Hanenty ty anatiny ao

Vavolombelo Jehovah

Hifily safà Vezo

Toromariky amy Fivoria Mikasiky Fiaina Noho Fanompoa Kristiana

Toromariky amy Fivoria Mikasiky Fiaina Noho Fanompoa Kristiana

Loha Hevitsy Anatiny Atoa

 

Fehintsoratsy

Safà Fampilira

 2

Hanana Lafovily Baka amy Baiboly

 3

Fianara Manompo

 4

Ty Fiainantsika Kristiana

 5

Safà Famarana

 6

Miezaha Marè amy Vakiteny Noho Fampianara

 7

Torohevitsy

 8

Fotoa amy Anjara

 9

Fitsidihani-Mpiandraikitsini-Faritsy

 10

Herinandroni-Fivoriambe

 11

Herinandroni-Fahatiarova

 12

Mpiandraikitsini-Fivoria Mikasiky Fiaina Noho Fanompoa

 13

Mpitariky Fivoria Mikasiky Fiaina Noho Fanompoa

 14

Anti-panahy Mpandrindra

 15

Mpanome Torohevitsy Mpanampy

 16

Kilasy Fanampiny

 17

Video

 18

1. Ze voasoratsy amy toromariky toy noho amy Kahiem-pivoria amy Fiaina Noho Fanompoa Kristiana ao ro harahy amy Fivoria Mikasiky Fiaina Noho Fanompoa Kristiana. Ampirisiho ty mpitory iaby mba ho parè hotendrè hanao anjarani-mpianatsy. Afaky mandramby anjara koa ze olo hafa fa miaraky tsy tampaky amy fiangona, laha maneky ty fampianarani-Baiboly noho miay mifanaraky amy fitsipiky kristiana.—be p. 282.

 2. Safà Fampilira: 3 minity na latsaky. Sankerinandro, le hivola raha hahavy ty mpanatriky ho kinto amy ty raha hodinihy ty mpitariky Fivoria Mikasiky Fiaina Noho Fanompoa lafa vita ty hira noho vavaky fanokafa, ka tafilitsy amy zay ty fampiboaha soa ty fanontanea raiky baka amy Valini-Fanontanea amy Fiaina Noho Fanompoa Kristiana.

 3. Hanana Lafovily Baka amy Baiboly:

  • Lahateny: 10 minity. Hita amy Kahiem-pivoria amy Fiaina Noho Fanompoa ao ty foto-kevitsy, miaraky amy hevitsy bevata roe na telo. Anti-panahy na mpanampy amy fanompoa mahay ro hanao ani-anjara io. Lafa manomboky boky vaovao ty fandahara famakia Baiboly, le hisy video halefa mba hampilira azy. Mety hiresaky ani-video iny ty mpandahateny lafa manazava ty foto-kevitsy. Fe tokony hataony azo antoky hoe voaresaky iaby ty hevitsy amy kahiem-pivoria ao. Laha ampy ty fotoa, le tokony hampiasany soa koa sary noho andinin-teny rey satria natao ho fanampini-hevitsy resahiny koa raha rey.

  •   Fihalia Safira Ara-panahy: 8 minity. Fanontanea noho valiny, tsy misy safà fampilira noho safà famarana, tarihini-anti-panahy na mpanampy amy fanompoa mahay. Afaky zarazarany ty fotoa amy anjarany mba hampiboaha soa hevitsy efatsy reo noho ty fomba azo anoriha azy amy fiangona eo. Fe ty mpanatriky ro tokony hengany hamaly ty fanontanea iaby. Ie koa ro hifily hoe mila vakỳ iaby andinin-teny tonony amy fanontanea roe voalohany rey, sa tsy voatery. Tsy tokony handilatsy ty 30 segondy ty valin-tenini-mpandramby anjara.

  • Famakia Baiboly: 4 minity na latsaky. Ataoni-rahalahy. Hamaky ty raha nampamakỳ azy ty mpianatsy, fe tsy hanao safà fampilira na famarana. Zao ty raha hifantohani-mpitariky fivoria: hanampy ty mpianatsy hamaky teny tsy misy diso noho misosa, misy fanamafisa mety soa, fanovaovam-peo, fijanona mety soa, sady hanampy azy hahazo ty raha vakỳ noho sahala miresaky andavanandro.

