Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 TOKO FAHA-8

Ino Fanjakà-Ndranahary Zao?

Ino Fanjakà-Ndranahary Zao?

1. Ino ty vavaky malaza hodinihintsika?

OLO AN-TAPITRISANY ro mahay ty vavaky malaza hoe Babanay an-danitsy any, na Vavaky Nampianarini-Tompo. Nampiasàni-Jesosy vavaky io mba hampianara ty mpianatsiny hivavaky. Nivavaky mikasiky ino ie? Manino vavaky io ro vatan-draha amintsika henanizao?

2. Ino ty raha telo bevata nivolanini-Jesosy hoe tokony hangatahintsika lafa mivavaky?

2 Nivola Jesosy hoe: “Mivavaha ho zao nareo: ‘Babanay an-danitsy any, hohamasìny lahy ty anaranao! Ho avy lahy ty Fanjakànao! Hatao an-tany etoy lahy ty sitraponao, manahaky ty an-danitsy any.’” (Vakio Matio 6:9-13.) Manino tsika ro nampianarini-Jesosy hivavaky mikasiky raha telo reo?—Henteo Fanazavà Hevitsy 20.

3. Ino ty tokony ho haintsika mikasiky ty Fanjakà-Ndranahary?

3 Fa nianarantsika fa Jehovah ro anara-Ndranahary. Le fa nandiniky koa tsika hoe ino ty raha tea-Ndranahary hatao amy ty olombelo noho amy ty tany. Fe ino ty teani-Jesosy hovolany lafa nivola ie hoe: “Ho avy lahy ty Fanjakànao”? Mila haintsika hoe ino Fanjakà-Ndranahary zao, ino ty raha hataony, le akory ty hanamasinany ty anara-Ndranahary.

INO FANJAKÀ-NDRANAHARY ZAO?

4. Ino Fanjakà-Ndranahary zao, le ia ty Mpanjakany?

4 Nananga fanjakà raiky an-danitsy any Jehovah, le nifily ani-Jesosy mba ho Mpanjakani-Fanjakà io.  Kaihini-Baiboly hoe Fanjakà-Ndranahary fanjakà io. Jesosy ro “Mpanjakani-mpanjaka noho Tomponi-tompo.” (1 Timoty 6:15) Mahavita raha soa maro mandilatsy ty vitani-kila manam-pahefà olombelo Jesosy. Ndre atambatsy ty herini-manam-pahefà olombelo iaby le mbo tsy haharesy azy.

5. Aia ty misy ty Fanjakà-Ndranahary? Le aia ty faritsy hanjakàny?

5 Nimpoly tan-danitsy any Jesosy efapolo andro tafarani-nameloma azy. Nitendrèni-Jehovah ho Mpanjakani-Fanjakà iny ie tafara atoy. (Asan’ny Apostoly 2:33) An-danitsy any Fanjakà io, fe handay tany toy iaby. (Apokalypsy 11:15) Zay mahavy ty Baiboly hikaiky ty Fanjakà-Ndranahary hoe ‘Fanjakà an-danitsy any.’—2 Timoty 4:18.

6, 7. Manino Jesosy ro soa mandilatsy ty mpanday olombelo?

6 Volanini-Baiboly hoe anabo mandilatsy ty mpanjaka olombelo iaby Jesosy, satria “ie raiky avao ro tsy mety maty.” (1 Timoty 6:16) Maty iaby ty mpanday olombelo lafa mandeha ty fotoa, fa Jesosy tsy ho maty mihintsy. Haharitsy zisiky farany ty raha soa hataoni-Jesosy ho antsika.

7 Volanini-faminania amy Baiboly ao, fa ho Mpanjaka hanao ty marina noho hiferinay olo Jesosy: “Hipetraky aminy ty fanahini-Jehovah, le ty fanahy manome fahendrea noho fahihira noho torohevitsy noho hery noho fahaizan-draha, voho fahatahora ani-Jehovah. Hahafalifaly azy ty fahatahora ani-Jehovah. Tsy hitsara araky ze hitani-masony avao ie, na hananatsy araky ze reni-sofiny, fa araky ty rariny ro hitsaràny ty mahantra.” (Isaia 11:2-4) Teanao va ty mpanjaka manahaky ani-zay?

