Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FIZARÀ 2

Ka Mivaliky amy Valinao

Ka Mivaliky amy Valinao

“Ao ze naharo Ndranahary bao, tsy hosarahinolo.”—Marka 10:9

Tea Jehovah laha tsy mivaliky tsika. (Salamo 18:25) Tena mila mana toetsy io koa ty mpivaly satria tsy afaky hifampatoky rozy laha tsy samby tsy mivaliky. Kanefa fifampatokisa zay ro hampifankatea marè an-drozy.

Tsy mora ty miezaky tsy hivaliky amy ty valin-tena amy andro henanizao. Misy raha roe mila ataonao laha ta hiaro ty fanambaleanao iha.

 1 IMANEO SOA TY FANAMBALEANAO

HOY TY BAIBOLY: ‘Anovo hay soa ze vatan-draha marè.’ (Filipianina 1:10) Tafilitsy amy ty raha vatan-draha marè amy fiainanao ty fanambaleanao, ka tokony himaneanao soa.

Tea Jehovah laha tsy afaran-tono aminao ty valinao, sady teany ‘hahazo tavy ty fiaina’ nareo. (Mpitoriteny 9:9) Mivola mazava soa ie fa tsy tokony hataonao mihintsy ty hoe tsy midary valy. Ty mila fomba hampifalifalea azy ro tokony hataonao. (1 Korintianina 10:24) Anovo hay valinao fa mila azy iha sady tea azy.

TOY MISY HEVITSY:

  • Manokàna fotoa hiaraha tsy tampaky, le ka mieritseritsy raha hafa amy fotoa iny

  • Eritsereto ze mety aminareo roe, fa tsy ty mety aminao raiky avao

 2 AROVO TY FONAO

HOY TY BAIBOLY: “Ze tsy mieny manenty ampela ka maniry handry aminy le fa nandranto tam-pony tao sahady.” (Matio 5:28) Fa azo volany hoe mivaliky amy ty valiny ty olo raiky, laha mieritseritsy raha raty avao.

Mivola Jehovah hoe: “Arovo ty fonao.” (Ohabolana 4:23; Jeremia 17:9) Mila ambena soa ty maso mba hiarova ty fo. (Matio 5:29, 30) Manaova manahaky Joba. Nanao fifanekea tamy ty masony ie mba tsy hanentinenty ampela hafa. (Joba 31:1) Ataovo faly anao koa ty hanenty sary tiva. Mila tapa-kevitsy koa iha hoe tsy ho tea olo hafa ankoatsy ty valinao.

TOY MISY HEVITSY:

  • Ataovo hainolo hoe ahy valinao raiky avao iha

  • Ka manao raha hampeloky valinao, fa laha tsy azoazony ty fifandrambesanao aminolo raiky le tampaho raha zay