Nisy ajà ampela mana anara Estera zay nipetraky ta Sosana, a Persa any. Tao maro taloha tany, le nandesini-Nebokadnezara niala ta Jerosalema tao ty razambeny. Anakini-dadatoany zay ro niteza azy. Mordekay ty anarany. Niasa tamy Ahasoerosy mpanjakani-Persa tao ie.

Nila valy vaovao Ahasoerosy Mpanjaka. Nandesini-mpanompony rey taminy teo iaby ze ampela farani-ze soa tamy fanjakàny teo. Nandesin-drozy teo koa Estera. Le Estera ro nifilini-mpanjaka iny. Niraràni-Mordekay ie hoe: ‘Ao tsy hovolaninao hoe Jiosy iha.’

Nanambony tena andriana raiky mana anara Hamana zay. Teany hiankohoky aminy iaby ty olo iaby. Fe tsy nety Mordekay. Neloky biby Hamana ka teany hovonoa Mordekay. Lafa nihainy hoe Jiosy Mordekay, le nila hevitsy hamonoa ty Jiosy iaby amy tany iny ie. Hoy ty asany tamy mpanjaka: ‘Tokony hovonoanao any Jiosy reo tsy no hanahira antsika.’ Le hoy Ahasoerosy: ‘Anovo ze hitanao fa mety.’ Nameany fahefà hampiboaky lalàna ie. Zao ty lalàna nivolanini-Hamana amy ty vahoaky iaby: Tokony hovonoa iaby ty Jiosy amy andro faha-13 amy vola Adara. Nihitani-Jehovah soa raha zay.

Mbo tsy nihaini-Estera lalàna iny, farany nandefasani-Mordekay raiky ie. Bakeo hoy Mordekay: ‘Ndany iha hiresaky amy mpanjaka.’ Le hoy Estera: ‘Ze mandeha amy mpanjaka any fe tsy nikaihiny, le hovonoa. Kanefa ie zay fa 30 andro tsy nikaiky ahy. Fe handeha any avao aho. Laha tondroany amy tehiny iny aho le ho velo. Fa laha tsy zay aho, ho maty.’

Nandeha amy lakoroni-mpanjaka eny amy zay Estera. Nitondroani-mpanjaka iny tamy tehiny iny ie laha vo nihitany. Namonjy teny Estera, le nanontaneany  hoe: ‘Ino ilànao zay Estera?’ Le hoy Estera: ‘Hanao fety aho androany, le mba teako ho avy any nareo amy Hamana.’ Lafa tany rozy, le nanasa an-drozy tamy fety hafa ndraiky Estera. Tamy fety faharoe io, le nanontany mpanjaka iny hoe: ‘Ino kay ilànao ’o Estera?’ Le hoy ty asany: ‘Misy olo ta hamono ahy noho ty firenena raiky amiko. Mba ampeo lahy zahay!’ Le hoy mpanjaka iny: ‘Ia olo ta hamono anareo zao?’ Namaly Estera hoe: ‘Hamana raty fanahy tia io.’ Neloky biby Ahasoerosy ka avy le nampamonoany Hamana.

Fe ndre ty mpanjaka aza tsy afaky nanova ani-lalàna naboakini-Hamana iny. Farany nataony sefoni-andriana Mordekay, le nameany fahefà hampiboaky lalàna vaovao. Zao ty lalàna baka amy Mordekay: Mahazo miaro tena ty Jiosy lafa misy manafiky an-drozy. Niresini-Jiosy rey ty fahavalon-drozy tamy andro faha-13 amy vola Adara. Nanao fety avao rozy santao mba hahatiarova ani-raha iny.

“Hitaritariky anareo amy governora noho mpanjaka eo rozy satria nisy ahy, mba ho vavolombelo amin-drozy noho amy firenena reo.”—Matio 10:18