Ho zao ty lohateny bevata tamy gazety Frankfurter Rundschau: “Manahaky fivoriam-pianakavia” raha io. Nitovy hevitsy amy zay iaby ty mpanatriky.

Hoy ty asany Karla, baka a Porto Rico any: “Nandramby soa ahy rozy. Le ataho raha an-trano any avao aho.”

Nivola hozao koa Sara, baka an’Aostralia any: “Sahala mamangy fianakavia an-tany lavitsy any avao aho.”

Manino olo reo ro nahatsapa mahanaky zay? Nahità any zay ty fivoriambe iharoam-pirenena natao ty Vavolombelo Jehovah tamy 18 zisiky 20 Jolay 2014 ta Commerzbank-Arena a Francfort am Main, an’Alemaina any. Nisy 37 000 teo ho eo ty mpanatriky.

Tafavory tao rozy mba hianatsy Baiboly. Nisy famakia Baiboly, hira, vavaky, noho tantara janjìny tamy fandaharam-pampianara iny.

Vavolombelo baka an-tanà eo ro nanatriky fivoriambe io. Fe nisy solontena 3 000 koa baka an’Aostralia, Grande-Bretagne, Gresy, Liberia, Serbia, Afrika Antimo, noho Etazonia. Nisy Vavolombelo 234 baka amy firenena 70 koa nanatriky tao, tafilitsy amy zay azy manao karazam-panompoa manoka rey, ohatsy hoe misionera.

Nisy pilasy 19 tan’Alemaina any, afaky nanentea fandahara iny mivanta tamy alala ty video nalefa amy Internet. Tafilitsy amy zay koa Aotrisy noho Soisy. Nisy 204 046 ty olo nanatriky tamy pilasy reo.

Tsy Voasaka Ndre teo ty Tsy Fitovia

Nadika tamy safà Anglisy, Alemà noho Grika fandahara iny ta Francfort any. Fa tamy pilasy hafa reo, le nadika tamy safà 17 ty lahateny. Tafilitsy amy zay ty safà Arabo, Sinoa, Tamoul, Tiorka noho Safà roe Atao amy Tana.

Fe ndre samby hafa fivolana, foko noho fiavia aza ty Vavolombelo nanatriky tao, le tsy misaratsaraky fa mifankatea soa avao. (Jaona 13:34, 35) Nifanday manahaky mpirahalahy noho mpirahavavy rozy.

“Hitanay soa fa tsy misy raha afaky manaka antsika tsy hifankatea,” hoy Tobias baka Grande-Bretagne any.

Hozao koa ty nivolany Davianna, baka Porto Rico any: “Nifankahita tamy Vavolombelo baka amy tanà 20 aho tao. Miharo raiky tsika, satria tea any Jehovah noho ty mpiara-manompo amintsika.”

Hoy ty asany Malcom solontena baka an’Aostralia any: “Tamy tanà kelikely raiky zay aho ro nanjary Vavolombelo Jehovah. Namaky lahatsoratsy mikasiky ty fifankatiava ty Vavolombelo aho sady nanenty video mikasiky raha zay. Tena tsapako raha iny henanizao sady manjary misy vokany amiko. Vomaiky manatanjaky ty finoako ty fiaviako etoa.”

Tea Nandramby Vahiny

Nanòma kadò noho fiaraha harivariva ho ahy ty solontena vahiny, ty Vavolombelo baka amy fiangona 58 an-tanà eo noho ty nanodidy any Francfort.

Nivola hozao Cynthia, baka Etazonia any: “Nisoasoa biby ty fandrambesa nataon-drozy. Be fitiava noho soa fanahy voho matariky rozy. Tsy ho halinoko mihintsy zay.”

Hoy Simon mipetraky an’Alemaina any: “Miaraky homehy noho falifaly zahay, ka hita hoe mifankatea vatany. Maro ty raha azonao ianara baka amin’olo hafa.”

Solontena baka an’Aostralia any Amy. Hozao ty fanamarihany: “Niporofoeny fiaraha iny tamiko hoe, tsy olo mafanafo fahatany amy fivavaha ty Vavolombelo Jehovah sady tsy mampijaly vata. Tena mahay miala voly tsika, sady mety soa ty anaovantsika azy.”

Fahatiarova Soa Biby

Tany sivy amy tany toy iaby ro nanaova fivoriambe iharoam-pirenena iny, tafilitsy amy zay ty a Francfort etoa.

Nanontanea solontena raiky nanatriky fivoriambe ta Francfort tetoa iny hoe, nanao akory ty tany? Hozao ty valin-teniny: “Eritsereto hoe misy longonao marìny anao, fe tsy hainao. Ohatsy hoe ty rahalahinao. Teany biby iha, lafa mifankahita nareo ka rambesiny soa an-tranony ao. Tsy hainao ty hivolana ty hafaleanao. Ampitombò 37 000 fifaleanao zay. Manahaky zay ty nitsapako tany.”