Hanenty ty anatiny ao

Vavolombelo Jehovah

Hifily safà Vezo

Fizarà Diploma Tamy Sekoly Faha-136 amy Sekoly Mifototsy amy Baiboly ahy Gileada

Fizarà Diploma Tamy Sekoly Faha-136 amy Sekoly Mifototsy amy Baiboly ahy Gileada

Nandaliky soa ty raha amy Baiboly ao tanaty ty limy vola ty mpianatsy tamy sekoly faha-136 amy Sekoly Gileada Mifototsy amy Baiboly, le nizara diploma rozy tamy Sabotsy 8 Marsa 2014. Nianara Vavolombelo Jehovah za-draharaha reo tamy sekoly iny, ty fomba hahità vokatsy soa amy fanompoany noho ty fomba hanatanjaha ty finoa ty Vavolombelo Jehovah namany. Nisy olo 11 548 ro nanatriky fizarà diploma io. Ao ty nanatriky mivanta tamy foibem-pampianara ty Vavolombelo Jehovah a Patterson, New York any, le ty sisany nanaraky tamy video, ta Kanada, Jamaika, Porto Rico, noho Etazonia.

“Mba Tano Aminareo ao Avao Toe-tsay Toy.” David Splane, anaty ty Filan-kevi-pitantana ty Vavolombelo Jehovah ro mpanolotsy fandahara. Nataony mifototsy tamy Filipianina 2:5-7 ty lahateniny. Voasoratsy ao hoe: “Mba tano aminareo ao avao toe-tsay toy, azy fa tamy Kristy Jesosy ao iny koa.” Tsy niasa loha marè tamy ty pilasy nitanjahany Jesosy tamy ie tan-tany tetoy, ka niambany noho be zotom-po tamy asa Ndranahary.

Nangalaky safà baka amy lahateny natao Mosesy ho ahy ty firenena Israely, ohatsy, Jesosy lafa namaly ty fakam-panahy kiraidraiky natao Devoly, ka nivolaniny avao hoe “Voasoratsy hoe.” (Matio 4:4, 7, 10; Deoteronomia 6:13, 16; 8:3) Tsy ty fahefàny amy maha anaky Ndranahary azy ro namaliany any Satana. Niambany avao ie ka natorony hoe teany ty asa natao Mosesy. Tokony hekentsika koa hoe mahay ty hafa, sady tsy tokony ho halinontsika ty midera an-drozy.

Navahy Rahalahy Splane mazava soa koa hoe manao akory ty nampisehoa Jesosy toe-tsay soa, lafa tampitsy ty fiofanany tan-tany etoy. Ho zao ty nivolaniny lafa nivavaky ie: “Fa nanome voninahitsy anao aho tan-tany etoa satria vitako ty asa nampanovinao ahy. Ka henanizao, lahy Baba, ameo voninahitsy anilanao eo aho, le ty voninahitsy nananako tanilanao teo tamy mbo tsy nisy zao tontolo zao.” (Jaona 17:4, 5) Tsy nila tombotsoa fanampiny Jesosy. Nangataky avao ie ty mba hampimpolia azy tamy ty pilasiny taloha, lafa mimpoly an-danitsy any. Tokony hifantoky amy asa hataony koa mpianatsy amy Sekoly Gileada reo, fa tsy amy ze pilasy ho tanjahany. Tokony ho afa-po rozy, lafa mimpoly amy ze pilasy anendrea an-drozy any, ndre tsy amea tombotsoa fanampiny aza.

“Ka Anenena ty raha Nafoinareo.” Mpanampy ty Komity ty Fampianara amy Filan-kevi-pitantana eo William Malenfant. Nampirisihiny hahafoy ty vatany manahaky apostoly Paoly mpianatsy rey. Nisy raha nafoy Paoly lafa nanompo any Jehovah ie. Fe tsy nanonofinofy raha rey sasy ie. Hoy ty asany: “Manalino ty raha fa afara any aho, le miezaky marè hanatratsy ty aloha eo.”Filipianina 3:13, 14.

Hanahaky ty mpanompo Jehovah tsy mivaliky taloha noho henanizao mpianatsy reo, laha tsy maneny amy ty raha nafoin-drozy. Niresaky mikasiky any Clara Gerber Moyer, ohatsy, Rahalahy Malenfant. Mbo kelikely ranabavy io lefa nanomboky nanompo Jehovah. Hoy ty asany: “Tombotsoa vatany ty mitoliky any zay 80 tao mahery nanolorako ty vatako ho amy fanompoa a Ndranahary—tsy misy fanenena zay! Laha azoko atao ty mampimpoly ndraiky ty fiainako, le hiay manahaky zay ndraiky aho.”

