MBA henteo moa fa vaky sambo io, sady torotoro! Hitanao va olo nitsambòko anaty rano ao reo? Fa avy an-tety etoy ty sasane. Tsy Paoly va amy sary eto io? Ndao ho henteantsika ty raha niseho tamine.

Olo avotse tamy vaky sambo

Tiaròvo soa, fa ho roe tao zay ty nampigadrà an’​i Paoly ta-Kaisaria tany. Bakeo nalefa tamy sambo ho a-Roma ane ami’​zay ie niarake tamy gadra hafa. Laha fa nandalo tamy nosy raike atao hoe Kreta zay roze, le nisy tsioke mahery tan-driake teny. Nitsioke maré andro iny, ka tsy afake nanodike sambo iny sasy mpanday sambo reny. Tsy nihitan-droze iaby aza masoandro iny ndre atoandro, sady tsy nahita kinta kea roze tamy haly. Laha fa afake andro maromaro, le tsy nieritseritse ho avotse sasy mpanday sambo reo.

Nitsanga Paoly laha fa bakeo, ka nanao hoe: ‘Tsy ho maty tsika; sambo toy avao ro ho rendrike. Nisy anjele-Ndranahare zay niseho tamiko nankaly, ka nanao hoe: “Ka mavàka, Paoly! Mila mitsanga anilan’​i Kaisara, filohan’​i Roma iha. Hanavotse anao noho olo miarake aminao reo Andranahare.” ’

Fa 14 andro zay ty nanomboha tsioke iny. Nihita mpanday sambo reny ami’​zay, laha fa misasakaly, fa nihanarivo ty rano! Nalatsan-droze tan-driake tao malaky vatofantsike iny, satria navàka roze tsy no hidòdo amy vato avao sambon-droze io, amy andro maìky io. Nataon-droze ami’​zay ze hitarìha sambo io, ho amy sisy riake iny eny, laha fa bakeo.

Laha fa nandeha tan-tsisy riake iny teo roze, le nidòdo tamy fasibé zay sambo iny ka nijàno teo. Niha nahery ami’​zay riake iny laha fa bakeo, ka nanomboke vakivaky sambo iny. Hoy ty asa kapiteny sambo io: ‘Ndahàna mitsambòko voalohane an-drano ao, ze mahay milàno aminareo, ka milanòa zisiky hiavianareo an-tety eny. Mitsambokòna kea ty sasane, ka mangalà tapa-kazo amy sambo io soa hitanjàhanareo.’ Ka le nanao raha zay olo reny. Arake ty safàn’​anjele iny, le samby niavotse iaby ty olo 276 nandeha tanaty sambo io tao, ka niavy soa tan-tety teny.

Malta ty anara nosy io. Soa fanahy biby ty olo nipetrake tao, ka nikarakara soa olo baka an-tsambo eny reny. Laha fa nihasoa ami’​zay andro iny, le nangalake sambo hafa ho a-Roma ane Paoly.

Asan’​ny Apostoly 27:​1-44; 28:​1-14.



Fanontanea

  • Ino ty raha nahazo sambo nandehan’​i Paoly iny, laha fa nandalo tanila nosy Kreta teo ie?
  • Ino hoasan’​i Paoly tamin’​olo iaby tanaty sambo io tao?
  • Nanino sambo io ro nitorotoro?
  • Ino ty raha novolàny kapiteny iny? Firy ty olo niavy soa tan-tety teny?
  • Ia ty anara nosy nijanonan-droze io? Ino ty raha nataon’​i Paoly laha fa nihasoa ty andro?

Fanontanea Fanampine

  • Vakio Asan’​ny Apostoly 27:​1-44.

    Manampe antsika hino soa ze raha iaby anaty Baiboly ao, tantara mikasike lia nataon’​i Paoly ta-Roma ane iny. Hazavao. (Asa. 27:​16-19, 27-32; Lioka 1:​3; 2 Tim. 3:​16, 17)

  • Vakio Asan’​ny Apostoly 28:​1-14.

    “Tea olo vatane” mpanompo sampy ta-Malta tao reo, ka “nisoa fanahy” tamin’​apostoly Paoly noho tamin’​olo hafa niarake sambo amine reny. Tokone hamporisike ty Kristiana hanao ino raha zay? Amy fomba manao akore koa ro hanatanterahan-droze aze? (Asa. 28:​1, 2; Heb. 13:​1, 2; 1 Pet. 4:​9)