Hanenty ty anatiny ao

Vavolombelo Jehovah

Hifily safà Vezo

Mitory amy Faritsy Mitoka Farany Avaratsy Any

Mitory amy Faritsy Mitoka Farany Avaratsy Any

Nanome toromariky mikasiky ty fandahara vaovao raiky ty Filan-kevi-pitantanani-Vavolombeloni-Jehovah tamy 2014, mba hitoria ty hafatsy amy Baiboly ao amy ty olo farany avaratsini-Eoropa noho Ameriky Avaratsy any. (Asan’ny Apostoly 1:8) Ty faritsini-Alaska (Etazonia), Laponie (Failandy), Nunavut noho ty Faritany Avaratsiandrefa (Kanada) any avao tse ro nifantoha.

Fa ela ty Vavolombeloni-Jehovah ro nitory tamy faritsy mitoka rey. Fe tsy nijano ela tany rozy, ka matetiky ro fizarà boky noho gazety mifototsy amy Baiboly avao ro afaky nataon-drozy.

Fe lafa natao fandahara vaovao io, le nanasa mpitory amy andro iaby (mpisava lala) mba hijano any telo vola farafahakeliny, ty biraoni-sampana miandraikitsy ty asani-Vavolombeloni-Jehovah amy faritsy mitoka farany avaratsy any reo. Fe laha maro ty olo ta hianatsy Baiboly, le afaky mijano any elaela mandilatsy ani-zay mpitory reo, sady afaky manao fivoria ho ahi-ty maro mihintsy aza.

Mazava ho azy, fa mana raha manahira mampiavaky azy ty amy faritsy avaratsy any. Nisy mpisava lala roe, ohatsy, voatendry ta Barrow, a Alaska any. Ty raiky nipetraky tamy faritsy antimoni-Kalifornia, le ty raiky ta Géorgie a Etazonia any. Nilatsakini-38 degrè ambanini-zero (-36 °F) ty nintsy tamy asotry voalohany niavian-drozy tany. Fe ndre zay, fa manaly ty trano iaby amy tanà io ao ro nivoatsidikin-drozy tanatini-vola vitsivitsy avao, sady nanomboky nitariky fampianara Baiboly efatsy rozy, ka tanatini-zay ty pamaraky raiky mana anara hoe John. Nianatsy tamy boky hoe Ino Marina ro Ampianary ty Baiboly? John noho ty ampela raiky miaraky aminy, sady resahiny amy ty namany noho ty mpiaraky miasa aminy ze raha ianarany. Mampiasa ty programa hoe JW Library amy telefoniny koa ie, mba hamakia teny hodinihy sanandro amy Fandinihana ny Soratra Masina Isan’andro ao.

Amy faritanini-Nunavut, a Kanada any ro misy ty tanà atao hoe Rankin Inlet, sady tsy misy lala handehana ty manàny. Nandeha rapolany amy tanà kelikely io any ty mpisava lala roe, ka nanomboky nampianatsy Baiboly olo maro rozy. Lafa baka nanenty video hoe Ino ty Raha Atao amy Efitrano Fanjakà Any? ty lahilahy raiky, le nanontany hoe mbia ty amin-drozy any ro hanorena Efitrano Fanjakà. Mbo nivola koa ie hoe “laha mbo etoa aho lafa manory Efitrano Fanjakà nareo, le hivory aho.”

Im-poloni-isakin’olo ty isakini-serfa a Savukoski, a Failandy any. Voatendry ho any ty mpisava lala roe. Nivola rozy hoe “manintsy marè ty atoy sady be lanezy.” Fe, nivola koa rozy fa soa fiavy. Ino ty antony? Hoy ty asan-drozy hoe ‘afaky niresaky tamin’olo iaby tao zahay, satria nafahin’olo ty lanezy nandrakotsy ty lala mandeha amy tanà kelikely noho tanà lavitsy rey, sady nijano tan-tranony any iaby ty olo satria nanintsy marè ty andro.”

Nahakinto olo ty ezaky nataontsika mba hitoria mikasiky ty Baiboly amy faritsy mitoka farany avaratsy any. Nitsidiky beni-tanà amy tanà raiky a Alaska any, ohatsy, ty mpisava lala roe lahy. Nivola raha soa mikasiky ty resakin-drozy tamy tranonkala raiky fampitam-baovao, beni-tanà io tafarani-zay, sady nasiany sarini-taratasy mivalo hoe Ino Fanjakà Ndranahary Zao? ty tao.

Nanao fivoria tamy famakiam-bokim-pokonolo ta Haines, a Alaska any ty mpisava lala roe, le olo valo ro niavy tao. Nivola ty gazety tao, fa niavy an-tanà eo ty lahilahy roe baka a Texas noho Caroline Avaratsy any, sady manasa ty olo kiraidraiky mba hampianarin-drozy Baiboly an-tranon’olo iny any. Ho zao ty namaranani-gazety io ty safàny: “Milira amy jw.org laha mila fanazavà maromaro.”