Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-38

Nataoni-Jehovah Matanjaky Biby Samsona

Nataoni-Jehovah Matanjaky Biby Samsona

Nivavaky tamy sampy ndraiky ty Israelita maro, farany nengani-Jehovah hanerisery an-drozy ty Filistinina. Fe mbo nisy Israelita nitea ani-Jehovah avao. Anatini-zay ty lahilahy raiky atao hoe Manoa. Tsy nanan’anaky rozy morovaly. Naniraky anjely hiresaky amy valini-Manoa iny Jehovah ndraiky andro. Nivola taminy anjely iny hoe: ‘Hanan’anakilahy iha. Ie ro hanafaky ty Israelita amy Filistinina reo. Ho Nazirita ie.’ Hainao va Nazirita zao? Nazirita zao olo manao fanompoa manoka ho ani-Jehovah, sady tsy mahazo mihety.

Niteraky anakilahy vatany ry Manoa, le nataony hoe Samsona ty anarany. Nataoni-Jehovah matanjaky biby Samsona lafa nihabe. Nahavita namono liona ie, ndre tsy nisy raha nandesiny. Nisy fotoa aza ie raiky avao namono Filistinina 30. Nalay azy vatany Filistinina reo ka nataon-drozy ze hahafaty azy. Niroro ta Gaza any Samsona ndraiky zay, le nambenan-drozy tam-bavahady teo soa hovonoan-drozy lafa maraindray. Fe nifoha Samsona lafa sasakaly, le nandeha tam-bavahady eny, bakeo nombotany vavahady iny. Nilanjany an-tsorokiny eo vavahady iny, le nandesiny zisiky anaboni-vohitsy raiky anilani-vohitsy Hebrona eny.

Lafa nandeha ty fotoa, le niaraky tamin’ampela mana anara Delila zay Samsona. Nivolanini-Filistinina rey Delila hoe: ‘Ta hanambotsy ani-Samsona zahay fa hogadranay ie. Hameanay volafoty 5 500 iha laha atoronao anay hoe ino raha mampatanjaky azy io.’ Teani-Delila ho azo drala iny ka naneky ie. Tsy nety nivola taminy mihintsy Samsona tamy voalohany. Fe tsy nengangani-Delila ie fa niforosevany avao. Farany ie nivola hoe: ‘Nazirita aho, le mbo tsy niheteza mihintsy ty voloko. Fa laha mihety io, le tsy matanjaky sasy aho.’ Nanao raha hanenenany mihintsy Samsona!

Avy le niresaky tamy Filistinina rey Delila hoe: ‘Haiko amy zay ty sekirèny!’ Nampiroroany tam-potronany eo amy zay Samsona, le nampanapahiny olo voloni-Samsona iny. Bakeo Delila nikorakoraky  hoe: ‘Samsona, ndretia Filistinina rey!’ Nifoha Samsona, fe fa niala taminy ty heriny. Nisamborini-Filistinina rey ie, nipotserin-drozy ty masony, le nigadran-drozy ie.

Ndraiky andro, nisy Filistinina maro biby nivory mba hanao fety ho ani-Dagona ndranaharin-drozy. Nikorakoraky ho zao rozy: ‘Nameani-Dagona antsika Samsona! Aboaho bakao ie hataontsika fiheheza!’ Nisy vatobe mitoha trano rey ty teo, le nampitsanganin-drozy tanivoni-raha rey teo ie, bakeo nikizakizahin-drozy. Hoy Samsona: ‘Mba ameo hery indraiky avao lahy aho Jehovah!’ Fa lavalava voloni-Samsona iny tamy zay. Natosini-Samsona marè biby amy zay vato rey, le niropaky trano iny. Nimaty iaby ty olo tao. Nimaty koa Samsona.

“Mana hery hiatreha ty raha iaby aho, amy alalani-azy manome hery ahy iny.”—Filipianina 4:13