Hanenty ty anatiny ao

Vavolombelo Jehovah

Hifily safà Vezo

Nitanjaky Pilasy 19 000

Nitanjaky Pilasy 19 000

Nisy taratasy baka amy Filan-kevi-pitantanani-Vavolombeloni-Jehovah tamy Jolay 2013. Natao ho ahi-ty misionera noho ty mpanompo amy fotoa iaby manoka manompo ivelany tany misy azy raha io. Nambara tamy taratasy io tao hoe nisy fandahara natao mba hanampea ani-mpanompo amy fotoa iaby reo ho afaky hanatriky fivoriambe na fivoriambe iharoam-pirenena an-taniny any. Nampihary tamy 2014 zisiky amy voalohandohany 2015 raha zay.

Tsy hoe hanampea ani-mpanompo amy fotoa iaby miasa an-tonda eny reo hanatriky fivoriambe avao fandahara zay, fa natao hanampea an-drozy hanam-potoa hiaraha ami-ty fianakavian-drozy na ty naman-drozy koa. Hita baka amy taratasy iny fa ty fandamina ro hiatoky ty forèn-drapolany handehanan’olo reo.

Ndre fa nisy fandahara manahaky zay avao taloha, le tena niavaky tamy tao io satria nisy sampan-draharaha vaovao natsanga tamy foibe tany, mba hikarakara ty fitanjaha pilasy handehana rapolany. Ty Komitini-Fampianara amy Filan-kevi-pitantana eo ro miandraikitsy ani-sampan-draharaha vaovao io.

Tafara kelikeliny nandefasa ani-taratasy iny, le fa nanomboky niavy tamy sampan-draharaha io any ty fangataha bièn-drapolany. Nanjary maro biby fangataha zay tamy Zanviè 2014. Mpanompo amy fotoa iaby maro baka amy tany maro ro nanao fitanjaha pilasy.

Tsy mora ty nandamy raha rezay. Nisy mpanompo amy fotoa iaby baka a Reykjavík, an’Islandy any, ohatsy, nitanjaha pilasy mba ho a Cochabamba, a Bolivia any. Ty sisany baka a Nouméa, a Nouvelle-Calédonie any, handeha Antananarivo, Madagasikara atoy. Ao koa ty baka Ouagadougou, a Burkina Faso any, handeha a Winnipeg, a Kanada any. Ty sisany aza baka a Port Moresby, a Papouasie-Nouvelle-Guinée any, handeha a Seattle, a Etazonia any.

Olo limy ro miasa amy sampan-draharaha iny ao, le pilasy 19 000 teo ho eo ro nitanjahan-drozy. Olo 4 300 teo ho eo baka amy tany 176 ro niviliana noho nadefasa biè. Fa nisy drala nameani-fiangona mba handoava ty fandania amy raha zay.

Nahafalifaly ani-mpanompo amy fotoa iaby reo ty fisiani-fandahara iny. Hoy misionera mpivaly rezay: “Fa himpoly amy tanà nanendrea anay an’Azia Atimoantinana any zahay henanizao. Misaotsy anareo bevata nanampy anay, satria afaky nisafo an’Angletera tanin-drazanay zahay. Zay zahay vo tafaraky tamini-fianakavianay, tanatiny limy tao zay. Tsy ho niavy tany mihintsy zahay laha tsy teo fandahara iny. Manao mahavelo bevata anareo ze nikarakara mivanta ani-fandahara iny koa zahay.”

Nanoratsy misionera raiky manompo a Paragoay any zay hoe: “Misaotsy bevata anareo zahay morovaly satria afaky nanatriky fivoriambe iharoam-pirenena ta New Jersey, an’Etazonia tany. Nanao fandahara zahay tamy voalohandohani-tao 2011 hoe mba hitsidiky amy foibe an’Etazonia any. Fa namory drala mihintsy zahay mba hanaova raha zay. Fe nampitsidihy fiangona mampiasa safà atao amy tana a Paragoay eto zahay, tamy Jona 2011. Tsy maintsy nandeha lava zahay tamy raha zay. Farany lafa nandiniky soa zahay, le nanampa-kevitsy hoe tsy handeha an’Etazonia any, fa hiviliananay tomabily drala iny mba hampiasànay amy fanendrea vaovao niazonay zay. Fe nitanteraky avao nofinofinay iny, satria nahazo fanasà hanatriky fivoriambe iharoam-pirenena zahay. Soa fanahy noho be fitiava Jehovah, ka le misaotsy azy bevata zahay.”

Nivola koa mpivaly raiky baka a Malawi any zay hoe: “Mandefa hafatsy kelikely aminareo zahay mba hisaoranay bevata anareo. Azonay an’eritseritsy ty asa mafy nataonareo, noho ty fotoa voho drala be laninareo tamy fikarakara fitanjaha pilasa maro biby rey. Mankasitraky anareo zahay. Isaoranay bevata koa ty fandaminani-Jehovah satria matariky. Nampeany zahay ka afaky namonjy fivoriambe an-taninay any sady afaky nitsidiky fianakavia noho namanay rey.”

Falifaly biby koa mpiasa tamy sampan-draharaha iny tao. Hoy Mileivi: “Tena miavaky aloha hoe manampy misionera himpoly an-taniny mba hahita ty fianakaviany noho ty namany zao.” Nivola koa Dorise hoe: “Hitako tamy fandahara iny hoe tena teani-fandamina ranadahy noho rahavavy mpanompo amy fotoa iaby manompo ivelany taniny any reo.” Nivola koa Rodney, mpiandraiky ani-Sampan-draharaha iny hoe: “Falifaly biby aho nandramby anjara tamy fandahara iny.”

Falifaly ty Vavolombeloni-Jehovah amy tany toy iaby fa afaky nandramby anjara tamy fandahara io. Be fitiava rozy ka nanao fanomeza ho ahi-ty rahalahy noho anabavin-drozy mahafoy ty vatany noho manompo ivelany tany misy azy any reo.