Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-101

Nalefa a Roma any Paoly

Nalefa a Roma any Paoly

Nitory tamy faritsy maro ndraiky Paoly, bakeo nana a Jerosalema any. Nisambory ie lafa tany, le nigadrà. Nahita fahità ie ndraiky haly zay. Nihitany Jesosy nivola taminy hoe: ‘Tsy maintsy hitory a Roma any iha.’ Nandesy baka a Jerosalema eo amy zay Paoly, le nigadrà roe tao ta Kaisaria any. Lafa nitsarà tamy Festosy Governora teo ie, le nivola hoe: ‘Aleo aho hotsaràni-Kaisara a Roma any.’ Le hoy Festosy: ‘Eka moa, Kaisara zany ty hitsara anao.’ Nandesy sambo nana a Roma any amy zay Paoly, le niaraky taminy koa Lioka noho Aristarko.

Nisy tsioky marè biby zay lafa rozy tan-driaky eny. Naharitsy andro maromaro raha iny ka nieritseritsy iaby rozy hoe ho maty. Fe hoy Paoly: ‘Nanonofy aho, le nisy anjely zay nivola tamiko hoe: “Ka matahotsy iha Paoly, fa tsy maintsy ho avy a Roma any. Tsy hisy ho maty koa olo miaraky aminao anaty sambo ao reo.” Mahereza fa tsy raha ho maty zao tsika!’

Naharitsy 14 andro tsioky be iny. Nahita nosy raiky zay avao rozy tamy farany. Tsy ia io fa nosy Malta. Nidofotsy tamy fasiky sambo iny ka nipotipotiky, fe tsy nisy nimaty olo 276 tanatiny tao rey. Ty sisany nilano, fa ty ilany nitanjaky tamy potipotikini-sambo iny soa hihafo zisiky an-tety eny. Nanampy an-drozy olo ta Malta tao rey, ka nandrehitsy afo mba hamindroan-drozy.

Telo vola tafara atoy, le nandesini-maramila rey sambo hafa nana a Roma any Paoly. Nitsena azy ty rahalahy sisany, ka nisaotsy ani-Jehovah ie. Nampahery azy ty nahita an-drozy. Mbo gadra avao Paoly, fe nahazo nanofa trano ie laha nisy maramila niamby azy. Nijano tany 2 tao ie. Maro ty olo namangy azy. Nitoriany mikasiky ty Fanjakà-Ndranahary olo rey sady nampianariny mikasiky ani-Jesosy. Nanoratsy taratasy ho ani-fiangonani-Azia Minora noho Jodia koa Paoly. Nampiasani-Jehovah hitory ty vaovao soa amy firenena maro vatany Paoly.

“Mampiseho ty vatanay ho mpanompo- Ndranahary amy raha iaby zahay, amy fiareta, amy fijalea, amy tsy fisia, amy raha sarotsy.”—2 Korintianina 6:4