8. Akory ty ahaizantsika fa tsy Jesosy raiky avao ro handay amy Fanjakà io?

 8 Nifily olo hiaraky hanjaka amy Jesosy amy fanjakà an-danitsy any Jehovah. Nivola tamy Timoty, ohatsy, apostoly Paoly hoe: “Laha miaritsy avao tsika, le ho mpanjaka hiaraky manday aminy.” (2 Timoty 2:12) Firy ty ho mpanjaka hiaraky amy Jesosy?

9. Firy ty hiaraky hanjaka amy Jesosy? Nombia Ndranahary ro nanomboky nifily an-drozy?

9 Araky ty nianarantsika tamy Toko faha-7 tao, le nihitani-apostoly Jaona tamy fahità Jesosy nanjaka tan-danitsy any niaraky tamy mpanjaka 144 000 rey. Ia 144 000 reo? Hazavànini-Jaona fa “nana ty anarani-Anak’aondry noho ty anarani-Babany voasoratsy tamy handrin-drozy teo” rozy. Le nampeany hoe: “Rozy ro nanoriky avao ty Anak’aondry ndre taia ndre taia ty nandehanany. Baka amin’olombelo teo ro niviliana an-drozy.” (Vakio Apokalypsy 14:1, 4.) Nifily ani-Kristiana tsy nivaliky 144 000 reo Ndranahary mba “ho mpanjaka handay ty tany.” Hovelomy ho an-danitsy any rozy lafa maty. (Apokalypsy 5:10) Fa tamy androni-apostoly Jehovah ro nanomboky nifily ze ho tafilitsy anatini-144 000 reo.

10. Manino ro volany fa ty fitiava ro nahavy ani-Jehovah nitingy ani-Jesosy noho 144 000 reo handay ty olombelo?

10 Tena tea antsika Jehovah, ka nataony ze hampisy olombelo hiaraky manjaka amy Jesosy. Ho mpanjaka soa Jesosy satria mahay antsika. Hainy hoe manao akory olombelo zao, manao akory mijaly zao. Mivola Paoly fa ferinesani-Jesosy tsika. Afaky “miferinay antsika amy ty raha mampalemy antsika” ie, sady “fa nitsapà tamy raha iaby manahaky antsika koa.” (Hebreo 4:15;  5:8) Haini-144 000 reo koa hoe manao akory olombelo zao. Fa niaritsy arety noho tsy fahalavoraria rozy. Azontsika antoky baka amy zay, fa tsy ty raha mahafaly noho mampalahelo antsika avao ro ho tsapani-Jesosy noho 144 000 reo fa ndre ty raha manahira antsika koa.

INO TY RAHA HATAONI-FANJAKÀ-NDRANAHARY?

11. Nanino Jesosy ro nampianatsy ty mpianatsiny hivavaky mikasiky ty mba hanaova ty sitraponi-Jehovah an-danitsy any?

11 Nampianarini-Jesosy hivavaky mikasiky ty hanaova ty sitraponi-Jehovah an-danitsy any ty mpianatsiny. Ino ty antony? Nianarantsika tamy Toko faha-3 tany fa nanohitsy ani-Jehovah, Satana Devoly. Tafarani-zay, le nengàni-Jehovah hipetraky tan-danitsy any tanatini-fotoa kelikely ie noho ty anjely nivaliky, na demonia. Midika zay fa tsy ze tan-danitsy any iaby ro nanao ty sitrapo-Ndranahary. Hianarantsika soa ty mikasiky ani-Satana noho ty demonia amy Toko faha-10 any.

12. Ino ty raha roe bevata niseho resahini-Apokalypsy 12:10?

12 Volanini-Baiboly fa laha vo nanjary Mpanjakani-Fanjakà-Ndranahary Jesosy, le nialy tamy Satana ie. (Vakio Apokalypsy 12:7-10.) Misy raha roe bevata niseho resahini-andininy faha-10. Voalohany, nanomboky nanday ty Fanjakà-Ndranahary, ka Jesosy Kristy ro Mpanjaka. Faharoe, natoraky tan-tany etoy Satana. Mbo hianarantsika fa fa niseho iaby raha roe reo.

