Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-21

Ty Loza Fahafolo

Ty Loza Fahafolo

Nampitamà ani-Farao Mosesy hoe tsy himpoly eo sasy. Fe taloha ty handehanany, le nivolaniny Farao hoe: ‘Ho maty iaby ze talanolo a Ejipta etoa amy sasakaly, ndre ty anakilahini-Farao zay ndre ty ani-andevo reo.’

Nampanovini-Jehovah hany manoka Israelita reo. Hoy ty asany: ‘Mamonoa aondrilahy na aosilahy tao raiky, le ahosoro amy varavaranareo eo ty liony. Asalio ty henany, le hano miaraky amy mofo tsy misy levira. Manaova parè handeha, ka misikina noho manaova kapa, fa amy haly toy ro hanafahako anareo.’ Nifalifaly biby Israelita reo tamy zay!

Nitety ty trano iaby ta Ejipta tao amy zay ty anjelini-Jehovah tamy sasakaly iny. Nimaty iaby ze talanolo amy trano nandalovany laha tsy nisy lio ty varavarany. Nandrio avao ie laha nisy lio ty teo. Nimaty anaky iaby ty Ejipsianina, ndre mahantra ndre mpanarivo. Fa ty Israelita tsy nisy nimaty anaky ndre raiky.

Nimaty koa ndre ty anakilahini-Farao. Tsy nizakani-Farao sasy raha zay, ka avy le nivolaniny Mosesy noho Arona hoe: ‘Mifohaza. Mialà teto amy zay nareo. Mandehana manompo a Ndranaharinareo zao. Andeso any iaby biby niharènareo reo, le mandehana!’

 Zavavola tamy zay. Niala ta Ejipta ao ty Israelita, nilahatsy saky fianakavia noho foko. Nisy lahilahy Israelita 600 000, le nisy ajà noho ampela maro biby koa. Nisy olo maro hafa koa niaraky tamin-drozy mba hanompo ani-Jehovah. Ela ty ela ka afaky ty Israelita!

Nihina hany manoka rozy santao ho fahatiarova ty nanavotani-Jehovah an-drozy. Kaihy hoe Paska raha io. Ty dikany le hoe “nandriova avao.”

“Toy ty antony mbo nanengako anao ho velo: Mba ho amy alalanao ro hampisehoako ty heriko, sady mba hambara amy tany toy iaby ty anarako.”—Romanina 9:17