  4. Fianara Manompo: 15 minity na latsaky. Natao hanomeza ze raha azo orihy amy fanompoa noho hanasoava ty fahaiza mitory noho mampianatsy fizarà toy. Tokony hataoni-mpianatsy rey mifototsy amy Hevitsy Azo Resahy amy pejy voalohany amy Kahiem-pivoria amy Fiaina Noho Fanompoa ao iny ty anjara fitoria noho fimpolia mitsidiky. Azoni-mpitory iny atao ty mampitoro boky na video amy Fitaova Fianara Baiboly rey, laha teany. Hita amy Kahiem-pivoria amy Fiaina Noho Fanompoa ty fotoa hanaova ani-anjara iny, le mety hisy toromariky fanampiny koa ty ao kindraiky. Mety hahavita ty fampisehoany minity raiky mialoha na alohani-zay ty mpianatsy nanoma soa. Tsy mila manampy hevitsy hafa sasy ie amy zay, satria avao hoe ta handany ty fotoa namea azy. Mety hahazo anjarani-mpianatsy koa ty anti-panahy laha ilà.

  • Video Hevitsy Azo Resahy: Hisy video fifampiresaha modely halefa noho hiaraha midiniky anatini-herinandro vitsivitsy mifanarakaraky, sambola. Ho hita amy video reo ao ty fitoria noho fimpolia mitsidiky voalohany noho faharoe. Ty mpitariky Fivoria Mikasiky Fiaina Noho Fanompoa ro hitariky ani-anjara io.

  • Fitoria: Ataoni-rahalahy na anabavy. Tokony ho samby lahilahy na samby ampela na fianakavia raiky ro miaraky manao ani-anjara toy. Afaky mitsanga na mipetraky ty mpianatsy mana anjara noho ty mpanampy azy. Hampiasa fomba fiarahabà mety an-tanà eo ty mpianatsy. Hevitsy azo resahy iny ro tokony hampiasà amy resadresaky io.

  • Fimpolia Mitsidiky Voalohany: Ataoni-rahalahy na anabavy. Tokony ho samby lahilahy na samby ampela ty tomponi-anjara toy noho ty mpanampy azy. (km 5/97 p. 2) Afaky mifily rozy na hipetraky na hitsanga. Tokony hatoroni-mpianatsy iny hoe ino ty volany lafa mimpoly mitsidiky ani-ze olo nikinto tamy fitoria. Hevitsy azo resahy amy Kahiem-pivoria amy Fiaina Noho Fanompoa iny ro tokony hampiasà amy resadresaky io.

  • Fimpolia Mitsidiky Faharoe: Ataoni-rahalahy na anabavy. Tokony ho samby lahilahy na samby ampela ty tomponi-anjara toy noho ty mpanampy azy. (km 5/97 p. 2) Afaky mifily rozy na hipetraky na hitsanga. Tokony hatoroni-mpianatsy iny hoe ino ty volany lafa mimpoly mitsidiky ani-ze olo nikinto tamy fimpolia mitsidiky voalohany. Hevitsy azo resahy iny ro tokony hampiasà amy resadresaky io.

  • Fampianara Baiboly: Ataoni-rahalahy na anabavy. Tokony ho samby lahilahy na samby ampela ty tomponi-anjara toy noho ty mpanampy azy. (km 5/97 p. 2) Afaky mifily rozy na hipetraky na hitsanga. Tampany amy fianara Baiboly fa natomboky ro tokony haseho amy anjara toy, ka tsy mila safà fampilira na famarana, laha tsy hoe takỳ amy mpianatsy iny raha zay. Tsy voatery hovakỳ iaby ty fehintsoratsy amy loharanon-kevitsy iny,  ndre mety ho azo atao aza raha zay. Tokony haboaky soa tekniky amy fahaiza mampianatsy rey.

  • Lahateny: Lahateny ataoni-rahalahy ho ani-fiangona.

  5. Ty Fiainantsika Kristiana: Afarani-hira, le hisy anjara raiky na roe ty 15 minity amy fizarà toy mba hanampea ty mpanatriky hanoriky ty Safà-Ndranahary. Afaky manao ani-anjara toy ty anti-panahy na mpanampy amy fanompoa mahay, laha tsy misy fanamariha manoka. Anti-panahy avao ro tokony hanao ty raha ilàni-fiangona.

