Tea a Ndranahary noho ty mpiara-belo aminay zahay Vavolombeloni-Jehovah ka zay ty antony mahavy anay ho falifaly lafa miresaky ty hafatsini-Baiboly amin’olo iaby, anatini-zay azy nivola hoe: “Tsy ahoako ino zao” rey. (Matio 22:37-39) Ty fitiavanay a Ndranahary ro manosiky anay hanoriky ty didini-Anakiny iny mba ‘hitory ka hanazava soa.’ (Asa 10:42; 1Jaona 5:3) Mba hanaovanay ani-raha zay, le mandeha mitory matetiky zahay, manahaky ty raha nataoni-mpaminani-Ndranahary taloha. (Jeremia 25:4) Teanay ty mpiara-belo aminay, ka le miezaky koa zahay hizara raha mamonjy ay amin’olo iaby, tsy ino zay fa ty “vaovao soani-Fanjakà iny.” Tafilitsy amy zay ndre ty olo tsy nijanjy anay tamy voalohany rey.—Matio 24:14.

Matetiky ro mahita olo kinto zahay lafa mimpoly amy trano nisy olo tsy nandramby anay taloha rey. Retoa misy antony telo:

  • Olo vo nifindra trano ty ao.

  • Misy olo hafa kinto ty amy trano io ao.

  • Niova olo iny. Mampiova olo sisany ty raha miseho amy tany toy na ty raha miseho amy fiainany, ka manjary “mahatiaro hoe mila a Ndranahary” ie sady manjary kinto amy ty hafatsy amy Baiboly ao. (Matio 5:3) Ndre mpanohitsy aza ty olo, le afaky miova ty fony, manahaky ty ani-Apostoly Paoly.—1Timoty 1:13.

Fe ndre zay, tsy miforosè olo hijanjy ty hafatsinay zahay. (1Petera 3:15) Maneky zahay fa ty olo kiraidraiky ro tsy maintsy manapa-kevitsy mikasiky ty fivavaha teany.—Deoteronomia 30:19, 20.