia i suʻesuʻega, e sili atu ona telē le taaʻiga a mātua i fanau. O lona uiga, pe a fai ma au masani le inu o le ʻava malosi ina ia faatoʻafilemu ma aveese ai popolega, o le a faia foʻi faapea e lou alo pe a feagai ma popolega o le olaga. O lea, ia avea oe ma faaaʻoaʻoga lelei o le faaaogā ma le faautauta o le ʻava malosi.