Hanenty ty anatiny ao

Vavolombelo Jehovah

Hifily safà Vezo

Asa Fandikan-teny a Meksika noho an’Amerika Anivo Any

Asa Fandikan-teny a Meksika noho an’Amerika Anivo Any

Misy mpandika teny 290 eo ho eo mipetraky amy firenena eny a Meksika noho an’Amerika Anivo any. Mandika boky ara-baiboly amy safà 60 mahery rozy. Manino rozy ro miezaky manao raha zay? Satria azo antoky fa midosiky ty fon’olo ty boky ara-baiboly amy safàny sady mazava soa aminy, laha zay ro amea azy.—1 Korintianina 14:9.

Nafindra tamy tanà mampiasa safà iny any ty mpandika teny sisany baka amy birò ty sampana ahy ty Vavolombelo Jehovah a Mexico, renivohitsy Meksika any. Ino ty antony? Mba ho afaky hifandramby noho hifankazatsy amin’olo mampiasa any safà iny. Hanampy amy fanasoava ty fandikan-teny raha zay. Hazava soa ty boky noho gazety adikan-drozy amy zay sady tsy ho sahira loatsy rozy lafa mandika azy.

Nanao akory ty fihetseham-po mpandika teny nafindra reo? Hoy Federico, mpandika teny amy safà guerrero nahuatl: ‘Fianakavia raiky avao ro nihitako hoe nampiasa ty fivolanako tanaty folo tao nipetrahako ta Mexico tany zay. Fe amy henanizao, lafa nafindra zahay, le ty ankamaroan’olo mipetraky manodidy anay ro mampiasa ty safànay.’

Mpandika teny amy safàm-paritsy alemà Karin, le a Chihuahua, a Meksika any ie ro mandika teny. Hoy ty asany: “Lasa arako ty fivoarany safà ampiasà ty Menonita satria mariny an-drozy etoy ty ipetrahako. Kelikely tanà iny, ka mijilo an-dafonety eo avao aho le fa mahita olo maro mety hahazo tombony baka amy asa fandikan-teny ataonay.”

Nivola koa Neyfi, miasa amy biròny fandikan-teny a Mérida, a Meksika any hoe: “Lafa mampianatsy Baiboly amy safà Maya zahay, le manjary hainay ty safà sarotsy azony Maya, ka mila fomba tsotra handikà any safà rey zahay.”

Ka ino ty tombony azon’olo mahazo boky noho gazety amy safàny rey? Misy ohatsy raiky toy. Fa 40 tao teo ho eo ro nivory tsy tampaky niaraky tamy Vavolombelo Jehovah Elena. Tlapanec ro safàny Elena kanefa amy safà espaniola ty nanaova fivoria, ka tsy nisy raha azony ty tao. Hoy ty asany: “Teako ty mandeha am-pivoria any le zay avao ty antony ivoriako.” Fe nianatsy Baiboly tamy bokikely amy safà tlapanec ie tafara atoy, ka nihananjeky ty fitiavany any Jehovah. Nanoka ty vatany ho ahy Jehovah ie, ka natao batisa tamy 2013. Hoy Elena: “Misaotsy Jehovah aho satria nengany hahay ty raha volany amy Baiboly ao.”