Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIANARA FAHA-59

Nanoriky ty Safàni-Jehovah Mpamaraky Efatsy Rey

Nanoriky ty Safàni-Jehovah Mpamaraky Efatsy Rey

Nandesini-Nebokadnezara ho a Babylona any andriana ta Joda tao rey. Aspenaza tandapa ro nampikarakarany an-drozy. Nivola tamy Aspenaza Nebokadnezara mba hangalaky ze ajà lahilahy farani-ze mahay noho salama soa. Hampianary anatini-telo tao mpamaraky reo mba ho manam-pahefà a Babylona ao. Nila nianatsy nivola, namaky noho nanoratsy safà Akadianina ajà lahilahy rey satria io ty fivolanani-Babylonianina reo. Tokony hihina ty hany fihanini-mpanjaka noho olo an-dapany ao rey rozy. Retoa ty efatsy amy ajà lahilahy rey: Daniela, Hanania, Misaela, noho Azaria. Nameani-Aspenaza anara babylonianina rozy, le nikaihiny hoe: Beltesazara, Sadraka, Mesaka,  noho Abednego. Tsy nanompo ani-Jehovah sasy va rozy satria nampianary tao?

Tapa-kevitsy hanoriky ty safàni-Jehovah avao mpamaraky efatsy rey. Hain-drozy fa tsy tokony hihina amy hanini-mpanjaka rey rozy satria nivola ty lalànani-Jehovah fa maloto raha rey. Nivola tamy Aspenaza amy zay rozy hoe: ‘Mba ka ampihinany amy hanini-mpanjaka reo zahay, azafady.’ Namaly Aspenaza hoe: ‘Ka laha hitani-mpanjaka hoe malemilemy nareo satria tsy nihina ani-reo? Tsy le matiny aho!’

Nahita hevitsy amy zay Daniela. Nivola tamy mpiamby an-drozy iny ie hoe: ‘Ameo legimy noho rano avao zahay anatini-folo andro, bakeo ampitovizo amy ajà mihina amy hanini-mpanjaka reo.’ Naneky mpiamby iny.

Lafa tampitsy folo andro iny, le nihita hoe salama soa mandilatsy ajà sisany rey Daniela miaraky amy namany telo rey. Falifaly Jehovah fa nanoriky ty safàny rozy. Nataony mahihitsy aza Daniela, ka nahay nanazava fahità noho nofy.

Lafa nivita fianara iny, le nandesini-Aspenaza amy Nebokadnezara any mpamaraky rey. Niresaky amin-drozy mpanjaka iny. Nihitany amy zay hoe mahay raha noho kanty mandilatsy ty mpamaraky hafa ry Daniela, Hanania, Misaela, noho Azaria. Nifilini-mpanjaka iny hiasa aminy ao rozy efatsy. Hanontany an-drozy ie lafa misy fanapahan-kevitsy bevata hataony. Nataoni-Jehovah mahihitsy mandilatsy ty olo hendry noho mpanao mazỳ tamy mpanjaka tao rey rozy.

Nipetraky an-tanin’olo ry Daniela, Hanania, Misaela, noho Azaria, fe tsy nihalinon-drozy hoe anatini-vahoakini-Jehovah rozy. Hahatiaro ani-Jehovah avao koa va iha, ndre tsy eo ty baba noho reninao?

“Ka engà hisy hivazavaza anao satria hoe tanora iha, fa mba manaova modely ho ahi-ty olo tsy mivaliky, amy safà noho fandaisam-bata noho fitiava noho finoa voho fahaliova fandaisam-bata.”—1 Timoty 4:12