Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FANONTANEA 4

Ino ty Hataoko mba Hanarena ty Hadisoako?

Ino ty Hataoko mba Hanarena ty Hadisoako?

SOA HO HAY

Laha mieky ty hadisoanao iha, le ho azo atokisa sady ho azo anankina raha.

INO TY HO NATAONAO?

Zao ty raha niseho: Nihisa laboly niaraky amy ty namany Tafita. Lafa natorakiny laboly iny, le nahavoa vitrani-tomabilin’olo.

Laha iha ro tamy pilasini-Tafita, ino ty ho nataonao?

MIERITSERETA SOA TSE!

MANA SAFIDY TELO IHA:

  1. Lomay.

  2. Asaranao olo raha iny.

  3. Mivola amy tompony iny, le manonitsy.

Mety Safidy 1 io ro teanao. Fe soa iha laha mivola ty marina avao, ndre ino ndre ino raha tsy nety nataonao.

 MANINO IHA RO TOKONY HIEKY HOE DISO?

  1. Soa ty mivola ty marina.

    Mampirisiky antsika “hanao ty marina amy kila raha iaby” ty Baiboly.—Hebreo 13:18.

  2. Mora manenga ty hadisoanao ty olo lafa mieky iha.

    Mivola ty Baiboly hoe: “Ze nandika lalàna ka manarontsaro ty nataony le tsy hahavano, fa ze mieky hadisoa noho miala amy raha rezay ro hamindrà fo.”—Ohabolana 28:13.

  3. Ty vatan-draha marè le hoe mampifalifaly a Ndranahary raha zay.

    Mivola ty Baiboly hoe: “Mampangaroharo ani-Jehovah ty olo mahihitsihitsy, fa ty olo mahity ro mana fifandrambesa marìny aminy.”—Ohabolana 3:32.

Roampolo tao Karina. Nirifodrifotsy ie lafa nanday tomabily ka nampandoavy lamandy. Navoniny ani-babany raha zay, fe nitratsy avao ie. Nivola Karina hoe: “Lafa nanenty ty faktiranay babako tao raiky tafara atoy, le nihitany hoe nisy lamandy naloa tamy anarako. Nihelofa aho tamy zay!”

Fianara: “Ho tra-draha iha laha mamony ty raha tsy nety nataonao. Tsy maintsy hiboaky eo avao iny, ka hovilinao lafo!” hoy ty asani-Karina.

MANDRAMBESA FIANARA

Mivola ty Baiboly hoe: “Manao hadisoa matetiky tsika iaby.” (Jakoba 3:2) Laha avy le mieky ty hadisoany ty olo raiky, le hita hoe miambany sady matotsy.

Mandrambesa fianara baka amy ty hadisoanao. Hoy ty ajà ampela raiky kaihy hoe Vera: “Saky manao hadisoa aho, le miezaky mandramby fianara baka amy raha iny. Manampy ahy hiamby noho hieritseritsy soa ty raha hataoko raha zay lafa misy raha manahaky an’iny amy manaraky.” Ino amy zay ty hataonao?

Nisimba bisikiletini-babanao iny lafa nandesinao. Ino ty hataonao?

  • Tsy mivolambola sady mivavabavaky mba tsy ho arakiny.

  • Volaninao amy babanao iaby ty raha niseho.

  • Volaninao ty raha niseho fe asaranao olo hafa.

Tsy niafaky iha satria tsy nianatsy leçon. Ino ty hataonao?

  • Volaninao hoe nisarotsy biby fanadina iny.

  • Ekenao hoe ty vatanao avao ro nahavy anao tsy niafaky, bakeo iha miezaky.

  • Asaranao hoe maroindroy aminao mpampianatsy iny.

Mitovy amin’olo raiky manday tomabily fe manenty retrôvizera avao ty olo mieritseritsy marè mikasiky ty hadisoany taloha

 Ndao ndraiky moa tsika hanenty raha niseho taloha teo iny, le mipetraha amy pilasini-babanao noho mpampianatsy iny iha. Manao akory ty ho fahitàni-babanao noho mpampianatsy iny anao laha avy le mieky ty hadisoanao iha? Ka laha avonivoninao ty hadisoanao, akory ty ho fahitàn-drozy anao?

Eritsereto ty raiky amy ty raha tsy nety nataonao tamy taon-dasa, le valio fanontanea retoa.

Ino ty raha tsy nety nataonao? Akory ty nandaminanao azy?

  • Tsy nivolambolaniko.

  • Nasarako olo hafa.

  • Nekeko hoe nataoko raha iny.

Nanao akory iha laha, ohatsy, ka tsy nieky ty hadisoanao?

  • Falifaly: Nahavoa aho!

  • Naneny: Laha nihaiko aho nivola ty marina!

Ino ty tokony ho nataonao tamy zay?

Ino ty fianara nirambesinao baka amy raha tsy nety nataonao iny?

AKORY TY HEVITSINAO?

Manino ty olo ro tsy mahasaky mieky hoe diso?

Manao akory ty ho fahitàn’olo anao laha avonivoninao avao ty raha tsy nety nataonao? Ka laha mieky ty hadisoanao iha, akory ty ho fahitàn-drozy anao?—Lioka 16:10.