  • Fianara Baiboly: 30 minity. Ataoni-anti-panahy mahay. (Laha vitsy ty anti-panahy amy fiangona ao, le afaky manao ani-anjara io ty mpanampy amy fanompoa mahay.) Ty anti-panahy iaby ro manampaky hoe ia ro afaky mitariky ty Fianara Baiboly. Ze mitariky le tokony hanao ze hahavità ty fianara ara-potoa, manazava soa ty andinin-teny fototsy, hanampy ty mpanatriky hahita fa mahasoa ty hevitsy dinihy. Hahita torohevitsy hanampy an-drozy rozy laha manenty ndraiky ty tari-dala amy fitariha fianara Tilikambo Fiambena. Tokony hiova sankerinandro ty mpitariky noho ty mpamaky laha azo atao. Laha mivola ty mpitariky Fivoria Mikasiky Fiaina Noho Fanompoa fa tokony hahena ty fotoa hanaova ani-fianara iny, le azy mpitariky fianara iny ro hanapa-kevitsy amy ty fomba hampihenany azy. Mety tsy hampamakìny ty fehintsoratsy sisany.

  6. Safà Famarana: 3 minity na latsaky. Hofintinini-mpitariky Fivoria Mikasiky Fiaina Noho Fanompoa iny ty hevitsy mahasoa sisany tamy fivoria iny, anatini-zay ty fanontanea noho valiny baka amy Valini-Fanontanea amy Fiaina Noho Fanompoa Kristiana. Tokony hiresaky kelikely mikasiky ty hevitsy hodinihy amy herinandro manaraky koa ie, ka mety hovolaniny ty fanontanea hovalea. Azony volany koa ty anarani-mpianatsy handramby anjara amy herinandro manaraky, laha ampy ty fotoa. Laha tsy misy toromariky manoka, le amy safà famarana ty mpitariky fivoria ro hanao fampandrenesa, na hamaky ze taratasy tokony hovakỳ amy fiangona. Tsy tokony hatao fampandrenesa amy lampihazo eny ty fandahara mahazatsy sankerinandro manahaky ty fitoria noho ty fanadiova fa hapetaky amy tablò misy fanambarà. Laha tsy ampy hanaova fampandrenesa, na hamakia taratasy ty fotoa tokony hanaovani-mpitariky fivoria safà famarana, le tokony hovolaniny ze mana anjara amy Ty Fiainantsika Kristiana mba hampihena ty halavani-anjarany. (Henteo  fehintsoratsy 5 noho  9.) Tampery amy hira noho vavaky ty fivoria.

 7. Miezaha Marè amy Vakiteny Noho Fampianara: Manomboky amy herinandroni-7 Zanviè 2019, le tokony hampiasa ty bokikely Fampianara ty mpitariky Fivoria Mikasiky Fiaina Noho Fanompoa lafa midera noho manome torohevitsy. Tokony hiezaky ty mpianatsy kiraidraiky mba hanoriky soa ty fianara voasoratsy anaty fononteny anilani-anjarany amy Kahiem-pivoria amy Fiaina Noho Fanompoa ao. Amy herinandro voalohany amy vola, le hataoni-mpitariky Fivoria Mikasiky Fiaina Noho Fanompoa fiaraha midiniky miaraky amy mpanatriky ty fianara raiky baka amy bokikely Fampianara. Natao hampiasani-mpianatsy ty fizarà hoe “Henteo ty Fandrosoanao” amy bokikely iny, ka tsy tokony hanoratani-mpitariky.

  8. Torohevitsy: Saky vita ty anjara kiraidraiky ataoni-mpianatsy, le mana minity raiky eo ty mpitariky Fivoria Mikasiky Fiaina Noho Fanompoa, mba hanomeza safà fiderà noho torohevitsy, baka amy bokikely Fampianara. Tsy horesahini-mpitariky iny ty raha takỳ amy mpianatsy iny lafa mampilitsy anjara iny ie. Fe lafa vita anjara iny, le hanao safà fiderà maeva ani-mpianatsy iny ty mpitariky, bakeo azony volany hoe ino ty raha takỳ, le akory ty nahavitani-mpianatsy ani-raha zay, na ho soa fanahy ie lafa manazava amy mpianatsy iny hoe manino ie ro mbo mila manohy  miezaky marerè amy raha io. Afaky miresaky lafiny hafa amy fampisehoa iny koa ty mpitariky laha hitany hoe hahasoa ani-mpianatsy iny na ty mpanatriky raha zay. Azony amea torohevitsy mitoka, baka amy bokikely Fampianara na boky Sekolin’ny Fanompoana, mpianatsy iny, mikasiky ty raha nitakỳ taminy na raha hafa. Hataony afarani-fivoria na amy fotoa hafa raha zay.—Henteo ty  fehintsoratsy 13 noho  16 mba hahità fanazavà fanampiny mikasiky ty asani-mpiandraikitsy Fivoria Mikasiky Fiaina Noho Fanompoa, noho ty asani-mpanome torohevitsy mpanampy.