13. Nanao akory ty tan-danitsy any lafa natoraky baka any Satana?

13 Mivola ty Baiboly fa nifalifaly ty anjely tsy mivaliky lafa natoraky baka an-danitsy any Satana noho ty demoniany. Ho zao ty volaniny: “Ka le mifalifalea iha lanitsy, noho nareo mipetraky aminy ao!” (Apokalypsy  12:12) Milamy soa noho miharo raiky ty an-danitsy any henanizao satria samby manao ty sitrapo-Ndranahary iaby rozy any.

Nihananjeky ty fijalea tan-tany etoy liany nanoraha ani-Satana baka an-danitsy any. Ho tampitsy tsy ho ela ty fijalea

14. Ino ty raha niseho tan-tany etoy lafa natoraky baka an-danitsy any Satana?

14 Tsy mitovy amy zay mihintsy ty fiaina an-tany etoy. Maro ty loza mahazo ty olombelo ‘satria nijotso etoy ty Devoly’ sady “meloky marè, satria hainy fa kelikely ty fotoa ananany.” (Apokalypsy 12:12) Meloky biby Satana. Natoraky baka an-danitsy any ie sady hainy fa kelikely sisa le tsy hisy sasy ie. Anoviny iaby ze azony atao mba hampisy koronta, arety, fijalea amy tany toy iaby.

15. Ino ty raha tea-Ndranahary hatao amy tany toy?

15 Fe tsy niova ty raha tea-Ndranahary hatao amy tany toy. Teany ho paradisa ty tany, le hisy olombelo lavorary hiay eo zisiky farany. (Salamo 37:29) Ka manao akory ty hanaovani-Fanjakà-Ndranahary raha zay?

16, 17. Ino ty volanini-Daniela 2:44 amintsika mikasiky ty Fanjakà-Ndranahary?

16 Misy faminania amy Daniela 2:44 ao hoe: “Amy androni-mpanjaka reo azy Ndranaharini-lanitsy iny, le hanory fanjakà tsy ho rava zisiky farany, sady tsy ho azon’olo hafa fanjakà io. Hotorotoroeny noho haravany fanjakà iaby reo, fa ie ho eo avao zisiky amy fotoa tsy voafaritsy.” Ino ty ianarantsika mikasiky ty Fanjakà-Ndranahary baka amy faminania io?

17 Voalohany, “amy androni-mpanjaka reo” ro hanomboky handay ty Fanjakà-Ndranahary. Midika raha zay fa mbo hisy fanjakàn’olombelo handay amy fotoa io. Faharoe, volaniny fa haharitsy zisiky farany ty Fanjakà-Ndranahary sady tsy hisy fanjakà hafa hisolo azy  mihintsy. Fahatelo, hialy ty Fanjakà-Ndranahary noho ty fanjakà iaby an-tany etoy. Handresy ty Fanjakà-Ndranahary sady ie raiky avao ro handay amy tany toy iaby. Hana fanjakà farany ze soa ty olombelo amy zay.

18. Ino ty anarani-aly farany hataoni-Fanjakà-Ndranahary noho ty fanjakàn’olombelo?

18 Akory ty hahavy ty Fanjakà-Ndranahary hanjaka amy tany toy? Hisy demonia hamitaky ty “mpanjaka amy tany iaby misy olo, mba hamoria an-drozy ho amy alini-andro bevata-Ndranahary, azy Farany Ze Mahery iny”, kaihy hoe Haramagedona aly io. Hialy amy Fanjakà-Ndranahary ty fanjakàn’olombelo.—Apokalypsy 16:14, 16; henteo Fanazavà Hevitsy 10.

19, 20. Manino tsika ro mila ty Fanjakà-Ndranahary?

19 Manino tsika ro mila ty Fanjakà-Ndranahary? Misy antony telo farafahakeliny. Voalohany, mpanota tsika ka marary noho maty. Fe volanini-Baiboly fa lafa manday ty Fanjakà-Ndranahary, le hiay zisiky farany tsika. Mivola ty Jaona 3:16 hoe: “Bevata vatany ty fitiava-Ndranahary zao tontolo zao, ka nameany ty Anakilahiny toka mba tsy ho ripaky ze mampiseho finoa azy, fa hana fiaina zisiky farany.”

