Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-42

Nahasaky Raha Jonatana Sady Tsy Nivaliky

Nahasaky Raha Jonatana Sady Tsy Nivaliky

Jonatana ty voalohany amy anakilahini-Saoly Mpanjaka. Maramila ie sady tsy mba navaka zao. Nivola Davida hoe mahalay mandilatsy voromahery io ie sady matanjaky mandilatsy liona. Ndraiky andro Jonatana nahita maramila filistinina tanaboni-vohitsy raiky zay. Nivola tamy mpanday fitaova fialiany iny ie hoe: ‘Fa nivola Jehovah hoe laha mitao antsika hialy Filistinina reo, le hanafiky tsika fa ho resintsika rozy.’ Nivola vatany Filistinina rey hoe: ‘Avia bakao hialy!’ Farany niakatsy teny rozy roe lahy, le niresin-drozy maramila 20 rey.

Jonatana ro tokony ho mpanjaka manarakaraky ani-Saoly, satria ie ty anakilahiny voalohany. Fe Davida ro nifilini-Jehovah. Tsy nialona Jonatana lafa nihainy raha zay. Nanjary mpinama biby aza rozy roe amy Davida. Nanao fifanekea rozy hoe hifampiaro noho hifanampy  avao. Tena nifankatea rozy, ka nameani-Jonatana ani-Davida ty sikiny, ty sabatsiny, ty kititsiny, noho ty sentirany.

Nilay ani-Saoly Davida ndraiky zay, le namonjy azy Jonatana. Hoy ty asany: ‘Mahereza! Ka matahotsy fa fa nifilini-Jehovah ho mpanjaka iha. Ndre babako aza mahay ani-zay.’ Tsy teanao va laha manahaky ani-Jonatana ty namanao?

Tsy indraiky avao ty nanampeani-Jonatana ani-Davida. Nanampy azy avao ie ndre ho nahafaty azy aza raha zay. Hainy hoe ta hamono ani-Davida Saoly, ka nivolaniny hoe: ‘Manota iha laha mamono ani-Davida. Tsy raha nanao raty anao anè ie.’ Neloky tamy Jonatana Saoly tamy zay. Tafara atoy, le samby nimaty tan’aly any Saoly noho Jonatana.

Lafa nimaty Jonatana, le nila ani-Mefiboseta anakilahini-Jonatana Davida. Hoy Davida lafa nahita ani-Mefiboseta: ‘Hikarakara anao avao aho, satria mpinama biby zahay amy babanao. Hipetraky an-tranoko atoa iha, le hiaraky hihina amiko avao.’ Tsy nihalinoni-Davida mihintsy Jonatana.

‘Mifankatiava nareo manahaky ty nitiavako anareo. Tsy misy mana fitiava bevata mandilatsy ani-zao, le ty mahafoy ty ainy ho ahi-ty namany.’—Jaona 15:12, 13