    9. Fotoa amy Anjara: Tsy tokony handilatsy fotoa ty anjara iaby, anatini-zay ty fanamarihani-mpitariky fivoria. Tokony hajano ty anjarani-mpianatsy lafa tampitsy ty fotoa, fe mahaiza mandanjalanja lafa manao ani-zay. Tokony hanome torohevitsy mitoka ty mpanome torohevitsy mpanampy, laha anjara hafa amy fivoria ro mandilatsy fotoa. Haharitsy lera raiky noho 45 minity ty fivoria iaby, anatini-zay ty hira noho vavaky.

 10. Fitsidihani-Mpiandraikitsini-Faritsy: Tokony hanaraky ze voasoratsy amy Kahiem-pivoria amy Fiaina Noho Fanompoa ty fivoria, amy fitsidihani-mpiandraikitsini-faritsy. Ty Fianara Baiboly avao ro tsy atao, fa hosoloa amy lahateny mikasiky fanompoa maharitsy 30 minity, ataoni-mpiandraikitsini-faritsy. Alohani-lahateny io, le hofintinini-mpitariky Fivoria Mikasiky Fiaina Noho Fanompoa ty fandahara natao teo. Hiresaky kelikely ty hevitsy horesahy amy herinandro manaraky ie, hanao fampandrenesa noho hamaky ze taratasy ilà, bakeo hampilitsy ty mpiandraikitsini-faritsy. Lafa vita lahateny mikasiky fanompoa iny, le ty mpiandraikitsini-faritsy ro hanampitsy ty fivoria amy hira raiky nifiliny. Tsy misy kilasy fanampiny amy fitsidihani-mpiandraikitsini-faritsy. Tokony hitoka avao ty antoko-mpitory amy safà hafa ndre amy fitsidihani-mpiandraikitsini-faritsy. Fe hiaraky amy fiangona rozy amy lahatenini-mpiandraikitsini-faritsy iny.

 11. Herinandroni-Fivoriambe: Tsy misy fivoria amy herinandroni-fivoriambe. Tokony hatao fianara am-bata na hatao amy fotoam-pivavahani-fianakavia ty raha tokony hianara amy herinandro io.

 12. Herinandroni-Fahatiarova: Laha amy andavanandro ty Fahatiarova, le tsy hisy Fivoria Mikasiky Fiaina Noho Fanompoa amy herinandro io. Mazava ho azy fa tokony hisy fivoria alohani-fanompoa amy androni-Fahatiarova iny.

  13. Mpiandraikitsini-Fivoria Mikasiky Fiaina Noho Fanompoa: Anti-panahy raiky filini-anti-panahy iaby ro ho mpiandraikitsy Fivoria Mikasiky Fiaina Noho Fanompoa. Ie ro hanao ze hahazoa antoky hoe voalamy soa noho mifanaraky amy toromariky atoa retoa ty fivoria. Tokony hifampiresaky soa amy mpanome torohevitsy mpanampy ie. Tokony ho avy le alaminy ty anjarani-mpianatsy, laha vo azony ty Kahiem-pivoria amy Fiaina Noho Fanompoa. (Henteo  fehintsoratsy 4.) Tokony hozarà telo herinandro alohani-daty hanaova azy ty anjarani-mpianatsy, ka ty taratasy Anjara amy Fivoria Mikasiky Fiaina Noho Fanompoa (S-89) ro hampiasà.

