Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-53

Nahasaky Raha Joiada

Nahasaky Raha Joiada

Nana anakampela raty fanahy biby manahaky azy zay Jezebela. Atalia ty anarany. Valini-mpanjakani-Joda iny Atalia io. Lafa nimaty valiny iny, le ty anakilahini-Atalia ro nanjary mpanjaka. Fe lafa nimaty anakilahiny io, le nivonoany iaby ze olo hitany hoe mety ho mpanjaka. Ndre ty zafiny aza nivonoany, amy zay ie ro ho mpanjaka. Natahotsy azy iaby ty olo.

Joiada ty Mpisorobe tamy zay, le Joseba ty valiny. Nihain-drozy morovaly ty raha raty nataoni-Atalia, ka navonin-drozy tamy tempoly tao Joasy, zafini-Atalia iny, le nitezan-drozy tao. Mety ho nivonoa rozy laha nitratsy.

Lafa nifeno fito tao Joasy, le navorini-Joiada iaby ty mpitariky noho ty Levita, ka nivolaniny hoe: ‘Ambeno soa ty varavarani-tempoly tsy no hisy olo hilitsy.’ Bakeo nasiani-Joiada satrokini-mpanjaka ty lohani-Joasy. Lasa mpanjakani-Joda amy zay Joasy! Le nivola marè biby vahoaky rey hoe: ‘Ho lava velo lahy iha mpanjaka!’

Nireni-Atalia vahoaky rey nikorakoraky iny, ka nana amy tempoly any malaky ie. Lafa nihitany hoe nisy mpanjaka vaovao tao, le nikoikoiky ie hoe: ‘Mpamadiky! Mpamadiky!’ Nisamborini-mpitariky rey mpanjakavavy raty fanahy iny, bakeo nandesin-drozy amonto any, le nivonoan-drozy. Ka tsy fa nanjary nanahaky ani-Atalia koa va vahoaky rey?

Nampanovini-Joiada fifanekea tamy Jehovah olo rey hoe Jehovah raiky avao ro hivavahan-drozy. Nivolanini-Joiada rozy mba handrava ty tempolini-Bala noho hamotipotiky ty sampy iaby. Nitingy mpisoro noho Levita hiasa tamy  tempolini-Jehovah ao koa ie, soa ho afaky hivavaky amy Jehovah ndraiky ty olo. Bakeo ie nanendry olo hiamby ty varavarani-tempoly, amy zay tsy misy olo maloto ho tafilitsy ao. Nandesini-Joiada noho mpitariky rey tan-dapa any Joasy tafarani-zay, le napetrakin-drozy tamy sezi-mpanjakà eo. Nifalifaly biby ty olo ta Joda any. Afaky nivavaky amy Jehovah amy zay rozy henanizao fa tsy amy Bala. Fa tsy eo sasy koa Atalia, azy mpanjakavavy raty fanahy iny. Tsy hitanao va hoe nahasoa olo maro ty fahasakiani-Joiada?

“Ka matahotsy ani-ze mamono mahafaty anareo, kanefa tsy afaky manampitsy ty fiainanareo ho avy, fa aleo matahotsy ani-azy mahavita mandripaky anareo amy Gehena ao iny.”—Matio 10:28