Nambarani-Mosesy noho Arona ani-Farao ty hafatsi-Ndranahary hoe: ‘Laha mbo tsy engànao mandeha oloko reo, le handefasako lalitsy tany toy.’ Bevata biby lalitsy volaniny io sady manehitsy. Nilirany iaby tranoni-Ejipsianina reo, ndre mahantra zay ndre mpanarivo. Nifeno tanà iny. Fe tsy nisy mihintsy ty ta Gosena, amy tanà nipetrahani-Israelita reo tany. Nanomboky tamy loza fahaefatsy iny, le ty Ejipsianina avao ro niazony. Nangataky amy zay Farao hoe: ‘Angataho amy Jehovah mba hafahiny any lalitsy retoa. Mahazo mandeha amy zay nareo.’ Fe niova hevitsy Farao lafa nafahini-Jehovah raha rey. Le tsy ho mety anary mihintsy va Farao?

Nivola Jehovah hoe: ‘Laha tsy engàni-Farao handeha oloko reo, le harary noho ho maty ty biby harèni-Ejipsianina reo.’ Narary noho nimaty iaby ty biby niharèni-Ejipsianina rey, kanefa ty ani-Israelita reo tsy nisy nanahy. Mbo tsy naneky avao Farao fa nizizo.

Bakeo, nirahini-Jehovah nana amy Farao any ndraiky Mosesy, le nivolaniny hoe mangalà lavenoky, le atoraho anabo any. Nanjary bon- tany lavenoky rey, le niparitaky, bakeo nipetaky tamy Ejipsianina rey iaby. Avy le nisy bay iaby ty Ejipsianina noho ty biby niharèn-drozy, tratsini-bontany iny. Fe ndre zay, mbo tsy nengani-Farao handeha avao Israelita rey.

Mbo nirahini-Jehovah ho amy Farao any ndraiky Mosesy, le nivola hoe: ‘Mbo tsy engànao handeha  avao moa oloko reo? Hisy havandra maro biby hilatsaky amy tany toy hamaray.’ Nandefa varatsy noho havandra vatany Jehovah hamarain’iny, le nisy afo koa. Mbo tsy nisy ho zay ndraiky ta Ejipta any. Potiky iaby ty hazo noho ty raha nambolen-drozy, fe tsy nanahy ty ta Gosena tany. Le hoy Farao: ‘Mba angataho lahy Jehovah mba hampijano ani-zao! Mahazo mandeha nareo afarani-zay.’ Fe laha vo nijano varatsy noho havandra iny, le niova hevitsy Farao.

Le hoy Mosesy: ‘Hisy galala hihina ze raha mitiry sisa tsy nimatini- havandra iny.’ Nisy galala maro biby amy zay nihina ze raha iaby tavela tan-tonda tany noho tamy hazo rey. Hoy ndraiky Farao: ‘Mba angataho lahy Jehovah soa hafahiny any galala retoa.’ Fe ndre nafahini-Jehovah aza galala rey, le mbo nizizo avao Farao.

Nivola tamy Mosesy Jehovah hoe: ‘Atsangano manondro ani-lanitsy iny ty tananao.’ Avy le nivalomainty lanitsy iny, ka naiky biby. Tsy afaky nifankahita Ejipsianina reo tanatini-telo andro sady tsy nisy raha nihitan-drozy. Ty tan-tranoni-Israelita reo tany avao ro nazava.

Nivola tamy Mosesy amy zay Farao hoe: ‘Afaky mandeha nareo, fe tsy miaraky aminareo ty aondry noho ty aombinareo.’ Le hoy Mosesy: ‘Tsy maintsy andesinay biby reo satria baka amy reo ro hanomezanay ty Ndranaharinay.’ Neloky biby Farao, le nivola ho zao marè biby: ‘Le mandehana any avao iha! Vonoako iha laha mbo manao hitako ndraiky.’

“Ho hitanareo ndraiky ty tsy mampitovy ty olo marina noho ty raty fanahy, voho ty manompo a Ndranahary noho ty tsy manompo azy.”—Malakia 3:18