 14. Mpitariky Fivoria Mikasiky Fiaina Noho Fanompoa: Anti-panahy raiky sankerinandro ro ho mpitariky Fivoria Mikasiky Fiaina Noho Fanompoa. (Azo tendrè koa ty mpanampy amy fanompoa mahay laha vitsy ty anti-panahy amy fiangona ao.) Homaniny ty safà fampilira noho famarana voho ty fiaraha midiniky ani-ze video fifampiresaha modely amy herinandro iny noho ty video mampilitsy fianara vaovao amy bokikely Fampianara. Ie koa ro hampilitsy ty anjara kiraidraiky, sady mety hanao anjara hafa, laha vitsy ty anti-panahy. Tsy tokony hatao lava ty resaky lafa mampilitsy anjara. Ty anti-panahy iaby ro hanampaky hoe ia iaby ro afaky hifandimby hitariky. Mety hitariky fivoria matetiky mandilatsy ty anti-panahy hafa voatingy ty mpiandraikitsy Fivoria  Mikasiky Fiaina Noho Fanompoa, arakaraky ty raha misy an-tanà eo. Laha mahafeno fepetra hitariky Fianara Baiboly ty anti-panahy raiky, le tokony hahafeno fepetra hitariky fivoria koa. Fe tiarovo fa ty mpitariky fivoria ro hanome safà fiderà noho torohevitsy am-pitiava ho ani-mpianatsy mana anjara. Ie koa ro manao ze hahavy ani-fivoria iny ho vita ara-potoa. (Henteo  fehintsoratsy 6 noho  9.) Azoni-mpitariky fivoria iny atao ty mampiasa mikrô misy tombony amy sisini-lampihazo eo, laha tendriky ty eo. Ho afaky hangalaky pilasy sandrany amy zay ty rahalahy hanao anjara manaraky, amy fotoa ampilirany azy. Azoni-mpitariky fivoria atao koa ty mipetraky amy sezy aloha eny amy anjara Famakia Baiboly noho Fianara Manompo. Mety hitsitsy fotoa raha zay.

 15. Anti-panahy Mpandrindra: Ie ro manome ty anjara amy fivoria iaby, ankoatsini-anjarani-mpianatsy. Anatini-zay ty fanendrea ty mpitariky fivoria sankerinandro, fe ze fa nekeni-anti-panahy iaby hanao raha zay avao ro ampiasàny. Hiaraky miasa soa amy mpiandraikitsy Fivoria Mikasiky Fiaina Noho Fanompoa ie, ka tokony hapetany amy tablò eo ty listani-ze mana anjara amy fivoria sankerinandro.

  16. Mpanome Torohevitsy Mpanampy: Soa laha anti-panahy mahay mandahateny ro manao andraikitsy toy. Ie ro hanome torohevitsy mitoka ho ani-anti-panahy noho mpanampy amy fanompoa, mikasiky ze anjara ataon-drozy, laha ilà. Anatini-zay ty anjara amy Fivoria Mikasiky Fiaina Noho Fanompoa, lahateny ho ahi-ty maro, fitariha na famakia teny amy Fianara Tilikambo Fiambena na Fianara Baiboly. (Henteo  fehintsoratsy 9.) Azo soloa santao ty mpanome torohevitsy mpanampy laha maro ty anti-panahy mahay mandahateny noho mampianatsy amy fiangona eo. Tsy voatery hanome torohevitsy ie saky misy rahalahy nanao anjara.

 17. Kilasy Fanampiny: Mety hanisy kilasy fanampiny ty fiangona, laha maro ty mpianatsy. Tokony hisy mpanome torohevitsy mahay amy kilasy fanampiny io, sady soa laha anti-panahy. Azo tendrè hitariky ani-kilasy io koa ty mpanampy amy fanompoa mahay laha ilà raha zay. Ty anti-panahy iaby ro hanampaky hoe ia ro hitariky kilasy fanampiny io na koa hoe hatao mifandimby ty mitariky azy. Ty fomba fiasa resahy amy  fehintsoratsy 8 ao ro tokony harahini-mpanome torohevitsy. Laha misy kilasy fanampiny, le hampandehany amy efitsy hanaovany anjara any ty mpianatsy lafa vita ty Fihalia Safira Ara-panahy amy fizarà hoe Hanana Lafovily Baka amy Baiboly. Mimpoly amy efitrano bevata ao ndraiky rozy lafa vita ty fizarà hoe Fianara Manompo. Lafa misy video atao fiaraha midiniky, le tokony hanenty na hijanjy baka amy efitrano fanampiny ao avao ze amy kilasy fanampiny any, laha mety. Laha tsy zay, le hampiasa fitaova elektroniky ze mitariky ao mba handefasa video noho hanaova fiaraha midiniky.

 18. Video: Hisy video hampiasà amy fivoria toy. Hatao amy JW Library ao video reo, le azo alà amy fitaova sankarazany raha zay. Azo alefa amy fivoria alohani-fanompoa koa kindraiky video fifampiresaha modely rey, lafa baka nalefa tamy Fivoria Mikasiky Fiaina Noho Fanompoa.