Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 TY FIAINANTSIKA KRISTIANA

Fiaraha Miasa mba Hitoria amy Faritany Misy Olo Mampiasa Safà Samby Hafa

Fiaraha Miasa mba Hitoria amy Faritany Misy Olo Mampiasa Safà Samby Hafa

Mora mandramby ty hafatsy mikasiky Fanjakà iny ty ankamaroan’olo lafa maharè ani-raha zay amy safàn-drazany. Mety ho zay ro nahavy ani-Jehovah hanao fandahara manoka, tamy Pentekosta tao 33. Nampahareziny ty vaovao soa amy ‘safàn-drazany iaby’ ty “Jiosy baka amy firenena iaby ambanini-lanitsy” etoy, ndre mety ho afaky nampiasa safà iharoa aza rozy, ohatsy hoe Hebreo na Grika. (As 2:5, 8) Mety hisy fiangona maromaro koa henanizao, miasa amy faritany raiky avao, fe mivory amy fivolana samby hafa, satria misy olo mampiasa fivolana samby hafa ty amy faritaniny. Mila mahay miaraky miasa ty mpitory amy fiangona rey mba hitoria amin’olo iaby, fe tsy hampimpolimpoly asa marè ka hampeloky ty olo amy faritany eny. Akory ty hanaova ani-zay?

  • Mifampiresaha (Oh 15:22): Tokony hifampiresaky ty mpiandraikitsini-fanompoa amy fiangona voakasiky rey sady hanenty fomba fitoria ty vaovao soa mety amin-drozy iaby. Mety ho teani-fiangona mitory amy fivolana hafa rey, ohatsy, laha tsy itorianao ty olo mampiasa ty safàni-fiangonany, laha kelikely ty faritanin-drozy. Fe laha tsy vitan-drozy itoria ara-potoa ty olo iaby amy faritanin-drozy satria miparitaky amy faritsy bevata, le mety ho tean-drozy laha tsy misy trano dinganinao fa ambaranao an-drozy ze olo kinto nihitanao amy faritanin-drozy. (od 93 § 37) Na mety hangataky amy fiangonanareo rozy, mba hanampy an-drozy hila olo mampiasa ty safàni-fiangonan-drozy, bakeo hampiliry amy faritanin-drozy ty adiresin’olo rey. (km 7/12 5, efajoro) Ka halino fa mety hampiasa fivolana mandilatsini-raiky ty olo anatini-trano raiky. Lafa mandamy fomba fiasa hamità faritany nareo, le araho ty lalàna amy tany misy anareo eo, amy fiarova ty fanazavà mikasiky olo kiraidraiky.

  • Miaraha miasa (Ef 4:16): Oriho soa ty toromariky azonao baka amy mpiandraikitsini-fanompoanareo. Manao akory ohatsy laha mana mpianatsy Baiboly iha, fe tsy safà ampiasani-fiangonanareo iny ro mety aminy? Mety handroso malaky ie laha afindranao amy fiangona na antoko-mpitory marìny mbeny mampiasa ty safàny.

  • Miomàna (Oh 15:28; 16:1): Laha hafa ty fivolanan’olo amy faritany eny, le anovo ze farani-vitanao mba hanambarà ty vaovao soa. Azonao atao ty mioma amy raha zay. Diniho ze fivolana mety hampiasan’olo amy faritaninareo eny, le ampiliro sandrany amy fitaova elektronikinao ao ty Baiboly noho video amy fivolana reo. Afaky mampiasa JW Language koa iha, mba hianara miarahaba amy fivolana sisany.