“Mitory Fanjakà iny Miaraky amy Anjely sady manahaky ty Anjely.” Nazavany Gerrit Lösch, anaty ty Filan-kevi-pitantana tamy mpianatsy reo, fa mana tombotsoa manoka roe ty mpitory. Voalohany, sahala hoe anjely Ndranahary rozy lafa mitory ty vaovao soa Fanjakà iny. Satria azo adika hoe “mpanday hafatsy” koa ty safà hebreo noho grika nadika hoe “anjely” amy Baiboly ao. Faharoe, anjely ro mitariky ty fitoria atao mpianatsy reo, manahaky ty raha niseho tamy Filipo.Asan’ny Apostoly 8:26-35.

Nitantara raha maro hita ty Vavolombelo Jehovah tam-pitoria eny Rahalahy Lösch, bakeo. Namaipaiky inefatsy tamy trano raiky, ohatsy, Gabino, mpitory a Meksika any. Zatsy namaipaiky indraiky na indroe avao mpitory io talohany zay. Nivola olo namoha varavara iny fa, fa ho namono fo ie. Hoy ty asa nahoda io: “Fa finehiko ... ty vozoko tamy iha namaipaiky faninefatsiny iny. Fe nivahako ndraiky taly iny mba hamohako anao. Misaotsy anao namaipaiky avao. Satria laha tsy zay le fa nimaty aho zay.”

Ndraidraiky, le mety hoe toraky mifanendriky amim-boro avao ty nahateo ty mpitory amy fitantara mahanahaky zay. Fe haintsika fa maro amy fitantara rey ro manaporofo hoe mitariky ty asa fitoria amy tany toy iaby ty anjely Ndranahary.—Apokalypsy 14:6.

“Hotahỳ Azy Nahazo Voninahitsy Iny” Michael Burnett, raiky amy mpampianatsy tamy Sekoly io, ro namelabelatsy any foto-kevitsy io. Niresaky mikasiky any Jabeza, taranaky Joda, azy “nahazo voninahitsy kokoa mandilatsy ty rahalahiny iny” ie. Nivavaky tamy Ndranahary, Jabeza hoe: “Laha hitahy ahy vatany iha, ka hanitatsy ty faritaniko, sady hanampy ahy ty tananao, le hiaro ahy tsy ho voan-doza iha, ...”—1 Tantara 4:9, 10.

Afaky manahaky any Jabeza mpianatsy reo lafa manao vavaky voafaritsy soa, sirtò lafa mivavaky amy Jehovah mba hampiany hahavita soa ty raha kendrè tamy fampiofana tamy sekoly iny. Mety koa laha mivavaky rozy mba hiarova Jehovah an-drozy amy loza na hoe mba hanampea Jehovah an-drozy tsy halahelo na ho kivy marè amy ty raha raty, fa tsy hoe mba tsy hisy loza mihintsy hahazo an-drozy. Namaly ty vavaky Jabeza, Jehovah, ka hamaly ty vavaky atao mpianatsy reo koa.

“Engaho Hirehitsy Avao ty Afonareo.” Nifototsy tamy 1 Tesalonianina 5:16-19 ty lahateny natao Mark Noumair, mpampianatsy tamy sekoly iny sady mpanampy ty Komity ty Fampianara. Mila petroly noho oksizeny voho hafanà ty afo mba hirehitsy avao. Misy raha telo koa, ilà ty mpianatsy mba hahavy an-drozy hafana fo amy fanompoa avao.

Voalohany, “mifalifalia avao.” (1 Tesalonianina 5:16) Ho falifaly mpianatsy reo lafa mametsivetsy hoe mahazo hatò amy Jehovah, sady fitahia bevata raha zay. Faharoe, “ka mieny mivavaky.” (1 Tesalonianina 5:17) Sahala oksizeny mamelo afo ty vavaky. Tokony ho lavalava ty vavaky ataontsika satria mampiboaky ty raha am-pontsika ao amy Jehovah tsika. Fahatelo, “misaotra amy ty raha iaby.” (1 Tesalonianina 5:18) Laha tea misaotsy tsika, le hafana ty fifandrambesantsika amy Jehovah noho rahalahintsika reo. Hoy Rahalahy Noumair: “Mahaiza misaotsy zisiky farany, fa sahala hafanà raha zay. Sady ka tea kinokino, fa sahala nintsy raha zay.”

“Miderà any Jehovah Miaraky amy ty Lanitsy.” Hevitsy baka amy Baiboly ao ro nanomboha Sam Roberson, mpampianatsy tamy sekoly iny, ty lahateniny. Natorony hoe midera any Jehovah iaby ty masoandro noho ty vola voho ty basia. (Salamo 19:1; 89:37; 148:3) Nivola ie fa mana tombotsoa hidera any Jehovah koa mpianatsy reo. Nampoliny tamy alala ty fampisehoa bakeo ty sisany tamy ty raha nihita ty mpianatsy tam-pitoria eny. Toy ty ohatsy raiky, najano ty mpianatsy raiky tomabily nandesiny iny, mba ho afaky hiampita lala vato iny ty lahilahy raiky nandeha tamy sezy misy larò. Nisaotsy azy lahilahy iny, le nisaorany koa. Nifampiresaky rozy, le naneky hianatsy Baiboly lahilahy iny. Afaky nitory taminolo maromaro nisafo lahilahy iny mpianatsy tamy Sekoly Gileada io, lafa nampianatsy azy tanaty ty herinandro maromaro. Farany, le nisy olo fito nianatsy Baiboly vokatsy ty resaky tamy voalohany iny.