20 Faharoe, satria maro ty olo raty fanahy manodidy antsika. Misy ty mavandy noho mamitaky voho maloto fandaisam-bata. Tsy haintsika alà raha reo, fe Ndranahary ro hangalaky azy. Haripaky amy Haramagedona ze olo tsy miala amy raha raty. (Vakio Salamo 37:10.) Fahatelo, tsy mahay manday, raty fanahy, tsy manao ty marina ty fanjakàn’olombelo. Tsy mieritseritsy hanampy ty olo hanoriky ty safà-Ndranahary rozy. Mivola ty Baiboly hoe: “Nanjakazaka tamy ty  namany ty olo ka nampilitsy loza taminy.”—Mpitoriteny 8:9.

21. Ino ty hataoni-Fanjakà iny mba ho azo antoky fa hatao an-tany etoy ty sitrapo-Ndranahary?

21 Afarani-Haramagedona, le hataoni-Fanjakà-Ndranahary azo antoky fa atao an-tany etoy ty sitrapo-Ndranahary. Halàny tsy ho eo, ohatsy, Satana noho ty demoniany. (Apokalypsy 20:1-3) Amy farany, le tsy harary noho tsy ho maty sasy ty olo. Ho afaky hiay zisiky farany amy Paradisa ao iaby ze olo tsy mivaliky satria nafahini-vilim-panavota. (Apokalypsy 22:1-3) Hohamasinini-Fanjakà iny ty anara-Ndranahary. Ino ty dikani-raha zay? Midika zay fa hanome voninahitsy ty anarani-Jehovah iaby ty olombelo lafa handay tany toy ty Fanjakà-Ndranahary.—Henteo Fanazavà Hevitsy 21.

NOMBIA JESOSY RO NANOMBOKY NANJAKA?

22. Akory ty ahaizantsika fa mbo tsy Mpanjaka Jesosy tamy ie tan-tany etoy, na tamy ie vo nivelomy?

22 Nampianarini-Jesosy hivavaky ho zao ty mpianatsiny: “Ho avy lahy ty Fanjakànao.” Midika zay fa mbo tsy niavy ty Fanjakà-Ndranahary tamy fotoa zay. Haorini-Jehovah tse ty fanjakàny, le Jesosy ro hataony  Mpanjaka. Avy le natao Mpanjaka va Jesosy laha vo niavy tan-danitsy any? Aha, nandiny tse ie. Nanazava Petera noho Paoly tafarani-nameloma ani-Jesosy, fa fa tanteraky amy Jesosy ty Salamo 110:1. Hoy Jehovah amy faminania io ao hoe: “Mipetraha ankavanako eto zisiky hanaovako ty fahavalonao ho fasianao tomboky.” (Asan’ny Apostoly 2:32-35; Hebreo 10:12, 13) Zisiky ombia ty tokony handinisani-Jesosy, vo hataoni-Jehovah Mpanjaka ie?

Hataoni-Fanjakà-Ndranahary azo antoky fa atao an-tany etoy ty sitrapo-Ndranahary

23. a) Nombia Jesosy ro nanomboky nanjaka? b) Ino ty hianarantsika amy toko manaraky ao?

23 Nanenty faminania amy Baiboly ao ty Kristiana vitsivitsy, le nahatakatsy mialoha fa hiavaky ty tao 1914. Marina raha zay laha hentea ty raha niseho tan-tany etoy nanomboky tamy 1914. Nanomboky nanjaka Jesosy tamy tao io. (Salamo 110:2) Natoraky tan-tany etoy Satana tafarani-raha zay, sady “kelikely ty fotoa ananany” henanizao. (Apokalypsy 12:12) Ho hitantsika amy toko manaraky ao ty porofo, fa miay anatini-fotoa io tsika henanizao. Hianarantsika koa hoe tsy ho ela le hataoni-Fanjakà-Ndranahary azo antoky fa atao an-tany etoy ty sitrapo-Ndranahary.—Henteo Fanazavà Hevitsy 22.