Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-92

Niseho Tamy Mpihaza Maromaro Jesosy

Niseho Tamy Mpihaza Maromaro Jesosy

Nampahery ani-apostoliny rey Jesosy lafa niseho tamin-drozy. Nandeha nihaza tamy Riakini-Galilia any Petera, tafarani-zay. Nisy mpianatsy vitsivitsy niaraky taminy, le teo koa ry Tomasy, Jakoba, Jaona. Nihaza avao rozy tamy haly iny, fe tsy nahazo ndre raiky.

Lafa maraindray ty andro, le nahita lahilahy nitsanga tan-tety eny rozy. Nanontany lahilahy iny hoe: ‘Nahazo fia va nareo?’ “Aha,” hoasan-drozy. Le hoy lahilahy iny: “Atoraho ankavanani-botrinareo eo haratonareo ’o.” Natorakin-drozy tao vatany harato iny, ka niatsiky fia. Nisahira rozy nampilitsy azy tanaty botry ao. Avy le nihaini-Jaona hoe Jesosy lahilahy iny, ka hoy ty asany: “Tompo io!” Tonga de nitsamboko an-drano any Petera, le nilano zisiky amy Jesosy eny, fa mpianatsy ilany rey nandeha amy botry iny avao.

Lafa niavy teny rozy, le nahita mofo noho fia nasaly an’afo eo. Le hoy Jesosy tamin-drozy: ‘Anandeso amy fia niazonareo ’o  hanampeantsika ani-retoa.’ Hoy ty asany bakeon’iny: ‘Ndao tsika hihina.’

Lafa baka nihina rozy, le nanontaneani-Jesosy Petera hoe: ‘Teanao mandilatsy ty fihazà va aho?’ Namaly ie hoe: ‘Eka lahy Tompo! Ataoko fa hainao zay.’ Le hoy Jesosy: ‘Fahano moa ty anak’aondriko.’ Nanontany ndraiky Jesosy hoe: ‘Tea ahy vatany va iha Petera?’ Le hoy ty asany: ‘Hainao soa Tompo fa tea anao aho.’ Hoy Jesosy: ‘Ambeno soa moa ty aondrikeliko.’ Nanontany azy fanintelony ndraiky Jesosy. Nalahelo biby Petera, ka nivola hoe: ‘Mahay ty raha iaby lahy iha Tompo. Hainao fa tea anao aho.’ Le hoy Jesosy: ‘Fahano moa ty aondrikeliko.’ Nivola koa ie hoe: “Manaraha ahy avao.”

“Hoy Jesosy tamin-drozy: ‘Ndao hanaraky ahy, fa hataoko mpihaza olo nareo.’ Avy le nengan-drozy haraton-drozy rey, le nanaraky azy rozy.”—Matio 4:19, 20