“Mihamatanjaky Avao amy Alala ty Fampianara Ndranahary.” Nanadihady mpivaly roe tamy mpianatsy reo Donald Gordon, mpanampy ty Komity ty Fanamboara. Nivola ty raiky tamin-drozy, fa nimpolimpoly tamy sekoly iny ty Efesianina 3:16-20. Nahavy an-drozy “hohatanjahy” raha zay satria nanampy any mpianatsy reo hiambany sady ho mora vonjè voho haneky hoe mbo maro ty asa tea Jehovah hampanaovy ty Vavolombelo Kiraidraiky. Nivola koa ty raiky taminolo nadikadìny rey hoe nisy mpampianatsy nampirisiky an-drozy mba tsy hanahaky fia bevata anaty koveta kelikely misy rano ka tsy afaky mitombo sasy, fa mba hanahaky anaka fia anaty riaky be ao. Hoy ie: “Nianarako tamy raha iny hoe laha manday ty vatako manahaky ty maliniky aho amy fandamina Jehovah, le hampeany hitombo ara-panahy.”

“Mba ho Tiaro Jehovah Lahy Iha, Sady Hahazo Hatò Aminy.” Io ty lahateny fotosty, ka Mark Sanderson, anaty ty Filan-kevi-pitantana, ro nanao azy. Ty vavaky natao Nehemia hoe: “Mba tiarovo lahy aho Ndranahary, ka le mba hahazo hatò aminao” ro nangalà lahateny io. (Nehemia 5:19; 13:31) Tsy hoe natahotsy Nehemia, tsy no ho halino Jehovah ty raha nataony mba hanompoa azy. Nangataky tamy Jehovah avao ie mba hahazo hatò aminy, sady mba ho tahiny.

Afaky matoky koa mpianatsy reo hoe hahazo hatò amy Jehovah rozy lafa hotiaroviny, laha manoriky ty raha nianaran-drozy tamy Sekoly Gileada iny. Tokony ho ty fitiavan-drozy any Jehovah amy fon-drozy iaby, ohatsy, ro antony voalohany hivavahan-drozy aminy. (Marka 12:30) Tea any Jehovah amy ty fony iaby Abrahama, ka le nitea azy vatany Jehovah lafa nahatiaro azy. Mbo kinaiky Jehovah hoe “namako” avao ie, ndre fa arivo tao tafara ty nahafaty azy aza.”Isaia 41:8.

Nampitiarovy Rahalahy Sanderson mpianatsy reo bakeo, mba ho tea ty namany, sirtò fa ty fianakaviany ara-panahy. (Marka 12:31) Tokony hiezaky hanao raha hanampea ty olo mila fanampea rozy, manahaky ty natao Samaritanina soa fanahy, niezaky “hanjary nama azy nitratsy ty malaso iny.” (Lioka 10:36) Nataony ho ohatsy ty tantara Nicholas Kovalak, misionera Gileada sady mpiandraikitsy vondrom-paritsy taloha. Malaza ho soa fanahy noho be fitiava ie. Ndraiky zay le nampirisihiny ho be zotom-po amy fanompoa ty mpiandraikitsy mpitety faritany raiky noho ty valiny, ka nivolanany hoe soa nareo laha manomboky “aloha sanandro, sankerinandro, sambola, voho santao.” Fe nidinihiny tanaty andro vitsivitsy ranabavy iny, le hoy ty asany taminy: “Ka ivakia loha raha nivolaniko iny, satria fa manao ze ho vitanao iha. Ataovo milamina avao, soa haharitsy amy fanompoa iha.” Torohevitsy feno hasoam-panahy zay ro nanampy ranabavy iny hanompo amy fotoa iaby tanaty ty tao maro.

Farany, le nampirisihy Rahalahy Sanderson mpianatsy reo, mba hanatratsy ty raha kendrè tamy sekoly iny, ka hampianatsy noho hampiofana ty hafa. (2Timoty 2:2) Afaky manatanjaky noho mampitsatoky soa ty mpiara-manompo aminy rozy amy zay, amy ze pilasy anendrea an-drozy any sady matoky fa hahazo hatò amy Jehovah, lafa hotiaroviny.

Famarana. Lafa baka zinara tamy mpianatsy rey ty diploman-drozy, le namaky taratsy fisaora ty solontena ty mpianatsy. Tamy fitamperany ty fandahara, le nanao hira raiky baka amy Mihirà ho An’I Jehovah ao ty 15 tamy mpianatsy reo. Ty hira faha-123 hoe “Lehilahy ho Fanomezana Ireo Mpiandry”, ro nataon-drozy.